បរទេស ​៖ យោងតាមប្រភព័ត៌មានពីរ៉យទ័របានរាយការណ៍ថា គ្រោះទឹកជំនន់បានបង្កការខូចខាតដល់សដដ្ឋកិច្ចប្រទេសអេស្ប៉ាញរាប់ពាន់លានដុល្លារ និងបង្កការរាំងស្ទះដល់វិស័យជាច្រើន។

ការខូចខាតពីគ្រោះទឹកជំនន់អាចកើនឡើងជាង ១០ ពាន់លានអឺរ៉ូ ជាមួយនឹងប្រាក់កម្ចីពីធនាគារប្រហែល ២០ ពាន់លានអឺរ៉ូ (២១,៨២ ពាន់លានដុល្លារ)។

កាល​ពី​ថ្ងៃ​អង្គារកន្លងទៅនេះ រដ្ឋាភិបាល​បាន​ផ្តល់​ថវិកា​ប្រមាណ ១០,៦ ពាន់​លាន​អឺរ៉ូ​ដើម្បី​ជួយ​ជន​រងគ្រោះ​ដោយសារ​ទឹក​ជំនន់​ដ៏​អាក្រក់​បំផុត​ ខណៈដែលមានមនុស្ស ២១៧ នាក់បានស្លាប់ ដោយរដ្ឋាភិបាលអេស្ប៉ាញបានប្រកាសកាន់ទុក្ខជាតិរយៈពេល៣ថ្ងៃ។ មិនត្រឹមតែប៉ុណ្ណោះ ប្រាក់កម្ចីរបស់ធនាគារអេស្ប៉ាញបានផ្តល់ទៅកាន់តំបន់ដែលរងផលប៉ះពាល់ខ្លាំងបំផុតប្រមាណ ៧ពាន់លានអឺរ៉ូ សម្រាប់បណ្តាក្រុមហ៊ុន អាជីវកម្ម និងប្រមាណ ១៣ពាន់លានអែរ៉ូសម្រាប់កម្ចីគ្រួសារ។

ទន្ទឹមនឹងនេះ គ្រោះទឹកជំនន់បានបង្កផលប៉ះពាល់ធ្ងន់ធ្ងរនៅតំបន់ Valencia ជាងតំបន់ផ្សេងទៀតក្នុងប្រទេសអេស៉្បាញ ដែលប៉ះពាល់ដល់សេដ្ឋកិច្ច និងវិស័យជាច្រើន។ Valencia ត្រូវបានគេស្គាល់ថាសំបូរដំណាំបន្លែ ផ្លែឈើ ក្រូចឆ្មារ និងវាលស្រែ ហើយទឹកជំនន់បានបំផ្លាញដំណាំ និងកាត់បន្ថយទិន្នផលដែលនាំឱ្យកសិករខាតបង់។ វាបង្កផលប៉ះពាល់ទាំងសេដ្ឋកិច្ចក្នុងស្រុក និងចំណូលពីការនាំចេញ ដោយសារប្រទេសអេស្ប៉ាញគឺជាប្រទេសនាំចេញក្រូចឆ្មារធំជាងគេមួយនៅអឺរ៉ុប។ លើសពីនេះ អេស្ប៉ាញគឺជាគោលដៅទេសចរណ៍ដ៏ពេញនិយម ប៉ុន្តែទឹកជំនន់អាចរំខានដល់លំហូរភ្ញៀវទេសចរណ៍ និងបំផ្លិចបំផ្លាញហេដ្ឋារចនាសម្ព័ន្ធ។ ដូច្នោះហើយ អាជីវកម្ម និងសេវាកម្មក្នុងស្រុកដូចជា សណ្ឋាគារ ភោជនីយដ្ឋាន និងហាង ដែលពឹងផ្អែកខ្លាំងលើប្រាក់ចំណូលទេសចរណ៍តាមរដូវកាលត្រូវបង្ខំចិត្តបិទទ្វារ។ ជាងនេះទៀត រដ្ឋាភិបាលត្រូវចំណាយលុយច្រើនជួសជុលហេដ្ឋារចនាសម្ព័ន្ធ ដែលធ្វើឱ្យបង្កើនការចំណាយសាធារណៈ និងពន្យារពេលលើគម្រោងហេដ្ឋារចនាសម្ព័ន្ធផ្សេងទៀតដែលបានគ្រោងទុក។

លើសពីនេះ ម្ចាស់ផ្ទះ និងអាជីវកម្មប្រឈមមុខនឹងការខូចខាតទ្រព្យសម្បត្តិ ដែលបង្កើនការទាមទារផលប្រយោជន៍ពីធានារ៉ាប់រង និងការទូទាត់សង ហើយបញ្ហានេះជះឥទ្ធិពលដល់វិស័យធានារ៉ាប់រងកាន់តែខ្លាំង។ ក្រៅពីនេះ គ្រោះទឹកជំនន់បង្កការរំខានដល់ការដឹកជញ្ជូន និងខ្សែសង្វាក់ផ្គត់ផ្គង់ ដែលប៉ះពាល់ដល់អាជីវកម្មដែលពឹងផ្អែកលើការដឹកជញ្ជូនទំនិញ។ ជាលទ្ធផល ពួកគេត្រូវពន្យារពេលដឹកជញ្ជូន បង្កើនការចំណាយ និងការថយចុះផលិតភាព ដែលប៉ះពាល់ដល់ទាំងអាជីវកម្មក្នុងស្រុក និងពាណិជ្ជកម្មអន្តរជាតិ។

លោក Jose Vicente Morata ប្រធានផ្នែកពាណិជ្ជកម្មនៅតំបន់ Valencia បានលើកឡើងថា ការខូចខាតដល់អាជីវកម្មនៅក្នុងតំបន់ដែលរងផលប៉ះពាល់កើនឡើងជាបណ្តោះអាសន្នលើសពី ១០ ពាន់លានអឺរ៉ូ (១០,៧៨ លានដុល្លារអាម៉េរិក)។ យ៉ាងណាមិញ គេមិនទាន់បានវាយតម្លៃផលប៉ះពាល់សេដ្ឋកិច្ចពិតប្រាកដពីទឹកជំនន់នោះទេ ប៉ុន្តែការបំផ្លិចបំផ្លាញដល់សេដ្ឋកិច្ចគឺខ្លាំងជាងអំឡុងពេលមានការរាតត្បាត។ ទន្ទឹមនឹងនេះ ហានិភ័យអាកាសធាតុកំពុងកើតឡើងលឿនជាងការរំពឹងទុក។

លោក Mirenchu ​​del Valle ប្រធានសមាគមធានារ៉ាប់រង UNESPA របស់ប្រទេសអេស្ប៉ាញបាននិយាយថា ទឹកជំនន់នៅតំបន់ Valencia គឺជាព្រឹត្តិការណ៍ដែលបង្កការខូចខាតដ៏ធំបំផុតរបស់អេស្ប៉ាញសម្រាប់ព្រឹត្តិការណ៍អាកាសធាតុ ដែលខ្លាំងជាងព្រឹត្តិការណ៍ទឹកជំនន់បានកើតឡើងនៅទីក្រុង Bilbao ក្នុងឆ្នាំ១៩៨៣នោះទៅទៀត ៕