សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ របាយការណ៍ក្រសួងពាណិជ្ជកម្ម បានបង្ហាញថា ក្នុងរយៈពេល៨ខែនៃឆ្នាំ២០២៥ កម្ពុជាសម្រេចបានចំណូលប្រមាណ ៦,៦៣ ពាន់លានដុល្លារ ពីការនាំចេញទំនិញទៅបណ្ដាប្រទេសជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) កើនឡើង ៩,៥ ភាគរយបើធៀបនឹងរយៈពេលដូចគ្នាឆ្នាំ២០២៤ ដែលមានទឹកប្រាក់ ៦,០៥ ពាន់លានដុល្លារ។
ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានឱ្យដឹងថា កម្ពុជាព្យាយាមពង្រឹងទីផ្សារចាស់ និងពង្រីកទីផ្សារថ្មី ដោយមិនផ្តោតទៅតែទីផ្សារមួយឡើយ។ ជាមួយគ្នានេះ ស្របពេលកម្ពុជាមានទីផ្សារធំៗ ដូចជា អាម៉េរិក ចិន អឺរ៉ុប កម្ពុជាក៏ព្យាយាមបង្កើតកិច្ចព្រមព្រៀងពាណិជ្ជកម្មសេរីជាមួយប្រទេសមួយចំនួនទៀតផងដែរ។
ឯកឧត្តម រដ្ឋលេខាធិការ បានលើកឡើងថា RCEP ជាកម្លាំងចលករសម្រាប់កំណើនពាណិជ្ជកម្មរបស់កម្ពុជា និងជាមេដែកដើម្បីទាក់ទាញការវិនិយោគផ្ទាល់ពីបរទេសកាន់តែច្រើន ដោយកម្ពុជាកំពុងទទួលបានអត្ថប្រយោជន៍ពីការនាំចេញទៅកាន់បណ្ដាប្រទេសជាសមាជិកដែលកំពុងក្លាយជាកំណើនប្រកបដោយសក្តានុពលថ្មីមួយនៅក្នុងតំបន់។
ឯកឧត្តម ប៉ែន សុវិជាតិ គូសបញ្ជាក់ថា ៖
«ទោះបីជាមានការកើនឡើងនូវការការពារនិយម និងការធ្លាក់ចុះនៃតម្រូវការសកលក៏ដោយ ក៏ RCEP បានផ្តល់ការជំរុញដល់កិច្ចសហប្រតិបត្តិការពាណិជ្ជកម្មក្នុងតំបន់ដោយនាំមកនូវអត្ថប្រយោជន៍ដ៏ច្រើនដល់ប្រទេសសមាជិកទាំងអស់។ ប្រទេសចិនគឺជាទីផ្សារដ៏ធំមួយសម្រាប់កម្ពុជា ជាពិសេសសម្រាប់ផលិតផលកសិកម្មប្រកបដោយសក្តានុពល ហើយអត្ថប្រយោជន៍ដែលកម្ពុជាទទួលបានពីកិច្ចព្រមព្រៀង RCEP រួមមានការអនុគ្រោះពន្ធលើទំនិញផ្សេងៗ ការផ្ទេរបច្ចេកវិទ្យា ការអភិវឌ្ឍជំនាញ និងឱកាសការងារដែលជំរុញដោយការវិនិយោគផ្ទាល់ពីបរទេស(FDI) »។
ទន្ទឹមនឹងនេះ កម្ពុជា នឹងចរចាកិច្ចព្រមព្រៀងសេរីជាមួយប្រទេសអង់គ្លេស និងកាណាដាបន្ថែមទៀត ព្រមទាំងជំរុញការនាំចេញទៅកាន់ប្រទេសក្នុងតំបន់ផ្សេង ពោលគឺ ក្នុងឋានៈកម្ពុជា ជាសមាជិករបស់អង្គការពាណិជ្ជកម្មពិភពលោក ប្រព័ន្ធពាណិជកម្មពហុនិយម គឺជាគោលការណ៍ចម្បងទី១ ដែលកម្ពុជាអនុវត្តហើយ កម្ពុជាក៏ប្រើប្រាស់ប្រព័ន្ធទ្វេភាគី និងពហុភាគី នៅក្រោមក្របខ័ណ្ឌអាស៊ានផងដែរ។
បើតាមរបាយការណ៍ក្រសួងពាណិជ្ជកម្ម ក្នុងខែសីហា ការធ្វើពាណិជ្ជកម្មរវាងកម្ពុជា និងអាស៊ាន សម្រេចបាន ១.២៩ពាន់លានដុល្លារ ថយចុះ០.៣៩%។ ក្នុងនោះកម្ពុជានាំចេញក្នុងតម្លៃ ៤៤៧លានដុល្លារ កើនឡើង៤.៥៦% និងនាំចូលមកវិញក្នុងតម្លៃជាង ៨៤៣ លានដុល្លារ ថយចុះ២.៨៣%។ សូមជម្រាបថា កិច្ចព្រមព្រៀង RCEP បានចូលជាធរមានកាលពីថ្ងៃទី១ ខែមករា ឆ្នាំ២០២២។ កិច្ចព្រមព្រៀងនេះ មានសមាជិកចំនួនប្រទេស១០ មានដូចជា ប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ វៀតណាម និងដៃគូពាណិជ្ជកម្មចំនួន៥ ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់៕
Account
Security
Favourite Content