សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ជប៉ុន ៖ មន្ត្រីជាន់ខ្ពស់តំណាងកម្ពុជា-ជប៉ុន បានព្រមព្រៀងសហការគ្នាជាដៃគូយុទ្ធសាស្ត្រក្នុងការពង្រឹងកិច្ចសហប្រតិបត្តិការ និងគាំទ្រជំរុញការនាំចេញនូវរាល់ផលិតផលដែលមានសក្ដានុពលរបស់កម្ពុជាទៅកាន់ទីផ្សារប្រទេសជប៉ុនតាមរយៈការបង្កើតបណ្តាញទំនាក់ទំនង និងផ្គូរផ្គង់ធុរកិច្ចរវាងវិស័យឯកជនទាំង២ ។
ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម ក្នុងអំឡុងដំណើរទស្សនកិច្ចនៅទីក្រុងអូសាកា ប្រទេសជប៉ុន កាលពីពេលថ្មីៗនេះ បានព្រមព្រៀងគ្នាក្នុងការពង្រឹងកិច្ចសហប្រតិបត្តិការភាពជាដៃគូ ជាមួយអង្គការ (JETRO)ជប៉ុន ដើម្បីជួយដល់កម្ពុជាក្នុងការនាំចេញផលិតផលដែលមានសក្តានុពលរបស់ខ្លួនឱ្យបានពេញលេញ។
នៅក្នុងកិច្ចពិភាក្សារវាងភាគីទាំងពីរ រវាងឯកឧត្តម សំហេង បូរ៉ា ជាមួយលោក Sho Hideki អគ្គនាយកអង្គការពាណិជ្ជកម្មក្រៅប្រទេសជប៉ុន JETRO នៅទីក្រុងអូសាកា ប្រទេសជប៉ុន បានលើកឡើងនូវការគាំទ្រ និងកិច្ចសហប្រតិបត្តិការល្អប្រសើរនាពេលកន្លងមក ព្រមទាំងបានបង្ហាញអំពីសកម្មភាពអាទិភាពមួយចំនួនរបស់ក្រសួងពាណិជ្ជកម្មក្នុងកិច្ចជំរុញការនាំចេញ និងផលិតផលសក្តានុពលរបស់កម្ពុជា ជាពិសេសស្វាយចន្ទី និងផ្លែស្វាយស្រស់ ជាដើម ជាមួយនឹងការរៀបចំ និងត្រៀមខ្លួនរបស់កម្ពុជា ចូលរួមពិព័រណ៍ពិភពលោកឆ្នាំ២០២៥ នៅទីក្រុងអូសាកា ប្រទេសជប៉ុន។
លោក Hideki បានកោតសរសើរចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ជាពិសេសក្រសួងពាណិជ្ជកម្ម ក្នុងការជំរុញការនាំចេញផលិតផលរបស់កម្ពុជា។ លោកក៏បានបង្ហាញពីការគាំទ្រ និងបំណងក្នុងការពង្រឹងកិច្ចសហប្រតិបត្តិការរវាងក្រសួងពាណិជ្ជកម្ម និង JETRO ទាំងនៅភ្នំពេញ និងអូសាកា ព្រមទាងបានបង្ហាញនូវភាពរីករាយក្នុងកិច្ចសហការលើការងារជំរុញនាំចេញផលិតផលសក្តានុពលរបស់កម្ពុជាមកកាន់ប្រទេសជប៉ុនផងដែរ។
យោងតាមទិន្នន័យរបស់អគ្គនាយកដ្ឋានគយ និងរដ្ឋាករ គិតចាប់ពីខែមករា ដល់ខែសីហា ឆ្នាំ២០២៤ ប្រទេសជប៉ុន គឺជាគោលដៅនាំចេញធំជាងគេទី៤ របស់កម្ពុជា ដែលមានទំំហំទឹកប្រាក់ចំនួន ៩២៤ លានដុល្លារ ស្មើនឹង ៥,១ ភាគរយនៃចំណែកទីផ្សារ។ ការនាំចេញទៅកាន់ប្រទេសជប៉ុនបានកើនឡើង២០ ភាគរយក្នុងរយៈពេល ៨ ខែដំបូងក្នុងឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន។
