ភ្នំពេញ ៖ វិនិយោគិនក្នុងស្រុក និងអ្នកជំនាញសេដ្ឋកិច្ច បានជំរុញឱ្យមានការកែលម្អបរិយាកាសវិនិយោគបន្ថែមទៀត ដើម្បីឱ្យកម្ពុជា​ក្លាយជាប្រទេសដែលទាក់ទាញការវិនិយោគផ្ទាល់ពីបរទេសដ៏លេចធ្លោមួយនៅក្នុងតំបន់អាស៊ាន។

លោកបណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា ដែលបច្ចុប្បន្នកំពុងមានវត្តមាននៅក្នុងកិច្ចប្រជុំកំពូលអាស៊ានលើ​កទី៤៣ និងកិច្ចប្រជុំកំពូលពាក់ព័ន្ធនៅសាធារណរដ្ឋឥណ្ឌូនេស៊ី បានប្រាប់ឱ្យដឹងថា រាជរដ្ឋា​ភិបាលថ្មីនេះ ​ដោយអនុវត្តយុទ្ធសាស្រ្តបញ្ចកោណ ដែលបានដាក់ចេញនូវការកែទម្រង់​យ៉ាងច្រើន ដើម្បីទាក់ទាញការវិនិ​យោគ មានទាំងការអនុវត្តបច្ចេកវិទ្យាឌីជីថល និងការរៀបចំឱ្យមានច្បាប់វិនិយោគ​ជាដើម។

លោកបណ្ឌិតបានបញ្ជាក់​ថា ៖ «តាមពិតទៅ យើងធ្វើបានល្អច្រើនហើយ ទាំងហេដ្ឋារចនាសម្ព័ន្ធ ការរៀបចំច្បាប់ បទដ្ឋានគតិយុត្ត ការផ្លាស់ប្តូរមកប្រើប្រាស់បច្ចេកវិទ្យាឌីជីថល និងការកំណែទម្រង់នានា ដែលសំដៅទាក់ទាញការវិនិយោគពីក្រៅប្រទេស​។ តែអ្វីដែលយើងនៅខ្វះ គឺធនធានមនុស្សមានជំនាញពិតប្រាកដ។ នេះជាចំណុចសំខាន់មួយដែលអាចធ្វើឱ្យ​បរទេសគេសម្រេចចិត្តមករកស៊ីនៅស្រុកយើង។ ចំពោះការវិនិយោគផ្ទាល់ពីបរទេស (FDI) របស់សកលលោកនៅក្នុងអាស៊ាននេះ ត្រូវបានលើកឡើ​ងដោយនាយករដ្ឋមន្រ្តីឥណ្ឌូនេស៊ីផងដែរ ដោយគាត់បានបញ្ជាក់ថា អាស៊ាន គឺជាទិសដៅទាក់ទាញបំផុតសម្រាប់វិនិយោគិនបរ​ទេស»។

លោកបានបន្ថែមឱ្យដឹងថា អាស៊ាន បានធ្វើការងារច្រើនហើយ ដើម្បីជំរុញការរវិនិយោគផ្ទាល់ពីបរទេស​មកកាន់តំបន់ ដូ​ចជាការផ្លាស់ប្តូរឌីជីថល, ការបណ្តុះបណ្តាលជំនាញផ្សេងៗជាដើម។ ម្យ៉ាងវិញទៀត ប្រទេសក្នុងតំបន់អាស៊ាន គួរមានកា​រ​ចែករំលែកពីវិធីសាស្រ្តល្អ ជាពិសេសប្រទេសមានដែលមានកំណើន FDI ខ្ពស់ គួរជួយបណ្តុះបណ្តាលប្រទេសជាស​មាជិកផ្សេងទៀត ដើម្បីធ្វើឱ្យអាស៊ានកាន់តែខ្លាំង។

យោង​តាម​របាយការណ៍ពីធនាគារជាតិនៃកម្ពុជា ​​គិតត្រឹមត្រីមាសទី១ ឆ្នាំ២០២៣ វិនិយោគផ្ទាល់បរទេសនៅកម្ពុជាមាន ១៨៥.៧ ទ្រីលានរៀល (៤៥.៨ ប៊ីលានដុល្លារអាមេរិក) កើនឡើង ៩ភាគរយ ធៀបនឹងគ្រាដូចគ្នាឆ្នាំមុន ដែលមានប្រភពទុនចម្បងមកពីប្រទេស ចិន កូរ៉េខាងត្បូង សិង្ហបុរី ជប៉ុន វៀតណាម ម៉ាឡេស៊ី ថៃ និងចក្រភពអង់គ្លេស។ រំហូរវិនិយោគនេះគ្របដណ្តប់លើវិស័យធំៗដូចជា វិស័យហិរញ្ញវត្ថុ កម្មន្តសាល អចលនទ្រព្យ សណ្ឋាគារ និងរមណីយដ្ឋាន កសិកម្ម វារីអគ្គិសនី និងសំណង់។

ដោយឡែក វិស័យហិរញ្ញវត្ថុ ទទួលបានការវិនិយោគពីបរទេសក្នុងទំហំទឹកប្រាក់ច្រើនជាងគេ ថែមទាំងមានប្រទេសមកវិនយោគច្រើនជាងគេផងដែរ ដូចជា កូរ៉េ ជប៉ុន សិង្ហបុរី ម៉ាឡេស៊ី និងថៃ ជាដើម​។

លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា​ បានលើកឡើងដែរ​ថា មានកត្តាសំខាន់ៗជាច្រើន ដែលនៅ​តែជំរុញឱ្យវិនិយោគិនបរទេសចាប់អារម្មណ៍លើការវិនិយោគលើវិស័យហិរញ្ញវត្ថុនៅកម្ពុជា ដែលកត្តាទាំងអស់នោះរួមមានដូចជា ការយកចិត្តទុកដាក់របស់ធនាគារជាតិក្នុងនាមជានិយ័តករនៅក្នុងវិស័យ​នេះ, ការអនុវត្តដោយផ្អែកលើច្បាប់ និងបទប្បញ្ញត្តិអន្តរជាតិ, តម្រូវការដើមទុនអប្បបរមាសម្រាប់ធនាគារនៅមានកម្រិតទា​បនៅឡើយ និងកត្តាផ្សេងៗជាច្រើនទៀត។

លោកបណ្ឌិតបានបញ្ជាក់​ថា ៖ «ការចែករំលែកព័ត៌មានស្តីពីការអភិវឌ្ឍន៍ច្បាប់ និងបទប្បញ្ញត្តិស្តីពីធនាគារ និងហិរញ្ញវត្ថុ និងព័ត៌មានអំ​ពីបរិយាកាសដែលពួកគេកំពុងធ្វើការ រួមទាំងព័ត៌មាននៅលើទីផ្សារ និងហានិភ័យដែលពាក់ព័ន្ធពិតជាមានសារៈសំខាន់​។ វិនិយោគិនបរទេស មិនចាំបាច់ព្រួយបារម្ភលើការផ្លាស់ប្តូរទៅជារូបិយប័ណ្ណក្នុងស្រុកទេ ព្រោះពួកគេអាចមានប្រតិបត្តិកា​រអាជីវកម្មរបស់ពួកគេជាដុល្លារអាមេរិកបាន និងបានបង្កលក្ខណៈងាយស្រួលច្រើនដល់អ្នកវិនិយោគ»។

ថ្លែងក្នុងវេទិកាធុរកិច្ចកម្ពុជា លោក ជា វុទ្ធី អគ្គលេខាធិការរងក្រុមប្រឹក្សាវិនិយោគកម្ពុជា ធ្លាប់បាន​លើកឡើង​ថា ទោះបីជាមានវិបត្តិកូវីដ១៩ ដែលកំពុងបន្តកើតមាន និងភាពតានតឹងផ្នែកភូមិសាស្ត្រនយោបាយក៏ដោយ រំហូរវិនិយោគផ្ទាល់ពីប​រទេស​ មកកាន់ប្រទេសកម្ពុជានៅតែមានស្ថិរភាព ដោយទាក់ទាញបានចំនួន ៣.៦ ពាន់លានដុល្លារកាលពីឆ្នាំមុន។

លោកបានបញ្ជាក់ថា កម្ពុជា​បាន​ឈរ​នៅ​លំដាប់​កំពូល​ក្នុង​បញ្ជី​អ្នក​វិនិយោគ​ក្នុង​ប្រទេស​កាល​ពី​ឆ្នាំ​មុន​ដោយ​មាន​ចំនួន ៥៣,៥៤ ភាគរយ​តាម​ពី​ក្រោយ​ដោយ​ប្រទេស​ចិន​ចំនួន ៤២,០១ ភាគរយ ប្រទេស​ថៃ​ចំនួន ១,០៩ ភាគរយ និង​ប្រទេស​ជប៉ុន​ចំនួន ០,៩៨ ភាគរយ។

អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា​ លោកបណ្ឌិត ហុង វណ្ណៈ យល់ឃើញដែរ​ថា ដើម្បីជំរុញកំណើននៃការវិនិយោគផ្ទា​ល់ពីបរទេស​មកកាន់កម្ពុជាបន្ថែមទៀត ទាំងរដ្ឋាភិបាល និងវិស័យឯកជន ត្រូវមានការពិភាក្សាគ្នាឱ្យបានលម្អិត ដើម្បីរៀ​បចំបរិយាកាសវិនិយោគថ្មីមួយ ដែលធ្វើ​ឱ្យ​វិនិយោគិនបរទេសមានទំនុកចិត្ត និងផ្តល់ភាពចំណេញខ្ពស់នៅពេលគេសម្រេចបោះទុន។

លោកបានប្រាប់​ថា ៖ «ការរៀបចំគោលនយោបាយ ច្បាប់ ជារឿងសំខាន់ហើយ ដែលការរៀបចំហេដ្ឋារចនាសម្ព័ន្ធគាំទ្រ រឹតតែសំខាន់ថែមទៀត​ ឯ​​តម្លៃ​អគ្គិសនី អាចជា​កត្តា​គួបផ្សំ​ដ៏​សំខាន់​ក្នុងការ​ទាក់ទាញ​វិនិយោគិន​ក្រៅប្រទេស ព្រោះ​​អគ្គិសនី គឺជា​ធាតុ​ផ្សំ​ដ៏​សំខាន់​សម្រាប់​គ្រប់វិស័យទាំងអស់ ក្រៅពី​ការ​ចំ​ណាយ​លើ​វត្ថុធាតុដើម ​កម្លាំង​ពល​​កម្ម និងបច្ចេកវិទ្យាឌីជីថល​»៕ អត្ថបទដោយ ៖ វណ្ណ សុជាតា​