ដំណាំគម្របដី គឺជារុក្ខជាតិដែលត្រូវបានប្រើប្រាស់ជាចម្បងដើម្បីបន្ថយការហូរច្រោះដី ធ្វើឱ្យប្រសើរឡើងនូវសុខភាពដី បង្កើនជាតិទឹក កម្ចាត់ស្មៅ ជួយកម្ចាត់សត្វល្អិត និងជំងឺ បង្កើនជីវៈចម្រុះ និងនាំមកនូវអត្ថប្រយោជន៍ជាច្រើនដល់ចំការ។ ដំណាំគម្របដី គឺជារុក្ខជាតិ ដែលផ្តល់ផលប្រយោជន៍ដល់ការលូតលាស់នៃដំណាំផ្សេងទៀតនាពេលអនាគត ហើយអាចជាធាតុផ្សំដ៏សំខាន់នៃកសិកម្មសរីរាង្គ ដែលចូលរួមដល់ការអភិរក្សសត្វព្រៃ។
ដំណាំគម្របដី គឺការដាំពពួកស្មៅ ដូចជា ប្រភេទស្មៅ Sorghum, Stylo, Jute, Sesbania, Pearl Millet, Juncea និងការដាំដំណាំសណ្តែក ល្ង ជាដើមដែលមានអាយុកាលលូតលាស់ពី ៦០ ទៅ ៧៥ ថ្ងៃ ឬលើសពីនេះទៅតាមប្រភេទស្មៅនីមួយៗ។ ដំណាំទាំងនេះជួយការពារសំណឹកដី កម្ចាត់ស្មៅ កម្ចាត់សត្វល្អិត និងជំងឺផ្សេងៗ ពង្រឹងសុខភាពជីវៈចម្រុះ និងអាចនាំមកនូវអត្ថប្រយោជន៍ជាច្រើនដល់កសិករ រួមទាំងការបង្កើនប្រាក់ចំណេញផងដែរ។
ដើមចង្រ្កង់ស្វា ៖ នៅពេលដាំដុះជាដំណាំប្រចាំរដូវក្តៅ ចង្រ្កង់ស្វា(Sunn hemp) អាចផលិតជីវម៉ាសបានជាង ៥ ០០០ ផោន និងអាសូត ១០០ ផោនក្នុងមួយហិកតា។ វាអាចបង្កើតបរិមាណនេះក្នុងរយៈពេលពី ៦០ ទៅ ៩០ ថ្ងៃ ដូច្នេះហើយវាមានសក្តានុពលក្នុងការបង្កើតសារធាតុសរីរាង្គ និងស្រូបយកកាបូននៅក្នុងដីហើយវាក៏ត្រូវបានគេស្គាល់ថាជារុក្ខជាតិដើម្បីកម្ចាត់ណេម៉ាតូតដែរ។
សណ្តែកដី ៖ សណ្តែកដី គឺអាចដាំបានចាប់ពីខែចែត្រទៅ ពោលគឺមុនចូលឆ្នាំខ្មែរ និងមានរយៈពេលដាំប្រមាណ ៤-៥ខែ។ សណ្តែកដីវាជាប្រភេទរុក្ខជាតិ ដែលមិនត្រូវការដីមានជាតិសំណើមខ្លាំងពេកនោះទេ ប៉ុន្តែវាស្ថិតនៅចំណុចកណ្តាល គឺសើមល្មម និងស្ងួតល្មមទើបវាអាចលូតលាស់បានល្អ។ គួររំលឹកផងដែរថាសណ្តែកដីវាអាចធន់ទ្រាំនឹងកម្តៅបានមិនលើសពី៣៨អង្សាសេឡើយ បើសីតុណ្ហភាពលើសពីនេះវាមិនអាចផ្តល់ផលបានល្អឡើយ វាធ្វើឱ្យយើងបាត់បង់ទិន្នផលក្នុងការប្រមូលផល។
ដំណាំល្ង ៖ ដំណាំល្ងគឺជាដំណាំមួយប្រភេទ ដែលអាចដាំដុះនៅលើសណ្ឋានដីបានច្រើនប្រភេទ ប៉ុន្តែវាអាចដុះលូតលាស់ល្អនៅដីល្បាប់ដីដែលមានវាយនភាពល្អ មានជីជាតិហើយជាដីដែលមានកំរិត pH ចន្លោះពី ៥ ទៅ ៧។ វាមានប្រព័ន្ធឬសសម្រាប់ដឹកនាំសារធាតុចិញ្ចឹមពីក្នុងដីយ៉ាងល្អ។ ម្យ៉ាងវិញវាធ្វើឱ្យដីមានទម្រង់ល្អផងដែរ។ ដំណាំល្ងមានភាពធន់ទ្រាំទៅ និងដីដែលមានជាតិប្រៃទាបបំផុត ហើយវាមិនអាចធន់ទ្រាំនិងភាពជោគជាំនៃដីបានយូរឡើយ។ ផ្ទុយទៅវិញវាមានភាពស៊ូទ្រាំ និងអាកាសធាតុស្ងួតបានយូរជាងដំណាំមួយចំនួននៅតំបន់ត្រូពិច។
ការដាំដំណាំគម្របដីផ្តល់អត្ថប្រយោជន៍ជាច្រើនសម្រាប់ផលិតកម្មកសិកម្ម និងបង្កើតភាពធន់ទៅនឹងការប្រែប្រួលអាកាសធាតុដូចជា ៖
-ទប់ស្កាត់ការហូរច្រោះមមោករបស់ដី ដែលបើមិនមានការទប់ស្កាត់បានទាន់ពេលវេលាដីអស់ជីជាតិ ហឹរ មិនអាចដាំដុះ
-បានបង្កើតបានកម្ទេចកម្ទី បង្កជាមមោកដីឡើងវិញ
-រក្សាសំណើមទឹកទាំងក្នុងដី និងលើដីតាមរយៈគម្របរុក្ខជាតិនោះ និងរក្សាទឹកតាមរន្ធឬសរុក្ខជាតិគម្របដីដែលងាប់ជាបន្តបន្ទាប់នោះ
-បង្កើតរន្ធខ្យល់តាមរយៈរន្ធឬសដែលងាប់ ផ្តល់អុកស៊ីសែនដល់ដី
-រួមចំណែកសារធាតុចិញ្ចឹម(អាស៊ូត)ដល់ដីតាមរយៈការស្រូបកាបោនពីបរិយាកាសជាដើម។ និយាយរួមដំណាំគម្របដីដើរតួនាទីសំខាន់ក្នុងការកែលម្អសុខភាពដីនិងគុណភាពដីធន់ទៅនឹងការប្រែប្រួលអាកាសធាតុ៕