សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទបានជូនដំណឹងពីការបិទការធ្វើនេសាទត្រីកាម៉ុងសម្រាប់រដូវនេសាទឆ្នាំ២០២៤ ចាប់ពីថ្ងៃទី ១៥ ខែមករា រហូតដល់ថ្ងៃទី ៣១ ខែមីនាឆ្នាំ២០២៤ នេះដល់ប្រជានេសាទនៅតំបន់ឆ្នេរសមុទ្រ ។
សេចក្តីជូនដំណឹងរបស់រដ្ឋបាលជលផលបានបញ្ជាក់ថា រដ្ឋបាលជលផលសង្ឃឹមថា ប្រជាពលរដ្ឋដែលប្រកបរបរនេសាទត្រី កាម៉ុង “ប្លាធូ” ទាំងអស់ និងចូលរួមអនុវត្តតាមការជូនដំណឹងនេះ ដើម្បីរួមចំណែកថែរក្សា និងការពារធនធានជលផលសមុទ្រ និងធានាបាននិរន្តរភាពផលស្តុកក្នុងធម្មជាតិ សូមប្រជាពលរដ្ឋដែលប្រកបរបរនេសាទត្រី កាម៉ុង”ប្លាធូ” ទាំងអស់ សូមផ្អាកសកម្មភាពការនេសាទត្រីតាមពេលវេលាដូចមានក្នុងសេចក្តីជូនដំណឹងនេះ។
ឯកឧត្តម ពុំ សុថា ប្រតិភូរាជរដ្ឋាភិបាលទទួលបន្ទុករដ្ឋបាលជលផលបានអំពាវនាវដល់ប្រជានេសាទក្នុងតំបន់ឆ្នេរ ផ្អាកសកម្មភាពនេសាទត្រីកាម៉ុងនៅក្នុងរដូវពងកូន ជាបណ្ដោះអាសន្ន ដោយការប្រកាសបិទការនេសាទ ចាប់ពីថ្ងៃទី១៥ ខែមករា រហូតដល់ថ្ងៃទី៣១ ខែមីនា គឺដោយសារតែ វាជារដូវបន្តពូជ និងពងកូនរបស់ត្រីកាម៉ុង “ប្លាធូ” ក្នុងដែននេសាទសមុទ្រកម្ពុជា ដើម្បីធានានិរន្តរភាពផលស្តុកត្រីនៅក្នុងធម្មជាតិ។
ឯកឧត្តម ពុំ សុថា បានបញ្ជាក់ថា ៖ «ជារៀងរាលឆ្នាំ ចាប់ពីថ្ងៃទី១៥ ខែមករា ដល់ថ្ងៃទី៣១ ខែមីនា គឺជារដូវត្រីកាម៉ុងបន្តពូជ និងពងកូន ហេតុដូចនេះ សូមប្រជានេសាទសមុទ្រទាំងអស់ត្រូវបញ្ឈប់ការធ្វើនេសាទត្រីកាម៉ុងក្នុងរយៈពេលនេះជាកំហិត ដើម្បីរួមចំណែកការពារ និងបង្កើនផលស្តុកត្រីនៅក្នុងធម្មជាតិប្រកបដោយនីរន្តរភាព»។
ជាមួយគ្នានេះ ឯកឧត្តមប្រតិភូរាជរដ្ឋាភិបាល បានជំរុញឱ្យខណ្ឌរដ្ឋបាលជលផលក្នុងបណ្ដាខេត្តនៃតំបន់ឆ្នេរសមុទ្រ ដែលរួមមាន ខេត្តព្រះសីហនុ កំពត កែប និងកោះកុង ធ្វើការផ្សព្វផ្សាយអំពីការហាមឃាត់ការនេសាទត្រីកាម៉ុងនៅក្នុងរដូវបន្តពូជ និងពងកូននេះដល់គ្រប់ប្រជានេសាទសមុទ្រទាំងអស់នៅក្នុងសហគមន៍មូលដ្ឋានបានដឹងនឹងចូលរួមអនុវត្តឱ្យបានល្អប្រសើរ ដើម្បីរួមចំណែកគ្រប់គ្រងផលស្តុកត្រីកាម៉ុងឱ្យមាននិរន្តរភាពស្របតាមគោលនយោបាយវិស័យជលផលជាតិ និងធានាបាននូវប្រព័ន្ធអេកូឡូស៊ីដែនជម្រកសុវត្ថិភាពរបស់ត្រីកាម៉ុងឱ្យល្អប្រសើរ ដើម្បីលើកកម្ពុស់ជីវភាពរស់នៅរបស់ប្រជាពលរដ្ឋ និងសហគមន៍មូលដ្ឋាន។
