សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេល១០ខែ ឆ្នាំ២០២៣ ផលិតកម្មស្វាយចន្ទីកម្ពុជាសម្រេចបាន ៦៥១ ០០០ តោន ក្នុងនោះ ៦១៥ ០០០ តោន ស្មើនឹង ៩៤,៥ ភាគរយ ត្រូវបាននាំចេញទៅកាន់ទីផ្សារប្រទេសវៀតណាម ដោយទទួលបានទឹកប្រាក់ប្រមាណ ៨៣១ លានដុល្លារ ធ្លាក់ចុះ ១៦,៧ ភាគរយ បើធៀបនឹងរយៈពេលដូចគ្នាឆ្នាំ ២០២២។
យោងតាមទិន្នន័យសមាគមស្វាយចន្ទីកម្ពុជាបានបង្ហាញថា ផលិតកម្មស្វាយចន្ទី ក្នុងរយៈពេល១០ខែ ឆ្នាំ២០២៣ (ចាប់ពីខែមករា-តុលា ២០២៣) កម្ពុជាផលិតគ្រាប់ស្វាយចន្ទីឆៅ សម្រេចបាន ៦៥១ ០០០ តោន (៦សែន ៥ម៉ឺន ១ពាន់តោន) ក្នុងនោះ ៩៤,៥ ភាគរយ ស្មើនឹង ៦១៥ ០០០ តោន ត្រូវបាននាំចេញទៅលក់នៅវៀតណាម ទទួលបានប្រាក់ ៨៣១ លានដុល្លារ ថយចុះ ១៦,៧ ភាគរយ បើធៀបនឹងពេលដូចគ្នា កាលពីឆ្នាំមុន។
ប្រធានសមាគមស្វាយចន្ទីកម្ពុជា លោក អួន ស៊ីឡុត បានថ្លែងថា កត្តាតម្លៃទីផ្សារអន្តរជាតិចុះទាបក្នុងរយៈពេលប៉ុន្មានឆ្នាំមកនេះ ប៉ុន្តែសម្រាប់ឆ្នាំ២០២៣នេះមានភាពល្អប្រសើរជាងឆ្នាំចាស់បន្តិច។
ទោះយ៉ាងនេះក្តី ការអភិវឌ្ឍលើវិស័យគ្រាប់ស្វាយចន្ទីនេះនៅមានកម្រិត ដោយហេតុថា កម្ពុជាខ្វះហេដ្ឋារចនាសម្ព័ន្ធ ក្រោយការប្រមូលផលធ្វើឱ្យរំហូរគ្រាប់ចន្ទីឆៅចេញទៅក្រៅប្រទេសបណ្តាលឱ្យកសិករបាត់បង់តម្លៃបន្ថែម និងមិនអាចបង្កើតការងារអចិន្ត្រៃយ៍ដល់ពលករក្នុងសហគមន៍។
ជាមួយគ្នានេះ ដើម្បីស្របតាមគោលនយោបាយជាតិស្តីពីស្វាយចន្ទី ឆ្នាំ២០២២ -២០២៧ កម្ពុជាត្រូវការមូលធនសរុបប្រមាណ ៣២៩លានដុល្លារ ក្នុងការអភិវឌ្ឍលើហេដ្ឋារចនាសម្ព័ន្ធ កែច្នៃស្វាយចន្ទី ក្នុងរយៈពេល៥ឆ្នាំ ។ ដោយហេតុថាដំណាំស្វាយចន្ទីបានជួយអភិវឌ្ឍសេដ្ឋកិច្ចជនបទ ដែលមាន ២៥ ០០០គ្រួសារប្រកបរបរដាំដំណាំនេះ។ លើសពីនេះវិស័យកសិកម្មដំណាំចន្ទីអាចបង្កើតការងារតាមរដូវប្រហែលជា ១២០ ០០០នាក់។ នេះបើយោងតាមសមាគមស្វាយចន្ទីកម្ពុជា។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានមានប្រសាសន៍ថា បច្ចុប្បន្នកម្ពុជាមានសហគ្រាសធុនតូចចំនួន៣៩ និងមធ្យមចំនួន៣ប៉ុណ្ណោះ ។ បើចង់ឱ្យមានការកែច្នៃ ២៥% (១៧៥ ០០០ តោន) ក្នុងរយៈពេល៥ឆ្នាំស្របតាមគោលនយោបាយជាតិស្តីពីស្វាយចន្ទី ឆ្នាំ២០២២-២០២៧ កម្ពុជាត្រូវការរោងចក្រខ្នាតមធ្យមចំនួន ៣៥ លើទុនវិនិយោគ ២៦,២៥លានដុល្លារត្រូវការទុនបង្វិល ២៦៥,៥លានដុល្លារ និងហេដ្ឋារចនាសម្ព័ន្ធគ្រប់គ្រងក្រោយប្រមូលផល មានដូចជាឃ្លាំងស្តុកគ្រាប់ ២២,៧៥លានដុល្លារ និងទីលានហាលគ្រាប់ ១៧,៥លានដុល្លារ។
សូមបញ្ជាក់ថា ជាមធ្យមគ្រាប់ស្វាយចន្ទីស្ងួតតម្លៃ ១៦៥៨ដុល្លារ ក្នុង១តោន។ សម្រាប់ខែតុលាគ្រាប់ស្វាយចន្ទីស្ងួតតម្លៃ ៧០០០៛ – ៧៥០០៛ ក្នុង១គីឡូក្រាម ឬ ក្នុងរង្វង់ ១៩០០ដុល្លារ ក្នុង១តោន រីឯគ្រាប់ស្វាយចន្ទីកែច្នៃរួចអាចមានតម្លៃប្រហែល ៨ ០០០ ដុល្លារក្នុង១តោន។
បើតាមទិន្នន័យគយវៀតណាម ប្រទេសកម្ពុជាបានកែច្នៃចន្ទីនាំចេញចំនួន ៥១៦ ១៧០តោន ក្នុងតម្លៃ ២,៩៥ពាន់លានដុល្លារ កើនឡើង ២១,៨% (បរិមាណ) និងកើនឡើង ១៥,៩% (តម្លៃ) នេះមិនទាន់គិតពីការលក់សំបកដើម្បីគៀបប្រេងជីវៈឥន្ធនៈនៅឡើយក្នុងរយៈពេល ១០ខែ ឆ្នាំ២០២៣នេះ។
ក្រៅពីនាំទៅប្រទេសវៀតណាម គ្រាប់ស្វាយចន្ទីឆៅតិចជាង ៥ ភាគរយ ត្រូវបានប្រើប្រាស់សម្រាប់ការកែច្នែក្នុងស្រុក និងក្រោម ១ ភាគរយ ត្រូវបាននាំចេញទៅប្រទេសឥណ្ឌា និងចិន។ នេះបើតាមការបញ្ជាក់របស់លោក អួន ស៊ីឡុត ប្រធានសមាគមស្វាយចន្ទីកម្ពុជា ។
លោក អួន ស៊ីឡុត បានឱ្យដឹងថា នៅកម្ពុជាបច្ចុប្បន្នមានសិប្បកម្មកែច្នៃគ្រាប់ស្វាយចន្ទីធំៗដូចជា សិប្បកម្មជ័យសំបូរ, ក្រុមហ៊ុន Santana Agro Products Co., Ltd និង Handcrafted Cashew nut Stung Treng ហើយផលិតផលគ្រាប់ស្វាយចន្ទីកែច្នៃនៅតាមសិប្បកម្មទាំងនេះ គឺបច្ចុប្បន្នមាននាំចេញទៅប្រទេសជប៉ុន កូរ៉េខាងត្បូង ចិន និងប្រទេសតំបន់អឺរ៉ុបមួយចំនួន ដែលតាមការប៉ាន់ស្មានអាចមាន ៧០០ តោន ក្នុងរយៈពេល ១០ ខែនៃឆ្នាំ ២០២៣។
ក្នុងឆ្នាំ ២០១៩ កម្ពុជានាំចេញគ្រាប់ស្វាយចន្ទីប្រហែល ៦០ ម៉ឺនតោន, ក្នុងឆ្នាំ ២០២០ ចំនួន ៩៥ ម៉ឺនតោន, ឆ្នាំ ២០២១ ចំនួន ១,១ លានតោន (២៤ ភាគរយនៃការនាំចេញសរុបលើពិភពលោក) និងឆ្នាំ ២០២២ ចំនួន ៦៧ ម៉ឺនតោន។ នេះបើតាមទិន្នន័យសមាគមស្វាយចន្ទីកម្ពុជា៕
Account
Security
Favourite Content