ភ្នំពេញ ៖ ជាប្រវត្តិសាស្ត្រដែលប្រទេសអេមីរ៉ាតអារ៉ាប់រួមបញ្ជាទិញអង្ករពីកម្ពុជាក្នុងកម្រិតចំនួន ៦០ ០០០ តោន ស្មើនឹង ៥៤ លានដុល្លារអាម៉េរិក ដោយការដឹកជញ្ជូនលើកទី១ទៅកាន់ទីផ្សារអេមីរ៉ាតអារ៉ាប់រួម មានចំនួន ៥០០ តោន ។

ក្រុមហ៊ុន វ័នរ៉ូដ គ្រុប ទទួលបានជោគជ័យក្នុងការបញ្ជាទិញ និងនាំចេញអង្ករកម្ពុជា ទៅកាន់ទីផ្សារប្រទេស​អេមីរ៉ាតអារ៉ាប់រួម ដោយធ្វើការដឹកជញ្ជូនលើកទី១ ចំនួន ៥០០ តោន ហើយប្រទេសអេមីរ៉ាតអារ៉ាប់រួម ធ្វើការបញ្ជាទិញក្នុងកម្រិតចំនួន ៦០ ០០០ តោន​ ស្មើនឹង ៥៤ លានដុល្លារអាមេរិក។ នេះបើតាមក្រសួងពាណិជ្ជកម្ម។

លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានវាយតម្លៃខ្ពស់ចំពោះក្រុមហ៊ុន វ័នរ៉ូដ គ្រុប ដែលបានទទួល​ជោគជ័យក្នុងការបញ្ជាទិញ និងនាំចេញអង្ករកម្ពុជាទៅកាន់ទីផ្សារប្រទេសអេមីរ៉ាតអារ៉ាប់រួមនេះ។

លោកជំទាវរដ្ឋមន្ត្រី បានលើកឡើងថា ការនាំចេញអង្ករនាពេលនេះមិនត្រឹមតែជាការធ្វើពាណិជ្ជកម្មប៉ុណ្ណោះទេ ថែមទាំង​ជាការជំរុញកិច្ចសហប្រតិបត្តិការមិត្តភាពដ៏ល្អរវាងប្រទេសកម្ពុជា ប្រទេសអេមីរ៉ាតអារ៉ាប់រួម និងប្រទេសចិន ដែលមាន​ក្រុមហ៊ុន វ័នរ៉ូដ គ្រុប ជាតំណាងផងដែរ។ លើសពីនេះការនាំចេញនេះនឹងបើកទីផ្សារថ្មីសម្រាប់​កិច្ចសហប្រតិបត្តិការ​ពាណិជ្ជកម្ម និងវិនិយោគ ហើយនឹងផ្តល់ឱកាសថ្មីៗ ក្នុងការពង្រឹងកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ វប្បធម៌ និងវិស័យផ្សេងៗ ជាច្រើនបន្ថែមទៀត។

លោកជំទាវរដ្ឋមន្ត្រី បានបន្ថែមថា ក្រសួងពាណិជ្ជកម្ម ក្នុងនាមជាសេនាធិការរបស់រាជរដ្ឋាភិបាល បានបន្តខិតខំយ៉ាង​សកម្មក្នុង​ការបន្តជំរុញ និងគាំទ្រយ៉ាងពេញទំហឹងដល់ការនាំចេញកសិផលក្នុងស្រុកបង្កើតឱកាស​ការងារកាន់តែច្រើន​សម្រាប់កសិករ និងអ្នកផលិតរបស់កម្ពុជា ព្រមទាំងលើកកម្ពស់ការប្រកួតប្រជែងជាលក្ខណៈ​អន្តរជាតិនូវកសិផលរបស់​កម្ពុជា ជាពិសេសស្វាគមន៍យ៉ាងកក់ក្តៅចំពោះដៃគូអន្តរជាតិនានា ដែលមកធ្វើធុរកិច្ច និងវិនិយោគនៅកម្ពុជា ក្នុងគោល​បំណងទទួលបានផលប្រយោជន៍រួម និងវិបុលភាពទៅវិញទៅមក។ លើសពីនេះ ក្រសួងពាណិជ្ជកម្មនឹង​ចូលរួមរៀបចំ​វេទិកាផ្គូរផ្គងអាជីវកម្ម ដែលនឹងរៀបចំឡើងនៅចុងខែកុម្ភៈ ឆ្នាំ២០២៤ នៅទីក្រុងអាប៊ូដាប៊ី ដើម្បីជំរុញ និងបង្កើតឱកាស​ក្នុងការរកទីផ្សារថ្មីបន្ថែមទៀតរបស់អង្ករ​កម្ពុជា។

លោកជំទាវរដ្ឋមន្ត្រី ក្រសួងពាណិជ្ជកម្ម បានបង្ហាញជំនឿចិត្តថា នឹងមានការបញ្ជាទិញ និងនាំចេញកាន់តែច្រើនបន្ថែមទៀត និងបានស្នើឱ្យក្រសួង-ស្ថាប័ន និងដៃគូពាក់ព័ន្ធបន្តពួតដៃគ្នាក្នុងការជំរុញ និងអភិវឌ្ឍវិស័យអង្ករ ព្រមទាំងកេរ្តិ៍ឈ្មោះ​អង្ករកម្ពុជាលើឆាកអន្តរជាតិផងដែរ៕