សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របតាមផែការយុទ្ធសាស្ត្ររបស់ក្រសួងរៀបចំដែនដី នគរូបនីយកម្ម និងសំណង់ ក៏ដូចជារាជរដ្ឋាភិបាលកម្ពុជា ជំរុញការវាស់វែងដីធ្លីជូនប្រជាពលរដ្ឋឱ្យបានចប់សព្វគ្រប់ឆាប់ៗ រហូតមកដល់ពេលនេះ មានតំបន់ជាច្រើនត្រូវបានវាស់វែង និងចុះបញ្ជី ក៏ដូចជាចេញបណ្ណកម្មសិទ្ធិជូនពលរដ្ឋជាបន្តបន្ទាប់ ក្នុងនោះ ខេត្តព្រះសីហនុគ្រោងនឹងបញ្ចប់ការវាស់វែង និងចុះបញ្ជីដីធ្លីទាំងស្រុង នៅមុនដំណាច់ឆ្នាំ ២០២៤នេះ ។
ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានឱ្យដឹងថា ចំពោះការចុះបញ្ជីដីធ្លីនៅក្នុងក្របខណ្ឌ ខេត្តព្រះសីហនុ មានចំនួន ១១១ភូមិ ហើយរហូតមកដល់ពេនេះ នៅខ្វះតែ ២ភូមិទៀតប៉ុណ្ណោះ នឹងបញ្ចប់ការវាស់វែងចុះបញ្ជី និងប្រកាសបិទផ្សាយចុងក្រោយ ។ គោលដៅរបស់ខេត្តព្រះសីហនុ នៅមុនដំណាច់ឆ្នាំ២០២៤នេះ នឹងប្រកាសបញ្ចប់១០០ភាគរយ ។
ឯកឧត្តមបានបន្តថា ៖
«តាមពិតទៅ ក្រុមការងារចុះវាស់វែង និងចុះបញ្ជីដីធ្លី អាចនឹងបញ្ចប់ទៅហើយ ប៉ុន្តែដោយសារតែភូមិដែលនៅសេសសល់នោះ មានទំនាស់ក្បាលដីច្រើន ដូច្នេះហើយ ក្រុមការងារត្រូវដោះស្រាយឱ្យបានដាច់ស្រលះ ទើបអាចវាស់វែងជូនពលរដ្ឋបាន។ នៅពេលបញ្ចប់ការវាស់វែងដីធ្លីជូនពលរដ្ឋចប់សព្វគ្រប់ហើយ ការងារបន្តគឺត្រូវចេញបណ្ណជូនប្រជាពលរដ្ឋ ហើយការចេញបណ្ណនេះដែរ មិនអាចចេញបណ្ណភ្លាមៗបានទាំងអស់នោះទេ គឺនឹងចេញជាបន្តបន្ទាប់រហូតដល់គ្រប់គ្នា»។
គួររំលឹកថា ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ តែងលើកឡើងជារឿយៗថា ការវាស់វែងចុះបញ្ជី និងចេញបណ្ណកម្មសិទ្ធិដីធ្លីជូនប្រជាពលរដ្ឋ នឹងបញ្ចប់នូវទំនាស់ដីធ្លីរវាងឯកជន និងឯកជន និងរវាងរដ្ឋ និងឯកជន ហើយតាមផែនការរបស់ក្រសួងរៀបចំដែនដី នគរូបនីយកម្ម និងសំណង់ នឹងបញ្ចប់ការវាស់វែង និងចុះបញ្ជីដីធ្លីទាំងស្រុងទូទាំងប្រទេសនៅមុនដំណាច់ឆ្នាំ២០២៩ ។
ឯឧត្តមបន្តថា ការវាស់វែង និងចុះបញ្ជីដីធ្លីបញ្ចប់១០០ភាគរយ សម្រាប់កម្ពុជា គឺជាប្រវត្តិសាស្ត្រហើយ ព្រោះកន្លងមកកម្ពុជាមិនធ្លាប់បានបញ្ចប់ការវាស់វែង និងចុះបញ្ជីធ្លីបានទាំងស្រុងនោះទេ ។ បច្ចុប្បន្ននេះ ក្រុមការងារចុះវាស់វែង និងចុះបញ្ជីដីធ្លី បាន និងកំពុងសម្រុកបំពេញការងារទៅតាមគោលដៅនានាដើម្បីឱ្យការវាស់វែង និងចុះបញ្ជីដីត្រូវបានបញ្ចប់ទៅនៅពេលឆាប់ៗនេះ ។
សូមជម្រាបផងដែរថា កាលពីពេលកន្លងទៅថ្មីៗនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងថា រាជរដ្ឋាភិបាលបានត្រៀមកញ្ចប់ថវិកាប្រមាណ១០០លានដុល្លារបន្ថែមទៀតសម្រាប់ជូនក្រសួងរៀបចំដែនដី នគរូបនីយកម្ម និងសំណង់ ក្នុងការបំពេញបេសកកម្មវាស់វែង ចុះបញ្ជីដីធ្លី និងចេញបណ្ណកម្មសិទ្ធិជូនពលរដ្ឋនៅទូទាំងប្រទេស និងឈានដល់ការបញ្ចប់ទំនាស់ដីធ្លីដែលតែងតែកើតមាននាពេលកន្លងមកទាំងស្រុងតែម្ដង ៕
Account
Security
Favourite Content