ភ្នំពេញ៖ មួយរយៈចុងក្រោយនេះគេសង្កេតឃើញថា ចលនាគាំទ្រផលិតផលខ្មែរបានកើនឡើងគួរឱ្យកត់សម្គាល់ ទាំងនៅរាជធានីភ្នំពេញ តាមបណ្តាខេត្ត និងក្រៅប្រទេស។

ក្រោមគម្រោងជំរុញទីផ្សារសម្រាប់កសិកម្មខ្នាតតូច (AIMS)នៃក្រសួងពាណិជ្ជកម្ម មន្ទីរពាណិជ្ជកម្មតាមបណ្តាខេត្ត បានរៀបចំកន្លែងសម្រាប់ដាក់លក់ផលិតផលខ្មែរក្នុងគោលបំណងផ្ដល់ឱកាសទីផ្សារបន្ថែមដល់កសិករ និងផលិតករ អាជីវករខ្នាតតូច។

ក្រសួងពាណិជ្ជកម្មបានឱ្យដឹងថា៖ ផ្សារផលិតផលខ្មែរនេះមានគោលបំណងផ្ដល់ឱកាសទីផ្សារបន្ថែមដល់កសិករ ផលិតករ អាជីវករខ្នាតតូច ជាតំណាងពីក្រុមកសិករផលិត និងជាការតភ្ជាប់ទំនាក់ទំនងទីផ្សារឱ្យកាន់តែប្រសើរដល់ក្រុមដែលជាអ្នកផលិតអាចរកប្រាក់ចំណូល និងលើកកម្ពស់ជីវភាពរស់នៅរបស់ពួកគេ។ ការចូលរួមលើកកម្ពស់ និងប្រើប្រាស់ផលិតផលខ្មែរ ជាការរួមចំណែកបង្កើនផលិតភាពផលិតផលក្នុងស្រុក បង្កើនប្រាក់ចំណូល និងលើកស្ទួយជីវភាពប្រជាជន និងជំរុញអភិវឌ្ឍន៍សេដ្ឋកិច្ច-សង្គមឲ្យកាន់តែប្រសើរឡើង។

នៅខេត្តក្រចេះ មន្ទីរពាណិជ្ជកម្មបានរៀបចំ និងដាក់ឲ្យដំណើរការផ្សារលក់ផលិតផលខ្មែរចាប់តាំងពីឆ្នាំ២០១៩ រហូតមកដល់បច្ចុប្បន្ន។ ផ្សារផលិតផលខ្មែរនៅត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ (គល់ស្ពានសរ ផ្លូវចូលទឹកស្អាត) បាន និងកំពុងដំណើរការលក់កសិផល ផលិតផលខ្មែរ បន្លែ ផ្លែ ឈើ ត្រី សាច់ ជាច្រើនមុខ។

ដោយឡែក ផលិតផលខ្មែរ ដែលដាំដុះដោយកូនខ្មែរ កែច្នៃដោយកូនខែ្មរ ផលិតដោយកូនខ្មែរ បាន និងកំពុងដាក់លក់ក្នុងស្តង់ផ្សារកសិផលខេត្តកំពង់ធំនៅរៀងរាល់ថ្ងៃសុក្រ-សៅរ៍ និងថ្ងៃអាទិត្យ ចាប់ពីម៉ោង ០៦ នាព្រឹក ដល់ម៉ោង៦ល្ងាច។​

ចំណែកផ្សារផលិតផលខ្មែរខេត្តកណ្ដាល បាន និងកំពុងដំណើរការលក់កសិផល ផលិតផលខ្មែរក្នុងស្រុក បន្លែសុវត្ថិភាព ផ្លែឈើ សាច់សត្វ អង្ករ អាហារកែច្នៃនានា ដែលមានទីតាំងនៅច្រមុះជ្រូកសួនច្បារមាត់ទន្លេក្រុងតាខ្មៅ រៀងរាល់ថ្ងៃសៅរ៍-អាទិត្យ ចាប់ពីម៉ោង ៧ព្រឹក -ដល់ម៉ោង១២ថ្ងៃត្រង់។

រីឯស្តង់ផ្សារផលិតផលខ្មែរ នៅខេត្តបាត់ដំបង មានដាក់លក់ផលិតផលខ្មែរជាច្រើនមុខ ដែលសុទ្ធតែផលិតនៅក្នុងស្រុក រៀងរាល់ថ្ងៃសៅរ៍ និងថ្ងៃអាទិត្យ ចាប់ពីម៉ោង ៦:០០ព្រឹក ដល់ ៦:០០ល្ងាច នៅបរិវេណខាងមុខផ្សារទំនើប-បុរីថ្មី (តាមបណ្តោយផ្លូវលេខ៣) ក្រុងបាត់ដំបង ខេត្តបាត់ដំបង។

បន្លែ ផ្លែឈើ អង្ករ និងគ្រឿងទេសជាច្រើនមុខដែលបានដាំដុះ និងកែច្នៃដោយកសិករ និងផលិតករខ្មែរនៅខេត្តត្បូងឃ្មុំ បាន និងកំពុងដាក់លក់ក្នុងស្តង់ផ្សារផលិតផលខ្មែរខេត្តត្បូងឃ្មុំ រៀងរាល់ថ្ងៃសុក្រ-សៅរ៍ ចាប់ពីម៉ោង ៥ព្រឹក ដល់ ១១ថ្ងៃត្រង់ ដែលមានទីតាំងនៅបរិវេណអតីតឃ្លាំងមន្ទីរពាណិជ្ជកម្ម ជាប់របងទីស្នាក់ការគណបក្សប្រជាជនកម្ពុជា ស្ថិតនៅភូមិសួងលិច សង្កាត់សួង ក្រុងសួង ខេត្តត្បូងឃ្មុំ។

ចំពោះផ្សារផលិតផលខ្មែរខេត្តព្រៃវែង នៅមុខមន្ទីរវប្បធម៌ និងវិចិត្រសិល្បៈ ខេត្តព្រៃវែង បានកំពុងដាក់លក់គ្រឿងទេស ឧបករណ៍ប្រើប្រាស់ អាហារកែច្នៃ បន្លែ ផ្លែឈើ ត្រីសាច់ ជាច្រើនមុខ ដែលសុទ្ធតែផលិតនៅក្នុងស្រុក។

ផ្សារផលិតផលខ្មែរខេត្តកំពត បាន និងកំពុងដំណើរការលក់កសិផល ផលិតផលខ្មែរ បន្លែ ផ្លែ ឈើ ត្រី សាច់  ជាច្រើនមុខ ដែលមានទីតាំងនៅបរិវេណអតីតស្ថានីយប្រេងឥន្ធនៈ តូតាល់ ក្បែរបេនឡាននាគព័ន្ធ ភូមិ១​ឧសភា សង្កាត់កំពង់កណ្តាល ក្រុងកំពត ខេត្តកំពតពីម៉ោង ៦ព្រឹក ដល់ ១២ថ្ងៃត្រង់។

ក្រសួងពាណិជ្ជកម្ម បានអំពាវនាវសុំឱ្យមានការចូលរួមគាំទ្រផ្សារផលិផលខ្មែរ ដើម្បីលើកស្ទួយជីវភាពកសិករ និងផលិតករខ្មែរ៕