សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ពិធីបុណ្យភ្ជុំបិណ្ឌមិនត្រឹមតែជាបុណ្យប្រពៃណីសាសនាដ៏ធំជាងគេរបស់កម្ពុជា ដែលមានរយៈពេល ១៥ថ្ងៃប៉ុណ្ណោះទេ ប៉ុន្តែក៏ជាឱកាសដ៏ប្រសើរក្នុងការចូលរួមគាំទ្រផលិតផលក្នុងស្រុក បង្កើនចរន្តសេដ្ឋកិច្ចដ៏សំខាន់មួយតាមរយៈការទិញគ្រឿងឧបភោគបរិភោគសម្រាប់វេចខ្ចប់ធ្វើជាគ្រឿងទេយ្យទាន និងសាកដប្រគេនព្រះសង្ឃតាមព្រពៃណីសាសនា។
នៅក្នុងឱកាសពិធីបុណ្យកាន់បិណ្ឌ អាជីវករលក់ដុំ និងរាយនៅតាមទីផ្សារធំៗក្នុងរាជធានីភ្នំពេញ កំពុងរីករាយ និងមមាញឹកក្នុងការលក់ដូររបស់ខ្លួន ទាំងការលក់នៅទីតាំងផ្ទាល់ ក៏ដូចជាការលក់តាមប្រព័ន្ធអនឡាញ។
អ្នកស្រី ហេង ដាវី អាជីវករលក់សាដកនៅផ្សារដើមគ បានឱ្យដឹងថា ត្រឹមបិណ្ឌទី៤ អ្នកស្រីលក់សាដកបានប្រមាណ ២០០កញ្ចប់ (តម្លៃចាប់ពី ២០,០០០ រៀល ដល់ ១២០,០០០ រៀល ឬខ្ពស់ជាងនេះ)។
អ្នកស្រីបានបញ្ជាក់ថា ៖ «បច្ចុប្បន្ន អតិថិជននិយមទិញសាដកជាកន្ត្រក ហើយក៏មានការបញ្ជាទិញបន្តទៅតាមបណ្តាខេត្តមួយចំនួនផងដែរ ព្រោះសាដកជាកន្ត្រកស្អាតជាងការវេចខ្ចប់ដោយថង់ប្លាស្ទិក ហើយដាក់បានច្រើន ងាយស្រួលកាន់ ហើយផលិតផលដែលរៀបចំទៀតសោត ក៏ជារបស់ខ្មែរ ផលិតនៅក្នុងស្រុក»។
អ្នកស្រី ភាព ពិសី អាជីវករលក់រាយនៅផ្សារទួលគោក ក៏បានកត់សម្គាល់ដែរថា សាដកដែលចងជារាងបាតលោក មានតម្លៃសមរម្យត្រឹមប្រមាណ ២០,០០០ រៀល ទទួលបានការគាំទ្រច្រើនពីពុទ្ធសាសនិក។
អ្នកស្រីបញ្ជាក់ថា ៖ «កាលពីមុន ភាគច្រើនប្រើប្រាស់ផលិតផលនាំចូលពីសៀម ប៉ុន្តែក្រោយមក ក៏បោះបង់ (ពហិការ) ផលិតផលនាំចូលទាំងនោះ ហើយងាកមកគាំទ្រផលិតផលក្នុងស្រុកវិញ។ បច្ចុប្បន្ន យើងប្រើតែផលិតផលខ្មែរ ដែលមានតម្លៃសមរម្យ»។
សូមជម្រាបថា នៅគន្លងព្រះពុទ្ធសាសនា «សាដក» ប្រែថា សំពត់ងូតរបស់ព្រះសង្ស។ ចំណែក «ទេយ្យទាន» ជាឈ្មោះវត្ថុដែលគេត្រូវឲ្យជាទាន រួមទាំងបច្ច័យទាំង ៤ មានចីវរប្បច្ច័យជាដើម។ សម្ភារៈប្រើប្រាស់ទាំងនេះ ត្រូវបានពុទ្ធសាសនិកនាំយកជាសង្សទាន ក្នុងពីធីកម្មសាសានា ក៏ដូចជាបុណ្យប្រពៃណីផ្សេងៗ រួមមាន ភ្ជុំបិណ្ឌ ចូលឆ្នាំខ្មែរ កឋិនទាន និងមាឃបូជាជាដើម។ ដោយឡែក ទៀន និងធូប គឺជាទេយ្យទានដ៏ប្រពៃ ដែលតំណាងឱ្យពន្លឺបញ្ញា និងការគោរពបូជា ចំណែកគ្រឿងឧបភោគបរិភោគក្នុងសាដក ជួយសម្រួលដល់ការគង់ចាំវស្សារបស់ព្រះសង្ឃក្នុងរដូវវស្សា។
ការរួមបញ្ចូលគ្នារវាង «ជំនឿសាសនា» និង «ការលើកស្ទួយផលិតផលជាតិ» តាមរយៈការជ្រើសរើសទំនិញខ្មែរមកធ្វើជាទេយ្យទាន មិនត្រឹមតែបំពេញបាននូវកុសលចិត្តដ៏ជ្រះថ្លាប៉ុណ្ណោះទេ ប៉ុន្តែថែមទាំងជាចលករសេដ្ឋកិច្ចយ៉ាងសំខាន់ក្នុងការបង្កើនការគាំទ្រជីវភាពកសិករ សិប្បករ ក្នុងស្រុក ក៏ដូចជាធ្វើឱ្យមានចរន្តសេដ្ឋកិច្ចជាតិផងដែរ៕
Account
Security
Favourite Content