ភ្នំពេញ ៖ ព្រឹត្តិការណ៍សហគ្រិនស្ត្រីឆ្នើមអាស៊ានឆ្នាំ២០២៤ គឺជាកាលានុវត្តភាពដ៏សំខាន់សម្រាប់ការផ្ដល់សិទ្ធិអំណាចដល់សហគ្រិនស្ត្រី និងឆ្លុះបញ្ចាំងឱ្យឃើញពីការរួមចំណែក និងសក្ដានុពលដ៏ធំធេងរបស់ស្ត្រីក្នុងការអភិវឌ្ឍសហគមន៍ធុរកិច្ច និងកំណើនសេដ្ឋកិច្ចនៅកម្ពុជា ក៏ដូចជានៅក្នុងតំបន់អាស៊ានទាំងមូល ។ នេះ ជាការលើកឡើងរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាឱកាសអញ្ជើញជាអធិបតីភាពក្នុងពិធីបើកវេទិកាសហគ្រិនស្ត្រីឆ្នើមអាស៊ានឆ្នាំ២០២៤ នាព្រឹកថ្ងៃទី១ ខែសីហា ឆ្នាំ២០២៤ នៅសណ្ឋាគារ សូហ្វីតែលភ្នំពេញ រាជធានីភ្នំពេញ។

សម្តេចធិបតីបានលើកឡើងទៀតថា ៖ រាជរដ្ឋាភិបាល នឹងបន្តវិនិយោគលើការអប់រំស្ត្រី និងផ្ដល់លទ្ធភាពទទួលបានហិរញ្ញវត្ថុ ការបង្ហាត់បង្រៀន ព្រមទាំងជម្នះគ្រប់ឧបសគ្គ ដែលបន្ទច់បង្អាក់ដំណើរវិនិយោគ។ រដ្ឋាភិបាលនឹងបន្តបណ្តុះវប្បធម៌អបអរសាទរសមិទ្ធផលរបស់ស្ត្រី, លើកទឹកចិត្តស្ដី្រឱ្យចូលរួមក្នុងគ្រប់ទិដ្ឋភាពនៃជីវិត, និងធានាថាសំឡេងរបស់ស្ត្រី ត្រូវបានស្តាប់ឮ ហើយការរួមចំណែករបស់ស្ត្រីត្រូវបានឱ្យតម្លៃ ។

សម្តេចធិបតី បានបញ្ជាក់ថា៖

«រដ្ឋាភិបាលអាស៊ាន រួមទាំងកម្ពុជា ទទួលស្គាល់បញ្ហាប្រឈមរបស់សហគ្រិនស្ត្រី និងយល់ពីតួនាទីដ៏សំខាន់របស់ ស្ត្រីក្នុងការសម្រេចបាននូវសមភាពយេនឌ័រ និងកំណើនសេដ្ឋកិច្ច ។ ក្នុងន័យនេះ, យើង បាន និងកំពុងធ្វើការយ៉ាងសកម្ម ក្នុងការយកឈ្នះលើឧបសគ្គទាំងនេះ ជាក់ស្ដែង, ការបង្កើត AWEN និង CamWEN ក៏ដូចជាការរៀបចំព្រឹត្តិការណ៍ ក្នុងថ្ងៃនេះ គឺជាបង្ហាញពីការប្តេជ្ញាចិត្ត របស់យើង ក្នុងការផ្តល់សិទ្ធិអំណាចដល់ស្ត្រី ទាំងផ្នែកសង្គម និងសេដ្ឋកិច្ច ។ កម្ពុជា តែងទទួលស្គាល់តួនាទីដែលមិនអាចខ្វះបានរបស់ស្ត្រី ក្នុងសង្គម និងសេដ្ឋកិច្ច»។

សម្តេចធិបតី ហ៊ុន ម៉ាណែត បានថ្លែងបញ្ជាក់ទៀតថា៖

« ការចូលរួមកាន់តែសកម្មរបស់ស្ត្រីនៅក្នុងសកម្មភាពសេដ្ឋកិច្ច តំបន់ និងអន្តរជាតិ មិនត្រឹមតែអាចជំរុញការអភិវឌ្ឍសហគ្រាសរបស់ពួកគេប៉ុណ្ណោះទ ប៉ុន្តែថែមទាំងរួមចំណែកដល់ការពង្រឹងភាពធន់ និងចីរភាពនៃសេដ្ឋកិច្ច ក្នុងសហគមន៍ និង ប្រទេសជាតិទាំងមូលផងដែរ» ។

