ភ្នំពេញ៖ ក្រសួងឧស្សា​ហ​កម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងគណៈប្រតិភូនៃសាជីវកម្មហិរញ្ញវត្ថុអន្តរជាតិ (IFC) ដឹកនាំដោយលោកស្រី Towfiqua Hoque តំណាង IFC ប្រចាំកម្ពុជា និងបានពិភាក្សាកិច្ចសហប្រតិបត្តិការលើបរិវត្តកម្មវិស័យកាត់ដេរ ស្បែកជើង និងផលិតផលធ្វើដំណើររបស់កម្ពុជា ដោយផ្ដោតលើការបង្កើនផលិតភាព ការពង្រឹងឧស្សាហកម្មប្រតិគមន៍ (backward linkage) និងសមាហរ័ណសហគ្រាសធុន​មីក្រូ តូច និងមធ្យម ទៅក្នុងខ្សែច្រវាក់ផ្គត់​ផ្គង់​សកល។ កិច្ចពិភាក្សានេះត្រូវបានធ្វើឡើងកាលពីថ្ងៃទី១៩ ខែមករា ឆ្នាំ២០២៦ នៅទីស្ដីការក្រសួង។

នៅក្នុងកិច្ចជំនួបនេះ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សា​ហ​កម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានកោតសរសើរសាជីវកម្មហិរញ្ញវត្ថុអន្តរជាតិ (IFC) ចំពោះការគាំទ្រដល់កំណើនសេដ្ឋកិច្ចកម្ពុជា និងបានកត់​សម្គាល់​ថា កិច្ចសហប្រតិបត្តិការកន្លងមកបានផ្ដោតខ្លាំងលើវិស័យហិរញ្ញ​វត្ថុ ហើយដំណាក់កាល​បន្ទាប់គួរផ្តល់​អាទិភាពដល់ការពង្រីកវិសាលភាព និងតម្លៃបន្ថែមនៃវិស័យឧស្សាហកម្ម។

ឯកឧត្តមបានលើកឡើងថា កំណើនឧស្សាហកម្មកម្ពុជានឹងត្រូវជម្នះបញ្ហាប្រឈមថ្មីៗ ពិសេសក្រោយការចាកចេញពីឋានៈជាប្រទេសដែលមានការអភិវឌ្ឍតិចតួច ដែលទាមទារការធ្វើពិពិធកម្ម ការបង្កើនផលិតភាព និងការពង្រឹងខ្សែច្រវាក់ផ្គត់ផ្គង់ក្នុងស្រុក។

ឯកឧត្តមក៏បានជម្រាបជូនគណៈប្រតិភូពីសារសំខាន់នៃការអភិវឌ្ឍឧស្សាហកម្មប្រតិគមន៍ដោយលើកឡើងថា បច្ចុប្បន្ន កម្ពុជាមានរោងចក្រធុនធំកំពុងដំណើរការជាង ៣ ០០០ មូលដ្ឋាន និងបានអនុម័តគម្រោងវិនិយោគក្នុងទំហំទុនខ្ពស់បំផុតមិនធ្លាប់មានសរុបជាង ១០ ពាន់លានដុល្លារអាមេរិកក្នុងឆ្នាំ២០២៥ ប៉ុន្តែការប្រើ​ប្រាស់វត្ថុធាតុដើមក្នុងស្រុកក្នុងឧស្សាហកម្មទាំងនេះនៅមានកម្រិតនៅឡើយ។

ឯកឧត្តមរដ្ឋមន្ត្រីបានស្នើឱ្យ IFC ផ្តល់ការគាំទ្របន្ថែមលើការ ភ្ជាប់តួអង្គនៃខ្សែច្រវាក់ផ្គង់ផ្គង់ តាម​រយៈ​ការ​បណ្តុះបណ្តាលសហគ្រាសធុនតូច និងមធ្យមសក្តានុពលក្នុងអនុវិស័យ ដូចជា ផលិតកម្មអំបោះ គ្រឿងភ្ជាប់ និងលម្អ សារធាតុគីមី វត្ថុធាតុដើមជាស្បែក និងការវេចខ្ចប់ជាដើម ដោយសង្កត់ធ្ងន់ថា សហ​គ្រាសធុនតូច និងមធ្យម គឺជាតួអង្គគន្លឹះសម្រាប់តម្លៃបន្ថែមខ្ពស់ និងភាពប្រកួតប្រជែង​រយៈ​ពេល​វែង។

លោកស្រី Hoque បានលើកឡើងថា ដំណើរទស្សនកិច្ចរបស់ក្រុមបេសកកម្មរបស់ IFC នៅកម្ពុជា ដែលរួមមានជំនាញការផ្នែកកាត់ដេរ ស្បែកជើង និងផលិតផលធ្វើដំណើរ មកពីប្រទេសបង់ក្លាដេស មានគោលបំណងគាំទ្រដល់បរិវត្តកម្មវិស័យកាត់ដេរ ស្បែកជើង និងផលិតផលធ្វើដំណើររបស់កម្ពុជា ដោយចែករំលែកបទពិសោធន៍ពីក្នុងតំបន់។

លោកស្រីបានលើកឡើងពីការងារដ៏ទូលំទូលាយរបស់ IFC ជាមួយនឹងម៉ាកយីហោសាកល កម្មវិធី​ហិរញ្ញប្បទានខ្សែច្រវាក់ផ្គត់ផ្គង់ ការគាំទ្រគម្រោង រោងចក្រកាន់តែប្រសើរនៅកម្ពុជា និង​កម្មវិធី​និរន្តរភាព ដោយក្នុងនោះ IFC បានផ្តល់ហិរញ្ញប្បទានdlខ្សែច្រវាក់ផ្គត់ផ្គង់រយៈពេលខ្លីប្រមាណ ១៥០ ទៅ ២០០ លានដុល្លារអាម៉េរិកក្នុងមួយឆ្នាំ ខណៈដែលបច្ចុប្បន្ន IFC ក៏កំពុងសិក្សាលទ្ធភាពវិនិយោគលើកម្មវិធីមួយចំនួន ដូចជា តំបន់សេដ្ឋកិច្ចពិសេសបៃតង មជ្ឈមណ្ឌលភស្តុភារកម្ម និងយន្តការហិរញ្ញប្បទានសម្រាប់ទាំងសហគ្រាសធុនតូច និងមធ្យម រួមជាមួយនឹងគម្រោងវិនិយោគផ្ទាល់ពីបរទេស៕