សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ រមណីយដ្ឋាននៃតំបន់ប្រាសាទបុរាណអង្គរដ៏ល្បីល្បាញរបស់កម្ពុជាកំពុងទាក់ទាញទេសចរបរទេសចម្រុះជាតិសាសន៍ និងមានការកើនឡើងគួរឱ្យកត់សម្គាល់។ ជាក់ស្ដែង នៅក្នុងអំឡុងត្រីមាសទីមួយនៃឆ្នាំ២០២៥កន្លងទៅនេះ រមណីយដ្ឋានប្រាសាទបុរាណអង្គរបានស្វាគមន៍ភ្ញៀវទេសចរបរទេសចំនួន ៣៩៨ ៥៣១នាក់ កើន១៤.៦៧% និងទទួលបានចំណូល ១៨ ៧១៨ ៧២២ដុល្លារអាមេរិក
យោងតាមរបាយការណ៍របស់សហគ្រាសអង្គរ ដែលគ្រប់គ្រងការលក់ប័ណ្ណចូលអង្គរ ចេញផ្សាយកាលពីថ្ងៃទី២ ខែមេសា ឆ្នាំ២០២៥ បានបង្ហាញថា កម្ពុជាទទួលបានចំណូលជិត ១៩លានដុល្លារ ពីការលក់បណ្ណចូលទស្សនារមណីយដ្ឋានអង្គរ, ប្រាសាទកោះកេរ និងកំពង់ផែចុងឃ្លៀស។ ក្នុងរយៈពេល៣ខែ នៃត្រីមាសទី១ ឆ្នាំ២០២៥នេះ ភ្ញៀវទេសចរបរទេសបានទិញបណ្ណចូលទស្សនារមណីយដ្ឋានអង្គរ និងប្រាសាទកោះកេរ មានចំនួន ៣៩៨ ៥៣១នាក់ កើន១៤.៦៧% និងទទួលបានចំណូល ១៨ ៧១៨ ៧២២ដុល្លារអាមេរិក កើនឡើង១៣.២២ភាគរយ បើធៀបនឹងរយៈពេលដូចគ្នា នៅឆ្នាំ២០២៤។
លោកជំទាវ ហ៊ុន ដានី រដ្ឋលេខាធិការក្រសួងទេសចរណ៍បានមានប្រសាសន៍ថា៖ ការកើនឡើងនៃចំនួនភ្ញៀវទេសចរបរទេសគឺជាលទ្ធផលនៃកិច្ចសហប្រតិបត្តិការដ៏ល្អក្នុងចំណោមភាគីពាក់ព័ន្ធរវាងរដ្ឋាភិបាល និងវិស័យឯកជនក្នុងការលើកកម្ពស់វិស័យទេសចរណ៍ ដែលមានសក្តានុពល ។ ការតភ្ជាប់ផ្លូវអាកាស ជើងហោះហើរត្រង់ និងការអនុវត្តប្រព័ន្ធនានា ដូចជាម៉ាស៊ីនលក់សំបុត្រស្វ័យប្រវត្តិ ក៏បានរួមចំណែកក្នុងការបង្កើនភាពងាយស្រួលរបស់ភ្ញៀវទេសចរផងដែរ។
យោងតាមអាជ្ញាធរជាតិអប្សរាបានឱ្យដឹងថា ភ្ញៀវទេសចរជាតិ និងអន្តរជាតិយ៉ាងច្រើនកុះករ បានប្រមូលផ្តុំគ្នានៅមុខប្រាសាទអង្គរវត្ត ដែលជានិមិត្តរូបរបស់ប្រទេសកម្ពុជា កាលពីថ្ងៃទី២១ ដល់ថ្ងៃទី២៣ ខែមីនា ដើម្បីមើលថ្ងៃរះដ៏អស្ចារ្យក្នុងព្រឹត្តការណ៍សមរាត្រី។
ជាមួយគ្នានេះដែរ ក្នុងការសម្រួលដល់ការធ្វើដំណើរសម្រាប់ភ្ញៀវទេសចរអន្តរជាតិ រដ្ឋាភិបាលបានដាក់ឱ្យដំណើរការប្រព័ន្ធលក់សំបុត្រអង្គរ និងប្រព័ន្ធកំណែទម្រង់ការត្រួតពិនិត្យសំបុត្រកាលពីខែមករា ដោយផ្តល់ជម្រើសកាន់តែច្រើនដល់ភ្ញៀវទេសចរបរទេស និងភ្នាក់ងារទេសចរណ៍ក្នុងការទិញសំបុត្រចូលទស្សនា ដោយធ្វើឱ្យកាន់តែមានភាពងាយស្រួលដល់ភ្ញៀវទេសចរក្នុងការទស្សនាប្រាសាទបុរាណ។
រមណីយដ្ឋានអង្គរ ត្រូវបានចុះក្នុងបញ្ជីបេតិកភណ្ឌពិភពលោក របស់អង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (UNESCO) ក្នុងឆ្នាំ១៩៩២ គឺជាតំបន់ទេសចរណ៍ ដ៏ពេញនិយមបំផុតនៅក្នុងប្រទេសអាស៊ីអាគ្នេយ៍ ខណៈដែលប្រទេសកម្ពុជា បានក្លាយជាគោលដៅទេសចរណ៍ដ៏ពេញនិយមបំផុតរបស់អន្តរជាតិ ដោយបានទាក់ទាញភ្ញៀវទេសចរអន្តរជាតិសរុបចំនួន ១ ០២៣ ៦៨៨នាក់ ក្នុងឆ្នាំ២០២៤ ដែលបង្កើតប្រាក់ចំណូលសរុបសម្រាប់ចំណូលពីការលក់បណ្ណចូលទស្សនារមណីយដ្ឋានអង្គរ មានចំនួន ៤៧ ៨២៦ ៩៨១ ដុល្លារអាមេរិក កើនជាង ២៨ភាគរយ បើធៀបឆ្នាំ២០២៣ មានចំនួន៣៧ ១៩៨ ៩៨៨ដុល្លារអាមេរិក៕
Account
Security
Favourite Content