សូមជំរាបថា ដើម្បីដោះស្រាយបញ្ហាភាពមានកម្រិតនៃការទទួលបានហិរញ្ញប្បទានរាជរដ្ឋាភិបាល បានអនុវត្តគំនិតផ្តួចផ្តើមហិរញ្ញវត្ថុមួយចំនួន ដើម្បីគាំទ្រដល់សហគ្រិនស្ត្រី ដូចជា : ការដាក់ឱ្យ ដំណើរការ គម្រោងហិរញ្ញប្បទានសហគ្រិនស្ត្រី តាមរយៈធនាគារសហគ្រាសធុនតូច និង មធ្យមកម្ពុជា (SME Bank) ដើម្បីផ្តល់ហិរញ្ញប្បទានដែលមានលក្ខខណ្ឌអនុគ្រោះ, និងការដាក់ឱ្យប្រើប្រាស់ គម្រោងធានាឥណទានសម្រាប់សហគ្រិនស្ត្រី តាមរយៈសាជីវកម្មធានា ឥណទានកម្ពុជា (CGCC) ដើម្បីផ្ដល់ការធានាឥណទានជាមួយនឹងលក្ខខណ្ឌអំណោយផលសំដៅជំរុញឱ្យស្ថាប័នផ្តល់ឥណទាន គាំទ្រដល់អាជីវកម្ម ដែលគ្រប់គ្រងដោយស្ត្រី ។ បន្ថែម លើនេះ, ដើម្បីដឹកនាំការអនុវត្តការផ្តល់សិទ្ធិអំណាចដល់ស្ត្រី, រាជរដ្ឋាភិបាល បានដាក់ចេញនូវ ផែនការ នារីរតនៈទី ៦ : ផែនការយុទ្ធសាស្ត្រ ដើម្បីលើកកម្ពស់សមភាពយេនឌ័រ និងការបង្កើនភាពអង់អាចដល់ស្ត្រី និងក្មេងស្រី ផែនការយុទ្ធសាស្ត្រក្នុងដំណាក់កាលនីមួយៗ ត្រូវបានរៀបចំឡើង ដោយឈរលើវឌ្ឍនភាពនៃផែនការយុទ្ធសាស្ត្រលើកមុនៗ និងស្របតាមច្បាប់, គោលនយោ​បាយជាតិ, ការកែទម្រង់របស់រាជរដ្ឋាភិបាល និងរបៀបវារៈឆ្នាំ ២០៣០ សម្រាប់គោលដៅអភិវឌ្ឍន៍ប្រកបដោយចីរភាព ឈរលើគោលការណ៍មិនបោះបង់ពលរដ្ឋណាម្នាក់។

វេទិកាសហគ្រិន និងពានរង្វាន់សហគ្រិនអាស៊ាន (Pinnacle Entrepreneur Forum & 2024 AWEN Awards ) ក្រោមប្រធានបទ «អាស៊ាន,យើងតែមួយASEAN,We’re One» សហការរៀបចំដោយបណ្តាញ សហគ្រិនស្ត្រីកម្ពុជា(Cam​W​e​n​) និងបណ្តាញសហគ្រិនស្ត្រីអាស៊ាន(AWEN) ។ ជាវេទិកាកំពូលមួយដែលនឹងជួយជំរុញការអភិឌ្ឍសមត្ថភាព និងជំរុញអាជីវកម្ម ជាពិសេសអាជីវកម្មដែលដឹកនាំដោយស្ត្រីឱ្យកាន់តែប្រសើរឡើង។សហគ្រិនប្រមាណជាង៤០០នាក់មកពីបណ្តាប្រទេសអាស៊ាន និងបណ្តាប្រទេសជាច្រើនទៀត បានចូលរួមក្នុងវេទិកាដ៏សំខាន់ និងជាប្រវត្តិសាស្ត្រនៅលើទឹកដីព្រះរាជាណាចក្រកម្ពុជា។

