ភ្នំពេញ ៖ កម្ពុជាបាននាំចេញគ្រាប់ស្វាយចន្ទីឆៅជាង ​៦០ម៉ឺនតោន ទៅកាន់ប្រទេសវៀតណាម ​ទទួលបានទឹកប្រាក់​ប្រមាណ ៨២០លានដុល្លារ រយៈពេល ៨ខែឆ្នាំ២០២៣នេះ ដែលចំនួននេះថយចុះជិត ១៦% បើធៀបនឹងរយៈពេលដូចគ្នាកាលពីឆ្នាំ២០២២។ ​នេះបើយោងតាមទិន្នន័យពីសមាគមស្វាយចន្ទីកម្ពុជា ។

​លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងថា មូលហេតុដែលនាំឱ្យការនាំចេញស្វាយចន្ទីធ្លាក់ចុះនេះ គឺបណ្តាលមកពីកត្តាទី១- ការប្រែប្រួលអាកាសធាតុ ដែលធ្វើឱ្យទិន្នផលស្វាយចន្ទីធ្លាក់ចុះ ខណៈដែលនៅឆ្នាំនេះផលិតបានប្រមាណត្រឹមជាង ៦៣ម៉ឺន ៤ពាន់តោនប៉ុណ្ណោះ។ កត្តាទី២- កសិករ បានកាប់ដើមស្វាយចន្ទីចោលមួយចំនួន និងកត្តាមួយទៀត ការប្រកួតទិញពីសហគ្រាសក្នុងស្រុកសម្រាប់ស្តុកទុកច្នៃ ដើម្បីផ្គត់ផ្គង់ក្នុងស្រុក និងនាំចេញ ។

លោកប្រធានសមាគមបានបន្តថា ទោះបីបរិមាណនាំចេញគ្រាប់ស្វាយចន្ទីមានការធ្លាក់ចុះក្តី ប៉ុន្តែតម្លៃគ្រាប់ស្វាយចន្ទីនៅក្នុងខែសីហា និងខែកញ្ញានេះ​ ​ប្រសើរជាងឆ្នាំមុន ​ដែលអាចលក់បានក្នុងតម្លៃចន្លោះពី ៧០០០រៀលទៅ ៧​៥០០រយរៀលក្នុងមួយគីឡូក្រាម ​ឬប្រមាណ ១៩០០ដុល្លារក្នុង១តោន។

តែយ៉ាងនេះក្តី លោកលើកឡើងថា កសិករមួយចំនួនប៉ុណ្ណោះ​ ដែលអាចទទួលបានការចំណេញពីការឡើងថ្លៃគ្រាប់ស្វាយចន្ទីនៅឆ្នាំនេះ ព្រោះកសិករភាគច្រើន ដែលគ្មានលទ្ធភាពហាលស្តុកទុក បានលក់ចេញតាំងពីដើមឆ្នាំក្នុងអំឡុងខែ​មីនា និងមេសា ដែលមានតម្លៃត្រឹមតែ ៥០០០រៀល ទៅ៦០០០រៀលក្នុងមួយគីឡូក្រាមប៉ុណ្ណោះ។

លោក អួន ស៊ីឡុត បានមានប្រសាសន៍ថា ៖

 «ដោយសារតែកសិករភាគច្រើន គាត់មិនមានហេដ្ឋារចនាសម្ព័ន្ធនៃការទុកដាក់ស្វាយចន្ទី ដូចជា រានហាល និងឃ្លាំងស្តុក អីចឹងភាគច្រើនគាត់បានលក់ ក្នុងអំឡុងខែមីនា និងមេសា ដែលគាត់លក់ចេញរហូតដល់ជាង ២៣ម៉ឺនតោន ក្នុងតម្លៃទាប»។

