សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពីរ៉យទ័របានរាយការណ៍ថា សេដ្ឋកិច្ចជប៉ុននៅក្នុងត្រីមាសទី ២ បានកើនឡើងលឿនជាងការរំពឹងទុក ដោយសារការប្រើប្រាស់ក្នុងស្រុកបានកើនឡើងយ៉ាងខ្លាំង។
របាយការណ៍ថ្មីៗនេះបានបង្ហាញថា សេដ្ឋកិច្ចជប៉ុនបានកើនឡើង ៣,១ ភាគរយនៅក្នុងត្រីមាសទី២ ដែលលើសពីការព្យាករណ៍ ២,១ ភាគរយ ខណៈដែលធនាគារកណ្តាលជប៉ុន BOJ បានព្យាករណ៍ថា ការស្ទុះងើបឡើងវិញនៃសេដ្ឋកិច្ចដ៏រឹងមាំនឹងជួយឱ្យអតិផរណាឈានដល់គោលដៅរបស់ខ្លួន ២ ភាគរយ និងផ្តល់នូវហេតុផលសម្រាប់ការដំឡើងអត្រាការប្រាក់បន្ថែមទៀតនាពេលខាងមុខ។ កាលពីថ្ងៃព្រហស្បតិ៍សប្ដាហ៍នេះ ទិន្នន័យរបស់រដ្ឋាភិបាលបានបង្ហាញថា កំណើនផលិតផលក្នុងស្រុកសរុប (GDP) បានកើនឡើង ២,១ បន្ទាប់ពីធ្លាក់ចុះនៅត្រីមាសទី១ ប្រមាណ ២,៣ ភាគរយ។ តួលេខនេះស្មើនឹងការកើនឡើង ០,៨ ភាគរយប្រចាំត្រីមាស ដែលលើសពីការព្យាករណ៍របស់អ្នកវិភាគសេដ្ឋកិច្ច ០,៥ ភាគរយ។
លោក Kazutaka Maeda សេដ្ឋវិទូមកពីវិទ្យាស្ថានស្រាវជ្រាវ Meiji Yasuda បានលើកឡើងថា របាយការណ៍បង្ហាញពីសញ្ញាកើនឡើងនៃការប្រើប្រាស់ឯកជនដែលគាំទ្រដោយកំណើនប្រាក់ឈ្នួលពិតប្រាកដ។ បន្ថែមពីនេះ វាគាំទ្រដល់ទស្សនវិស័យរបស់ធនាគារកណ្តាលជប៉ុន BOJ និងជាសញ្ញាល្អសម្រាប់ការដំឡើងអត្រាការប្រាក់បន្ថែមទៀត ខណៈដែលពួកគេនឹងនៅតែប្រុងប្រយ័ត្ន ដោយសារការកើនឡើងអត្រាចុងក្រោយបានបណ្តាលឱ្យប្រាក់យ៉េនឡើងថ្លៃខ្លាំង។
លោក Kengo Tanahashi ដែលជាសេដ្ឋវិទូនៅក្រុមហ៊ុន Nomura Securities រំពឹងថា ការប្រើប្រាស់នឹងបន្តងើបឡើងវិញ។ ជាមួយនឹងការបន្ធូរបន្ថយពន្ធក្នុងអត្រាថេរដែលបានចាប់ផ្តើមនៅក្នុងខែមិថុនា និងការឧបត្ថម្ភធនលើថ្លៃឧស្ម័ន ថ្លៃអគ្គិសនីនៅរដូវក្តៅដែលបានចាប់ផ្តើមក្នុងខែសីហា ជាមួយនឹងការចរចារប្រាក់បៀវត្សរ៍ក៏មានភាពរឹងមាំផងដែរនៅឆ្នាំនេះ។ ទន្ទឹមនឹងនេះ ការប្រើប្រាស់ឯកជនដែលមានចំណែកច្រើនជាងពាក់កណ្តាលនៃទិន្នផលសេដ្ឋកិច្ចបានកើនឡើង ១ ភាគរយធៀបនឹងការព្យាករណ៍ ០,៥ ភាគរយ ហើយវាគឺជាការកើនឡើងលើកដំបូងក្នុងរយៈពេល ៥ ត្រីមាសចុងក្រោយនេះ។
គួរឲ្យបញ្ជាក់ដែរថា ការប្រើប្រាស់របស់ឯកជនគឺជាចំណុចទន់ខ្សោយមួយនៅក្នុងសេដ្ឋកិច្ច ដោយសារវាបានជាប់គាំងកាលពីឆ្នាំមុន ខណៈដែលពលរដ្ឋជួបការលំបាកជាមួយនឹងការឡើងថ្លៃតម្លៃរស់នៅ ហើយការចុះខ្សោយនៃប្រាក់យ៉េនបានធ្វើឲ្យតម្លៃនាំចូលឡើងថ្លៃ។ មិនត្រឹមតែប៉ុណ្ណោះ ការមិនសប្បាយចិត្តជាសាធារណៈចំពោះការកើនឡើងថ្លៃរស់នៅគឺជាកត្តាមួយជំរុញឱ្យនាយករដ្ឋមន្ត្រីជប៉ុន Fumio Kishida ប្រកាសលាលែងពីតំណែងនៅខែក្រោយនេះ។ ពាក់ព័ន្ធទៅនឹងការឡើងថ្លៃតម្លៃរស់នៅ ការធ្លាក់ចំនៃប្រាក់យ៉េន ដែលជាមូលហេតុធ្វើឲ្យពលរដ្ឋជប៉ុនមិនសប្បាយចិត្ត។ មិនត្រឹមតែប៉ុណ្នោះ ក្តីបារម្ភអំពីសេដ្ឋកិច្ចជប៉ុន រួមទាំងការធ្លាក់ចុះនៃប្រាក់យ៉េនធៀបនឹងប្រាក់ដុល្លារអាមេរិក បានធ្វើឱ្យពលរដ្ឋបាត់បង់ទំនុកចិត្តលើគោលនយោបាយសេដ្ឋកិច្ចរបស់លោក Kishida ផងដែរ។
នាយករដ្ឋមន្រ្តីជប៉ុនរូបនេះបានព្យាយាមស្តារការខូចខាតជាច្រើនកាលពីឆ្នាំមុន ប៉ុន្តែវាមិនបានទាក់ទាញទំនុកចិត្ត និងការគាំទ្រសាធារណៈឡើងវិញទេ។ ការស្ទង់មតិមួយដោយកាសែត Mainichi Shimbun បានបង្ហាញថា ការមិនពេញចិត្តជាសាធារណៈចំពោះគណៈរដ្ឋមន្ត្រីគឺ ៧៩ ភាគរយដែលជាកម្រិតខ្ពស់ជាប្រវត្តិសាស្ត្រ។ លោកនាយករដ្ឋមន្រ្តីជប៉ុន Fumio Kishida និយាយថា ការបោះឆ្នោតប្រកបដោយតម្លាភាព និងបើកចំហ រួមជាមួយនឹងការជជែកពិភាក្សាដោយសេរី មានសារៈសំខាន់ជាងពេលណាទាំងអស់។ ការលាលែងតំណែងរបស់លោកគឺជាជំហានដំបូង ដើម្បីបង្ហាញថា គណបក្ស LDP នឹងផ្លាស់ប្តូរ ៕
Account
Security
Favourite Content