លោកជំទាវឧកញ៉ា ស្រ៊ៀត មុំ សុភា ទីប្រឹក្សាភិបាលបណ្តាញសហគ្រិនស្ត្រីកម្ពុជាប្រចាំថ្នាក់តំបន់អាស៊ាន និងជាប្រធានគណៈកម្មាធិការរៀបចំព្រឹត្តិការណ៍-វេទិកាសហគ្រិន និងពានរង្វាន់សហគ្រិនអាស៊ានឆ្នាំ២០២៤ បានថ្លែងថា ៖ កម្មវិធីនេះត្រូវបានបង្កើតឡើងក្នុងគោលបំណងតំណាងឱ្យស្ត្រីនៅក្នុងវិស័យសេដ្ឋកិច្ចទាំងអស់នៅក្នុងរដ្ឋជាសមាជិកអាស៊ាន ដោយផ្ដោតទៅលើ ៖ការបង្កើតវេទិកាក្នុងតំបន់ ,ការគាំទ្រ សហគ្រិនស្ត្រីអាស៊ានឱ្យមានលទ្ធភាពទទួលបានហិរញ្ញវត្ថុកាន់តែប្រសើរឡើង,ផ្តល់ឱកាសឲ្យសហគ្រិនបង្កើតបណ្ដាញសហគមន៍យ៉ាងរឹងមាំមួយ,បង្កើតមូលនិធិសម្រាប់គំនិតអាជីវកម្មច្នៃប្រឌិតនានាឱ្យទទួលបានជោគជ័យ។

លោកជំទាវឧកញ៉ា បានមានប្រសាសន៍ថា៖

«ការធ្វើជាម្ចាស់ផ្ទះសម្រាប់ព្រឹត្តិការណ៍អន្តរជាតិមួយនេះពិតជាមានសារសំខាន់ណាស់សម្រាប់ទាំងមុខមាត់ប្រទេសជាតិ និងសម្រាប់ការទាក់ទាញប្រយោជន៍ជូនជនរួមជាតិទាំងមូល។ រឹតតែពិសេសសម្រាប់អ្វីដែលពួកយើងកំពុងធ្វើដើម្បីរៀបចំឲ្យមានព្រឹត្តិការណ៍ដ៏មហាឡាឫកមួយកើតមានឡើងក្នុងប្រទេសកម្ពុជាយើង ជាពិសេសក្នុងកាលៈទេសៈដ៏លំបាកមួយនេះ»។

លោកជំទាវបណ្ឌិត អេង លីគង់ ជាប្រធានបណ្តាញសហគ្រិនស្ត្រីអាស៊ាន (AWEN) និង បណ្តាញសហគ្រិនស្ត្រីកម្ពុជា (Cam​WEN) បានថ្លែងថា៖បេសកកម្មរបស់បណ្ដាញសហគ្រិនស្រ្តី អាស៊ាន (AWEN) គឺដើម្បីបង្កើតបរិយាកាសគាំទ្រ និងការរួមបញ្ចូលអាជីវកម្មដែលដឹកនាំដោយស្ត្រីឆ្ពោះទៅកាន់ភាពរីកចម្រើន។ ជាមួយគ្នានេះ បណ្តាញសហគ្រិនស្ត្រីកម្ពុជា (CamWEN)​មានគោលដៅជំរុញភាពរស់រវើកនៅក្នុងប្រព័ន្ធអេកូឡូស៊ីសហគ្រិននៅកម្ពុជា។ ព្រឹត្តិការណ៍នេះផ្តល់អត្ថប្រយោជន៍ដល់សហគ្រិនស្ត្រីទាំងអស់នៅទូទាំងអាស៊ីអាគ្នេយ៍ជាពិសេសប្រទេសកម្ពុជា។

​លោកជំទាវ បានបញ្ជាក់ថា ៖ តាមរយៈព្រឹត្តិការណ៍នេះសរបញ្ជាក់ឲ្យកាន់តែឃើញច្បាស់ថា ស្ត្រីដើរតួនាទីយ៉ាងសំខាន់នៅក្នុងការអភិវឌ្ឍជាតិ និងពិភពលោកទាំងមូល ហើយនារីពិតជាមាននូវសមត្ថភាព និងលទ្ធភាពយ៉ាងពេញលេញនៅក្នុងកិច្ចការនេះ៕