សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សហព័ន្ធស្រូវអង្ករកម្ពុជាបានឱ្យដឹងថា ក្នុងរយៈពេល ៨ខែ នាឆ្នាំ២០២៤ កម្ពុជាទទួលបានចំណូល ៣០៥លានដុល្លារក្នុងការនាំចេញអង្ករបានចំនួន ៤១២ ០២៣ តោន ខណៈដែលស្រូវកម្ពុជាត្រូវបាននាំចេញចំនួន ៣ ៣១៨ ៥៩២ តោន ដែលគិតជាទឹកប្រាក់មានតម្លៃប្រមាណជាង ៩១៨.១៦ លានដុល្លារសហរដ្ឋអាមេរិក។
នៅរយៈពេល៨ខែ ឆ្នាំ២០២៤ កម្ពុជាបាននាំចេញអង្ករ តាមរយៈក្រុមហ៊ុននាំចេញអង្ករចំនួន ៥៣ ក្រុមហ៊ុន ទៅកាន់គោលដៅចំនួន ៦៥ ដែលក្នុងនោះទៅកាន់បណ្តាប្រទេស នៅក្នុងតំបន់អឺរ៉ុបចំនួន ២៦ ក្នុងបរិមាណអង្ករចំនួន ២០៨ ២០៧ តោន គិតជាទឹកប្រាក់ចំនួន ១៦១.៧០ លានដុល្លារសហរដ្ឋអាមេរិក ។
សហព័ន្ធស្រូវអង្ករ បានឱ្យដឹងដែរថា កម្ពុជាបាននាំចេញអង្ករចំនួន ៧៧ ៧៩២ តោន ទៅកាន់ប្រទេសចិន រួមទាំងហុងកុង និងម៉ាកាវ ចំនួន ៧៧ ៧៩២ តោន គិតជាទឹកប្រាក់ចំនួន ៤៨.៨៧ លានដុល្លារសហរដ្ឋអាមេរិក ។
ជាមួយគ្នានេះដែរ កម្ពុជាក៏បាននាំអង្ករទៅកាន់ប្រទេសក្នុងអាស៊ាន រួមទាំង ទីម័រខាងកើត ចំនួន ៧ប្រទេសបានបរិមាណ ចំនួន ៨៣ ០៩៥ តោន គិតជាទឹកប្រាក់ចំនួន ៥៦.៨៩ លានដុល្លារសហរដ្ឋអាមេរិក និងទៅកាន់គោលដៅ ២៨ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេនជាដើម បានចំនួន ៤២ ៩២៩ តោន គិតជាទឹកប្រាក់ចំនួន ៣៧.៦៩ លានដុល្លារសហរដ្ឋអាមេរិក។
របាយការណ៍បានបញ្ជាក់ថា ចំពោះប្រភេទអង្ករដែលបាននាំចេញ រួមមាន អង្ករក្រអូបចំនួន ៧០.៩២% ប្រភេទអង្ករស ធម្មតា ២៣.៧៥% អង្ករចំហ៊ុយ ៣.១៣% អង្ករសរីរាង្គចំនួន ១.៨៩% និងអង្ករផ្សេងៗចំនួន ០.៣២% ។ ជាមួយគ្នានេះ ប្រទេសកម្ពុជាក៏បាននាំចេញស្រូវចំនួន ៣ ៣១៨ ៥៩២ តោន (ស្រូវសើម) ដែលគិតជាទឹកប្រាក់ចំនួនប្រមាណជាង ៩១៨.១៦ លានដុល្លារសហរដ្ឋអាមេរិក ដែលក្នុងនោះ ៨៣.៧៧ % បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច។
ដោយឡែក កាលពីពេលថ្មីៗនេះ លោកស្រី Mayo ឯកអគ្គរដ្ឋទូតហ្វីលីពីនប្រចាំកម្ពុជា បានមានប្រសាសន៍ថា ភាគីហ្វីលីពីនបានជំរុញឱ្យកម្ពុជាបន្តពង្រឹងកិច្ចសហប្រតិបត្តិការការទូត និងការវិនិយោគលើវិស័យកសិកម្ម និងកសិឧស្សាហកម្មរវាងប្រទេសទាំង២ ដោយលោកស្រីឯកអគ្គរដ្ឋទូត បានសម្តែងការប្តេជ្ញាចិត្តយ៉ាងមុតមាំក្នុងការទាក់ទាញវិនិយោគិនហ្វីលីពីនមកបណ្តាក់ទុនលើវិស័យកសិកម្មនៅកម្ពុជា ជាពិសេស វិស័យអង្ករ និងម្រេចដើម្បីនាំចេញទៅកាន់ទីផ្សារហ្វីលីពីន ដែលជាទីផ្សារនាំចូលអង្ករដ៏ធំបំផុតមួយនៅក្នុងតំបន់។
ចំណែកប្រមុខការទូតកម្ពុជា និងឥណ្ឌូណេស៊ី កាលពីខែសីហាកន្លងទៅ បានឯកភាពគ្នាពន្លឿនការចុះអនុស្សរណៈនៃការយោគយល់គ្នា (MoU) ស្ដីពីពាណិជ្ជកម្មអង្ករផងដែរ ដោយភាគីទាំងពីរបានឯកភាពគ្នាក្នុងការពង្រីកកិច្ចសហប្រតិបត្តិការរវាងក្រុមប្រឹក្សាអភិវឌ្ឍន៍កម្ពុជានិងក្រសួងវិនិយោគឥណ្ឌូណេស៊ី និងបានស្វាគមន៍ ក្រុមហ៊ុនឥណ្ឌូណេស៊ី Perum BULOG ក្នុងការវិនិយោគនៅកម្ពុជាលើវិស័យកសិកម្ម ដូចជាម៉ាស៊ីនកិនស្រូវ និងឃ្លាំង។
យោងតាមសហព័ន្ធស្រូវអង្ករកម្ពុជា (CRF) បានឱ្យដឹងថា ក្នុងឆ្នាំ ២០២៣ កម្ពុជាបាននាំចេញអង្ករទៅទីផ្សារអន្តរជាតិសរុប ៦៥៦ ៣២៣ តោន កើនឡើង៣ ភាគរយបើធៀបនឹងឆ្នាំ២០២២ ចំណែកទឹកប្រាក់ប្រមូលបានមានចំនួន ៤៦៦ លានដុល្លារ កើនឡើង ១៣ ភាគរយ។
សូមជម្រាបថា សហព័ន្ធស្រូវអង្ករកម្ពុជា នឹងរៀបចំកម្មវិធី «វេទិកាស្រូវអង្ករកម្ពុជាលើកទី៧ ឆ្នាំ២០២៤» ក្រោមប្រធានបទ៖ «ការប្រែក្លាយខ្សែច្រវាក់ផ្គត់ផ្គង់អង្ករកម្ពុជា ឱ្យកាន់តែមានភាពធន់ បរិយាបន្ន និងនិរន្ដរភាព» ដែលនឹងប្រព្រឹត្តទៅនៅថ្ងៃទី១០ ខែកញ្ញា ឆ្នាំ២០២៤ ខាងមុខនេះ ដើម្បីផ្សព្វផ្សាយអំពីសក្តានុពល នៃវិស័យស្រូវអង្ករកម្ពុជាទៅកាន់ពិភពលោក តាមរយៈការបង្ហាញអំពីសមត្ថភាព ផលិតកម្មស្រូវ ការកែច្នៃ និងភាពប្រកួតប្រជែងរបស់វិស័យស្រូវអង្ករកម្ពុជាទៅកាន់ទីផ្សារអន្តរជាតិ៕
Account
Security
Favourite Content