បរទេស៖ ម៉ិចស៊ិក បានសម្រេចអនុម័តវិធានការដំឡើងពន្ធថ្មីលើការនាំចូលដល់ទៅ ៥០% ដែលប៉ះពាល់ដល់ផលិតផលរាប់រយប្រភេទ ដោយភាគច្រើនមានប្រភពមកពីប្រទេសចិន នេះបើយោងតាមសេចក្ដីរាយការណ៍ពី BBC ។

កាលពីថ្ងៃពុធ សភា ម៉ិចស៊ិក បានអនុម័តទទួលយកសំណើដំឡើងពន្ធលើការនាំចូល ក្នុងគោលបំណងជំរុញផលិតកម្មក្នុងស្រុក។ ការដំឡើងពន្ធថ្មីនេះត្រូវបានកំណត់ឱ្យចូលជាធរមាននៅថ្ងៃទី ១ ខែមករា ឆ្នាំ ២០២៦ ហើយនឹងអនុវត្តចំពោះទំនិញ ដូចជា លោហធាតុ រថយន្ត សំលៀកបំពាក់ និងឧបករណ៍ប្រើប្រាស់ក្នុងផ្ទះ ភាគច្រើនមានប្រភពមកពីប្រទេសចិន។ អត្រាពន្ធនឹងមានរហូតដល់ ៥០% លើផលិតផលជាង ១​ ៤០០ មុខទំនិញ ហើយប្រទេសណាដែលមិនមានកិច្ចព្រមព្រៀងពាណិជ្ជកម្មសេរីជាមួយម៉ិចស៊ិក នឹងរងផលប៉ះពាល់ដូចជា ថៃ ឥណ្ឌា និងឥណ្ឌូនេស៊ីជាដើម។ វិធានការនេះកើតឡើងចំពេលដែលម៉ិចស៊ិក កំពុងចរចាជាមួយអាម៉េរិកជុំវិញអត្រាពន្ធខ្ពស់ដែលប្រធានាធិបតីលោក Donald Trump បានគំរាមដាក់លើប្រទេសនេះ។

កាលពីថ្ងៃព្រហស្បតិ៍ អ្នកនាំពាក្យក្រសួងពាណិជ្ជកម្មរបស់ទីក្រុងប៉េកាំង បានលើកឡើងថា ពន្ធនឹងប៉ះពាល់យ៉ាងខ្លាំងដល់ផលប្រយោជន៍ដល់ដៃគូពាណិជ្ជកម្ម ដោយក្នុងនោះមានប្រទេសចិនផងដែរ។ ទន្ទឹមនឹងនេះ ទីក្រុងប៉េកាំងកំពុងស៊ើបអង្កេតលើគោលនយោបាយពាណិជ្ជកម្មរបស់ម៉ិកស៊ិក និងជំរុញឱ្យប្រទេសនេះកែតម្រូវការសម្រេចចិត្តរបស់ខ្លួនឡើងវិញ។ នៅសប្តាហ៍នេះ ចិនក៏បានផ្តល់សញ្ញាអំពីផែនការរបស់ខ្លួនសម្រាប់ការចូលរួមបន្ថែមទៀតជាមួយបណ្តាប្រទេសនៅអាមេរិកឡាទីន និងការាបៀនផងដែរ ក្នុងគោលបំណងជំរុញទំនាក់ទំនងរបស់ខ្លួនឲ្យកាន់តែស៊ីជម្រៅនៅក្នុងតំបន់នេះតាមរយៈពាណិជ្ជកម្ម និងការច្នៃប្រឌិត។ ក្នុងរយៈពេលប៉ុន្មានឆ្នាំថ្មីៗនេះ ក្រុមហ៊ុនចិនបានពង្រីកទីតាំងរបស់ពួកគេនៅក្នុងប្រទេសម៉ិចស៊ិក ដោយក្នុងនោះមានម៉ាករថយន្តដូចជា BYD និង MG ជាដើម។

យ៉ាងណាមិញ ទី​ក្រុង​វ៉ាស៊ីនតោន ចោទប្រកាន់​ថា ទីក្រុង​ប៉េកាំង​អាច​នឹង​ប្រើ​ម៉ិចស៊ិក​ជា​មធ្យោបាយ​មួយ​ដើម្បី​គេច​ពី​ពន្ធ​របស់​អាម៉េរិក។ ទន្ទឹមនឹងនេះ រដ្ឋាភិបាល​ម៉ិចស៊ិកកំពុងពិភាក្សាជាមួយរដ្ឋបាល Trump ដើម្បីព្យាយាមឲ្យអាម៉េរិកបន្ធូរបន្ថយពន្ធលើខ្លួន ជាពិសេសពន្ធ ៥០% លើការនាំចូលដែក និងអាលុយមីញ៉ូមពីម៉ិចស៊ិក។ មិនត្រឹមតែប៉ុណ្ណោះ លោក Trump ក៏បានគំរាមដាក់ពន្ធបន្ថែមលើម៉ិចស៊ិកផ្អែកលើហេតុផលផ្សេងៗរួមមាន ការយកពន្ធ ២៥% ដែលជាផ្នែកមួយនៃវិធានការរបស់ទីក្រុងវ៉ាស៊ីនតោនដាក់សម្ពាធដល់ប្រទេសនានា ដើម្បីបញ្ឈប់លំហូរនៃសារធាតុ fentanyl ចូលទៅក្នុងទឹកដីអាម៉េរិក។ កាលពីថ្ងៃចន្ទ លោក Trump បានគំរាមដាក់ពន្ធថ្មីថែម ៥% លើម៉ិកស៊ិក ដោយចោទប្រកាន់ថា ប្រទេសនេះរំលោភលើកិច្ចព្រមព្រៀងដែលផ្តល់ឱ្យកសិករអាម៉េរិកទទួលបានទឹកប្រើប្រាស់។ គេយល់ឃើញថា លោក Trump  ចង់សំដៅលើសន្ធិសញ្ញាដែលមានអាយុកាលជាង ៨០ ឆ្នាំ ដែលអនុញ្ញាតឲ្យពលរដ្ឋអាម៉េរិកប្រើប្រាស់ទឹកបានពីដៃទន្លេ Rio Grande ។ យ៉ាងណាមិញ អាម៉េរិកបានចោទប្រកាន់ម៉ិចស៊ិកថាមិនបានបំពេញតាមលក្ខខណ្ឌនៃកិច្ចព្រមព្រៀងនេះអស់ជាច្រើនទសវត្សរ៍មកហើយ ខណៈដែលអាម៉េរិកគឺជាដៃគូពាណិជ្ជកម្មដ៏ធំបំផុតរបស់ប្រទេសនេះ៕