លោកប្រធានសមាគមស្វាយចន្ទីកម្ពុជាបានបញ្ជាក់ថា មានកសិករតិចតួចទេ ដែលគាត់មានឃ្លាំង និងរានហាល ហើយអាចទុកលក់រហូតដល់ខែសីហា និងខែកញ្ញានេះ។ សមាគមស្វាយចន្ទីកម្ពុជា បានប្រាប់កសិករតាំងពីខែមីនា ឆ្នាំ២០២៣មកថា តម្លៃនឹងកើនឡើងនៅខែសីហា និងកញ្ញា តែយ៉ាងណាកសិករភាគច្រើនបានលក់ចេញរួចហើយ។

តាមទិន្នន័យពីសមាគមស្វាយចន្ទីកម្ពុជា បច្ចុប្បន្ន​ផ្ទៃដីដាំដុះគ្រាប់ស្វាយចន្ទីសរុបជាង ៧០ម៉ឺនហិកតា​។ កាលពីឆ្នាំ២០២១ ផលិតកម្មគ្រាប់ស្វាយចន្ទីឆៅ នៅលើពិភពលោកមានប្រមាណ ៥លានតោន ក្នុងនោះកម្ពុជាផលិត​បាន ១ ១៨០ ០០០ តោន ស្មើនឹង២៤%នៃការផលិតសរុប ដែលធ្វើឱ្យកម្ពុជាជាប់លេខ១ ក្នុងការផលិតគ្រាប់ស្វាយចន្ទីបានច្រើនជាងគេនៅលើពិភពលោក។ ចំណែកនៅឆ្នាំ២០២២ កម្ពុជាផលិតបាន ៦៩ម៉ឺនតោន ជាប់លេខពីរនៅលើពិភពលោក​។

កាលពីថ្ងៃទី១៣ ខែមករា ឆ្នាំ២០២៣ កន្លងទៅថ្មីៗនេះ គោលនយោបាយជាតិ ស្តីពីស្វាយចន្ទីឆ្នាំ២០២២-២០២៧ ត្រូវបានគណៈរដ្ឋមន្ត្រីអនុម័តទាំងស្រុង ហើយដើម្បីសម្រេចបានចក្ខុវិស័យ និងគោលបំណងខាងលើ គោលនយោបាយជាតិស្តីពីស្វាយចន្ទី រាជរដ្ឋាភិបាលបានដាក់ចេញនូវគោលដៅចម្បងចំនួន៣ ទី១៖ លើកកម្ពស់ទិន្នផលនៃការផលិត និងផលិតកម្ម ប្រកបដោយគុណភាពប្រកួតប្រជែងសម្រាប់បម្រើទីផ្សារក្នុងស្រុក តំបន់ និងពិភពលោក, ទី២៖ ជំរុញការធ្វើឧស្សាហូបនីយកម្ម ដើម្បីបង្កើនតម្លៃបន្ថែមលើការប្រមូលផល និងការកែច្នៃអនុផលស្វាយចន្ទីឱ្យសម្រេចបាន ២៥% នៅឆ្នាំ២០២៧ និងយ៉ាងតិច ៥០% នៅឆ្នាំ២០៣២ និងទី៣៖ ជំរុញការនាំចេញ តាមរយៈការធ្វើពិពិធកម្មទីផ្សារ ការផ្សារភ្ជាប់អន្តរវិស័យក្នុងការនាំចេញ កិច្ចសម្រួលពាណិជ្ជកម្ម ការកាត់បន្ថយថ្លៃដើម និងការលើកកម្ពស់ឧត្តមភាពលើទីផ្សារ។

សូមបញ្ជាក់ថា ស្វាយចន្ទីជាដំណាំឧហ្សាកម្ម ដែលមានសារៈសំខាន់សម្រាប់កំណើនសេដ្ឋកិច្ចជាតិ។ បច្ចុប្បន្ន ស្វាយចន្ទីជាប់ចំណាត់ថ្នាក់លេខ៣ ជាកសិផលនាំចេញទៅក្រៅប្រទេសច្រើនជាងគេ បន្ទាប់ពីដំណាំស្រូវ និងដំណាំដំឡូងមី៕