ដោយឡែក រដ្ឋបាលខេត្តកោះកុង ប្រាប់ប្រជាពលរដ្ឋ ដែលប្រកបរបរនេសាទត្រីកាម៉ុង ក្នុងតំបន់គ្រប់គ្រងដែនជម្រកសុវត្ថិភាពត្រីកាម៉ុងពាមក្រសោបទាំងអស់មេត្តាបញ្ឈប់សកម្មភាពធ្វើការនេសាទត្រីកាម៉ុងជាកំហិត។ ប្រជានេសាទទាំងអស់ នឹងបន្តធ្វើនេសាទជាធម្មតាឡើងវិញនៅពេលផុតរយៈពេលនៃការបិទការនេសាទនេះ។
រដ្ឋបាលខេត្តបញ្ជាក់ដោយក្តីសង្ឃឹមថា បងប្អូនប្រជាពលរដ្ឋ ដែលប្រកបរបរនេសាទ នឹងចូលរួមអនុវត្តតាមសេចក្តីជូនដំណឹងនេះ ដើម្បីរួមចំណែកគ្រប់គ្រងផលស្តុកត្រីកាម៉ុង ឱ្យមាននិរន្តរភាព ស្របតាមគោលនយោបាយវិស័យជលផលជាតិ និងធានាបាននូវប្រព័ន្ធអេកូឡូស៊ីដែនជម្រកសុវត្ថិភាពត្រីកាម៉ុងឱ្យល្អប្រសើរ ព្រោះការប្រកាសហាមឃាត់នេះ គឺជារដូវត្រីកាម៉ុងបន្តពូជ និងពងកូន។
រដ្ឋបាលខេត្តក៏បានបញ្ជាក់ថា ដើម្បីរួមចំណែកថែរក្សា និងការពារធនធានជលផលសមុទ្រឱ្យបានគង់វង្សទៅថ្ងៃអនាគត អ្នកនេសាទទាំងអស់ ត្រូវផ្អាកជាបណ្ដោះអាសន្ននូវការនេសាទត្រីប្រភេទនេះ ក្នុងករណីប្រជានេសាទ មិនអនុវត្តតាមសេចក្ដីជូនដំណឹងខាងលើនេះទេ នឹងត្រូវផ្តន្ទាទោសតាមច្បាប់ជាធរមាន។
ដូច្នេះ ដើម្បីរួមចំណែកថែរក្សា និងការពារធនធានជលផលសមុទ្រកម្ពុជាឱ្យមាននិរន្តរភាព ការនេសាទត្រីកាម៉ុងក្នុងរដូវពងកូន ដែលចាប់ផ្ដើមពីថ្ងៃទី ១៥ ខែមករាដល់ថ្ងៃទី ៣១ ខែមីនាខាងមុខ គឺត្រូវបានហាមឃាត់ជាដាច់ខាត។ នេះបើយោងសេចក្ដីជូនដំណឹងរបស់រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ។
តាមរបាយការណ៍វិស័យជលផលប្រចាំឆ្នាំ២០២៣ ផលនសាទ និងផលវារីវប្បកម្ម អនុវត្តបាន ៨៦៦ ២៥០តោន កើនលើសឆ្នាំមុន៤ ០៥០តោន ស្មើ០,៤៧% ដែលក្នុងនោះរួមមាន៖ ផលនេសាទទឹកសាបចំនួន៤២៦ ៧៥០តោន កើនឡើង២០ ៣៥០តោន ស្មើ៥,០១%, ផលនេសាទសមុទ្រ១២៥ ៥០០តោន កើនឡើង៣០០តោនស្មើ០,២៤% និងផលវារីវប្បកម្មចំនួន៣១៤ ០០០តោន ថយចុះ១៦ ៦០០តោន ស្មើ៥,០២%៕
Account
Security
Favourite Content