ភ្នំពេញ ៖ កិច្ចប្រជុំស្តីពីបញ្ហាទីផ្សារសត្វ សាច់សត្វចិញ្ចឹមក្នុងស្រុក និងផលិតផលសត្វនៅកម្ពុជា ត្រូវបានកោះអញ្ជើញឱ្យចូលរួមពីភាគីពាក់ព័ន្ធជាច្រើន ដើម្បីស្វែងយល់ពីស្ថានភាពពិតប្រាកដ និងគោលជំហររបស់ភាគីពាក់ព័ន្ធទាំងអស់ រួមមានអ្នកចិញ្ចឹមសត្វ អ្នកនាំចូល កុងស៊ី ឬអ្នកកាប់ អ្នកចែកចាយ និងអ្នកលក់ ដើម្បីឈានទៅដោះស្រាយបញ្ហាទីផ្សារសាច់សត្វជាប្រយោជន៍រួម។

កិច្ចប្រជុំនេះបានធ្វើឡើងនៅទីស្តីការក្រសួងកសិកម្ម រុក្ខាប្រមាញ់ និងនេសាទកាលពីថ្ងៃចុងសប្ដាហ៍កន្លងទៅនេះ ក្រោមអធិបតីភាព ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។

ឯកឧត្តម ឌិត ទីណា បានបញ្ជាក់ថា ក្រសួងនឹងចាត់ចែងឱ្យមានការសិក្សាទីផ្សារគ្រប់ជ្រុងជ្រោយ ដើម្បីវាយតម្លៃឱ្យបានច្បាស់លាស់ពីស្ថានភាព តម្រូវការ និងការផ្គត់ផ្គង់សត្វ ក្នុងខ្សែច្រវាក់ផលិតកម្ម និងតម្លៃ ដើម្បីដោះស្រា​យ និងគ្រប់គ្រងបញ្ហានេះឱ្យបានល្អប្រសើរ និងដើម្បីផលចំណេញទាំងអស់គ្នា ក៏ដូចជាសុខុមាលភាពសម្រាប់អ្នកបរិភោគ។

ឯកឧត្តមរដ្ឋមន្ត្រី បានចាត់តាំង ឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ ដឹកនាំកិច្ចប្រជុំបន្ទាន់ជាមួយក្រុមការងារជំនាញ និងភាគីពាក់ព័ន្ធ ស្តីពីតម្រូវការ និងការផ្គត់ផ្គង់សត្វ ការធ្វើបំណែកសាច់តាមប្រភេទ និងស្តង់ដាគុណភាព ដើម្បីទទួលបានតម្លៃបន្ថែម និងធានាស្ថិរភាពតម្លៃទីផ្សារល្អ និងធានាផលចំណេញសមរម្យ សម្រាប់អ្នកផលិត អ្នកចែកចាយ និងអ្នកបរិភោគ។

សូមបញ្ជាក់ថា តាមរយៈកិច្ចប្រជុំនេះ ធ្វើឡើងស្វែងយល់ពីស្ថានភាពពិតប្រាកដ និងគោលជំហររបស់ភាគីពាក់ព័ន្ធទាំងអស់ កំពុងស្ថិតនៅក្នុងស្ថានភាពមួយ ដែលកំពុងប្រយុទ្ធនឹងសាច់បង្កកខុសច្បាប់ ដែលក្លាយជាភាពស្មុគស្មាញយ៉ាងខ្លាំងចំពោះអ្នកពាក់ព័ន្ធ ព្រោះជនមិនសុចរិតមួយចំនួនលួចលាក់នាំចូលដោយគ្មានការត្រួតពិនិត្យ និងបានធ្វើឱ្យវិស័យចិញ្ចឹមសត្វក្នុងស្រុកដួលរលំជាបន្តបន្ទាប់ ហើយក៏ត្រូវបានគេគិត និងបារម្ភដែរថា វាកំពុងគំរាមកំហែងយ៉ាងខ្លាំង ចំពោះសុខភាពសាធារណៈ ពីព្រោះត្រូវបានគេជឿជាក់ថា សាច់បង្កកខុសច្បាប់ទាំងនោះ គឺជាសាច់ខូចគុណភាព ហួសកាលបរិច្ឆេទបរិភោគ ឬជាសាច់សត្វមានជំងឺដែលត្រូវគេកម្ទេចចោល ហេតុនេះពួកគេនាំយកមកលក់ថោកៗជាងថ្លៃដើមផលិតក្នុងស្រុក។ 

លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានសាទរចំពោះលទ្ធផលដ៏ល្អនៃកិច្ចប្រជុំនេះដែរ ដោយអ្នកពាក់ព័ន្ធចង់ឱ្យមានការដោះស្រាយនូវតម្លៃថ្លៃដើមសាច់សត្វក្នុងស្រុក ដើម្បីអាចឱ្យគាត់មានលទ្ធភាពក្នុងការចិញ្ចឹមបន្ត ឱ្យបានជាប្រយោជន៍ដល់វិស័យចិញ្ចឹមសត្វរបស់យើង។

លោក ស្រ៊ុន ពៅ ក៏បានបញ្ជាក់ពីតម្លៃទីផ្សារសាច់ជ្រូករស់បច្ចុប្បន្ន ១គីឡូក្រាម នៅត្រឹម៦០០០ រៀល ការដែលឈ្មួញដឹកយកជ្រូករស់ពីអ្នកចិញ្ចឹមទៅដាក់នៅកុងស៊ី ហើយកុងស៊ីបានចេញវិញ្ញាបនបត្របញ្ជាក់បន្ទាប់ពីពុះជ្រូកនោះជាពីរ និងវះយកគ្រឿងក្នុង និងកាត់ក្បាលបោះត្រារួច ។ ជ្រូកនោះត្រូវបានដាក់តម្លៃក្នុងមួយគីឡូ៩០០០ រៀល ហើយបញ្ចេញទៅអ្នកទទួលសម្រាប់យកទៅចែកចាយ ដែលគេបានព្រលះ ប្រភេទសាច់ និងឆ្អឹងដោយតម្លៃផ្សេងគ្នា។

តាមរបាយការណ៍សមាគមអ្នកចិញ្ចឹមសត្វនៅកម្ពុជាបានឱ្យដឹងថា ការលក់រាយសាច់ជ្រូកមានតម្លៃខុសគ្នាអាស្រ័យទៅតាមតំបន់។ ចំពោះតម្លៃសាច់ជ្រូក ដែលយកពីកុងស៊ី គឺសមាគមលក់សាច់ជ្រូក(ពុះជាពីរចំហៀង) តម្លៃ ១ ២០០០រៀល  ក្នុង១គីឡូក្រាម ដែលតម្លៃនេះ គឺសមាគមស្នើសុំត្រឹមថ្លៃដើមផលិត ។

ចំពោះតម្លៃសាច់សុទ្ធខ្លះលក់នៅទីផ្សារបានត្រឹមតែ ១៨ ០០០រៀលប៉ុណ្ណោះក្នុង១គីឡូក្រាម តែទីតាំងខ្លអអាចលក់បានតម្លៃដល់ ២១០០០រៀល សម្រាប់​ទីផ្សារធំៗ ។

លោក ស្រ៊ុន ពៅ បានបញ្ជាក់ថាឱ្យដឹងថា ​៖

« កិច្ចប្រជុំបន្ទាប់ជាមួយឯកឧត្តម ប្រតិភូរាជរដ្ឋាភិបាល សមាគមបានសំណូមពរទៅនាយកដ្ឋានសុខភាពសត្វ និងផលិតកម្មសត្វ ឱ្យជួយធ្វើយ៉ាងណាឱ្យអ្នកចិញ្ចឹមរួចថ្លៃដើមសិន។ នៅក្នុងជំហានដំបូងនេះ សុំតែថ្លៃដើមសិនទេ ព្រោះបើនៅបន្តតែបែបនេះ នឹងដួលរលំអស់ហើយសម្រាប់អ្នកចិញ្ចឹម។ ដូច្នេះការសុំថ្លៃដើមសិននេះ​ ដើម្បីយោងអាត្មាអាចបន្តរស់»។

លោក ស្រ៊ុន ពៅ ក៏បានឱ្យដឹងដែរថា ចំណែកខាងអ្នកមានទូក្លាស្សេ ក៏ចង់ឱ្យសមាគមអ្នកចិញ្ចឹមចេញពីតម្លៃណាមួយនៃសាច់បង្កក ដើម្បីឱ្យគេជួយយកសាច់បង្កកទៅបង្កកសម្រាប់លក់ដោះស្រាយភាពរាំងស្ទះ ។ តែទាំងអស់នេះនឹងមានការជួបប្រជុំគ្នានៅសប្តាហ៍ក្រោយ ដើម្បីសម្រេចឈានទៅដោះស្រាយបញ្ហាទីផ្សារសាច់សត្វ៕