សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា (GDCE) បានបង្ហាញថា រយៈពេល៨ខែ ឆ្នាំ២០២៣នេះ ការធ្វើពាណិជ្ជកម្មជាមួយទីផ្សារអន្តរជាតិ មានទឹកប្រាក់ជិត ៣២ ពាន់លានដុល្លារអាមេរិក ធ្លាក់ចុះជាង ១៤ ភាគរយ បើធៀបនឹងរយៈពេលដូចគ្នាកាលពីឆ្នាំ២០២២។
ទិន្នន័យបានបង្ហាញថា ការផ្លាស់ប្តូរទំនិញរវាងប្រទេសកម្ពុជា និងប្រទេសដៃគូអន្តរជាតិទាំងអស់ក្នុងរយៈពេល ៨ ខែ ចាប់ពីខែមករា ដល់ខែសីហា ឆ្នាំ២០២៣ មានតម្លៃ ៣១,៩៧២លានដុល្លារ ថយចុះ ១៤.៥% ធៀបនឹងរយៈពេលដូចគ្នាឆ្នាំ២០២២ ប៉ុន្តែការនាំចេញរបស់កម្ពុជាគឺនៅរក្សាបានកំណើនវិជ្ជមាន។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា កម្ពុជាបាននាំចេញទំនិញសំខាន់ៗ ទៅកាន់ទីផ្សារអន្តរជាតិទទួលបានទឹកប្រាក់ចំនួន ១៥,៦៩២ លានដុល្លារ កើនឡើងចំនួន ០.៣២% បើធៀបនឹងរយៈពេលដូចគ្នា កាលពីឆ្នាំ២០២២ ដែលមានទឹកប្រាក់ចំនួន ១៥,៦៤១ លានដុល្លារ។ ខណៈកម្ពុជានាំចូលទំនិញមកវិញមានតម្លៃ ១៦,២៨០ លានដុល្លារ ថយចុះ២៥.២% បើធៀបនឹងរយៈពេលដូចគ្នាកាលពីឆ្នាំ២០២២។
ទីផ្សារសំខាន់ៗ ដែលកម្ពុជាបាននាំចេញទំនិញទៅរួមមាន សហរដ្ឋអាមេរិក មានតម្លៃជាង ៦ពាន់លានដុល្លារ ថយចុះ ៤.៨%, ចិន មានតម្លៃជាង៩៣៩លានដុល្លារ កើនឡើង១៦.៨%, វៀតណាម មានតម្លៃជាង ១ពាន់លានដុល្លារ កើនឡើង ២៦.១%, ជប៉ុន មានតម្លៃជាង ៧៧០លានដុល្លារ ថយចុះ ២.៤%, អាល្លឺម៉ង់ មានតម្លៃជាង ៥៦៣លានដុល្លារ ថយចុះ ២៤.៦%, កាណាដា មានតម្លៃជាង ៥៧១លានដុល្លារ ថយចុះ ២៦.៧% រួមនឹងទីផ្សារសំខាន់ៗមួយចំនួនទៀត។
ទំនិញដែលកម្ពុជាបាននាំចេញរួមមាន សម្លៀកបំពាក់ និងគ្រឿងបន្ទាប់បន្សំ ដែលធ្វើឡើងពីក្រណាត់ ៤.៥ពាន់លានដុល្លារ ថយចុះ ២០.៩%, ម៉ាស៊ីន និងឧបករណ៍អគ្គិសនីជាង ១ពាន់លានដុល្លារ កើនឡើង ៩៨.៥%, សម្លៀកបំពាក់ និងគ្រឿងបន្ទាប់បន្សំនៃសម្លៀកបំពាក់មិនធ្វើឡើងពីការចាក់ដោយម្ជុលពីរមានតម្លៃជាង ១.៨ពាន់លានដុល្លារ, កៅស៊ូ និងផលិតធ្វើអំពីកៅស៊ូមាន ៣០៨លានដុល្លារ កើនឡើង ៥៥.៣% និងបន្លែដែលអាចបរិភោគបានមានតម្លៃ ៣៣២លានដុល្លារ កើនឡើង ២២.៣%។
លោកបណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានកត់សម្គាល់ថា ក្នុងដំណាក់កាលដែលសេដ្ឋកិច្ចពិភពលោកកំពុងតែជួបវិបត្តិ ការធ្លាក់ចុះទំហំពាណិជ្ជកម្មអន្តរជាតិ គឺជាបញ្ហាសកល ប៉ុន្តែអ្វីដែលសំខាន់ គឺការនាំចេញរបស់កម្ពុជាមានភាពវិជ្ជមាន។
លោកបណ្ឌិតបានបញ្ជាក់ថា ការនាំចេញរបស់កម្ពុជា គឺជាចំណែកពីការនាំចេញផលិតផលកសិកម្ម ដែលកំពុងមានតម្រូវការកើនឡើងនៅទីផ្សារអន្តរជាតិ ព្រោះទំនិញកម្ពុជាបានបង្កើនគុណភាព និងមានតម្លៃសមត្ថភាពក្នុងការប្រកួតប្រជែង។
លោកបណ្ឌិត ហុង វណ្ណៈ បានគូសបញ្ជាក់ថា ៖ ក្នុងស្ថានភាពបច្ចុប្បន្ន កម្ពុជាមានឱកាសពិនិត្យលទ្ធភាពធ្វើពិពិធកម្មទំនិញនាំចេញរបស់ខ្លួនលើផលិតផល កសិ-ឧស្សាហកម្ម ដែលកំពុងក្លាយជាចំណែកសំខាន់នៃការនាំចេញរបស់កម្ពុជា បន្ថែមពីការនាំចេញផលិតផលវាយនភណ្ឌ និងគ្រឿងបង្គុំអេឡិចត្រូនិក ក្នុងរយៈពេលកន្លងមក។
សូមបញ្ជាក់ថា ក្នុងឆ្នាំ២០២២ ការធ្វើពាណិជ្ជកម្មជាមួយទីផ្សារអន្តរជាតិរបស់កម្ពុជា មានទឹកប្រាក់ចំនួនសរុបជាង ៥២,៤ ពាន់លានដុល្លារ កើនឡើង៩,២ ភាគរយបើធៀបទៅនឹងឆ្នាំ២០២១ ដែលមានចំនួនជាង៤៨ពាន់លានដុល្លារ៕
Account
Security
Favourite Content