ផលិតផលរបស់កម្ពុជាដែលបាននាំចេញទៅកាន់ទីផ្សារប្រទេសជប៉ុន រួមមានដូចជា សម្លៀកបំពាក់ កាបូប ស្បែកជើង គ្រឿងសង្ហារិម គ្រឿងសំអាង ក្រដាស និងសម្ភារៈការិយាល័យ និងទំនិញស្បែក ហើយកម្ពុជាបាននាំចូលពីប្រទេសជប៉ុនវិញ រួមមាន ដូចជា គ្រឿងម៉ាស៊ីន រថយន្ត គ្រឿងអេឡិចត្រូនិក គ្រឿងសង្ហារិម ក្រណាត់ និងប្លាស្ទិកជាដើម ។
សូមជម្រាបថា ការកើនឡើងនៃទំហំពាណិជ្ជកម្មរវាងប្រទេសទាំងពីរ ក៏ជាផ្នែកមួយជួយពង្រឹងទំនាក់ទំនងទ្វេភាគី ដែលត្រូវបានមើលឃើញតាមរយៈជំនួយផ្តល់ដោយទីភ្នាក់ងារសហប្រតិបត្តិការអន្តរជាតិជប៉ុន (JICA) សម្រាប់គំនិតផ្តួចផ្តើមអភិវឌ្ឍហេដ្ឋារចនាសម្ព័ន្ធផ្សេងៗរបស់រាជរដ្ឋាភិបាលកម្ពុជា។
ជាក់ស្តែង ក្នុងចំណោមគម្រោងហេដ្ឋារចនាសម្ព័ន្ធសំខាន់ៗដែលគាំទ្រដោយប្រទេសជប៉ុននៅកម្ពុជារួមមានការពង្រីកកំពង់ផែស្វយ័តក្រុងព្រះសីហនុ ស្ពានសំខាន់ៗចំនួន៣ (ស្ពានជ្រោយចង្វារ ស្ពានគីហ្សូណា ក្នុងខេត្តកំពង់ចាម និងស្ពាន Tsubasa តភ្ជាប់ខេត្តកណ្តាលជាមួយអ្នកលឿង) រួមទាំងសាលាចំនួន ២៦ កន្លែង មជ្ឈមណ្ឌលសហប្រតិបត្តិការកម្ពុជាជប៉ុន និងវិទ្យាស្ថានបច្ចេកវិទ្យាកម្ពុជា ផ្លូវចំនួន ៦ខ្សែរ (៥៦៨ គីឡូម៉ែត្រ) និងមន្ទីរពេទ្យចំនួន ៨ ។
កាលពីខែមុន គណៈប្រតិភូ JETRO ក្នុងដំណើរទស្សនកិច្ចនៅកម្ពុជា ដែលមានតំណាងមកពីក្រុមហ៊ុនជប៉ុនចំនួន១៩ ដឹកនាំដោយលោក Mio Kawada អនុប្រធានប្រតិបត្តិ បានចូលជួបសម្តែងការគួសម និងពិភាក្សាជាមួយសម្ដេចនាយករដ្ឋមន្ត្រី ហ៊ុន ម៉ាណែត ដោយបានលើកឡើងពីសក្តានុពលនៃការដាក់ចេញបច្ចេកវិទ្យាជប៉ុនថ្មី និងទំនើប ដើម្បីជំរុញការអភិវឌ្ឍប្រកបដោយចីរភាពនៅកម្ពុជា។ ភាគីទាំងពីរក៏ចាប់អារម្មណ៍លើលទ្ធភាពនៃការបង្កើតកិច្ចព្រមព្រៀងពាណិជ្ជកម្មសេរីទ្វេភាគី ដែលរំពឹងថានឹងជំរុញកិច្ចសហប្រតិបត្តិការលើវិស័យពាណិជ្ជកម្ម និងការវិនិយោគរវាងប្រទេសទាំងពីរផងដែរ៕
Account
Security
Favourite Content