សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្រសួងកសិកម្ម រុក្ខាប្រមាញ់ និងនេសាទ ប្រារព្ធទិវាស្បៀងអាហារពិភពលោក ក្រោមប្រធានបទ «ទឹកជាជីវិត ទឹកជាចំណីអាហារ មិនទុកឱ្យនរណាអត់អាហារឡើយ» ដើម្បីបំផុសស្មារតីយល់ដឹងអំពីតួនាទីវិស័យកសិកម្មក្នុងសន្តិសុខស្បៀង សុវត្ថិភាពចំណីអាហារ សុខុមាលភាព និងអភិវឌ្ឍន៍ជនបទ លើកទី៤៣ ឆ្នាំ២០២៣ នៅក្នុងខេត្តក្រចេះ ។
ឯកឧត្តម យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានបំផុសស្មារតីប្រជាពលរដ្ឋក្នុងមូលដ្ឋានឱ្យយល់ដឹងអំពីតួនាទីនៃវិស័យកសិកម្ម ក្នុងសន្តិសុខស្បៀង សុវត្ថិភាពចំណីអាហារ សុខុមាលភាព និងអភិវឌ្ឍន៍ជនបទ សម្រាប់ឆ្នាំ២០២៣។
ឯកឧត្តមរដ្ឋលេខាធិការ បានបញ្ជាក់បន្ថែមថា ទិវាស្បៀងអាហារពិភពលោកឆ្នាំ២០២៣ មានគោលបំណងបង្ហាញជាសកលអំពីសារៈសំខាន់នៃការគ្រប់គ្រងទឹកប្រកបដោយការប្រុងប្រយ័ត្ន ក្នុងកាលៈទេសៈនៃការប្រឈមមុខនឹងបញ្ហានានា ដូចជាកំណើនប្រជាជនយ៉ាងឆាប់រហ័ស ,ការអភិវឌ្ឍន៍សេដ្ឋកិច្ច នគរូបនីយកម្ម និងការប្រែប្រួលអាកាសធាតុដែលគំរាមគំហែងដល់លទ្ធភាពនៃការប្រើប្រាស់ទឹកផងដែរ។ ចំពោះគោលនយោបាយកសិកម្មរបស់រដ្ឋាភិបាល សម្រាប់អណតិ្តទី៧ ក្រោមការដឹកនាំដោយសម្តេចធិបតី ហ៊ុន ម៉ាណែត ដើម្បីរក្សាបាននូវកំណើនផលិតកម្ម ប្រសិទ្ធភាពសេដ្ឋកិច្ច គុណភាព និងទីផ្សារ ឆ្ពោះទៅធានាបាននូវសុវត្ថិភាព និងសន្តិសុខស្បៀង ដែលជួយដល់ការបង្កើនកម្រិតជីវភាពរបស់ប្រជាពលរដ្ឋ។
ឯកឧត្តម យ៉ង សាំងកុមារ បានបន្តថា ដើម្បីជួយដល់បង្កើនកម្រិតជីវភាពរបស់ប្រជាពលរដ្ឋ ដែលធ្វើឡើងតាមរយ:ការដាក់ពង្រាយមន្ត្រីកសិកម្មឃុំ នៅទូទាំងប្រទេសចំនួន ១៦០០នាក់ ដើម្បីរក្សាស្ថិរភាពតម្លៃកសិកផល ការចងក្រងសហគមន៍កសិកម្ម និងប្រព័ន្ធស្បៀងបម្រុង។
ឯកឧត្តម វ៉ា ថន អភិបាលខេត្តក្រចេះ បានលើកឡើងថា បច្ចុប្បន្ន ស្ថានភាពស្បៀងអាហារក្នុងភូមិសាស្ត្រខេត្តក្រចេះ គឺមានភាពល្អប្រសើរច្រើនដោយសារប្រជាពលរដ្ឋបង្កបង្កើនផលយ៉ាងសកម្ម ព្រមទាំងមានប្រព័ន្ធធារាសាស្ត្រសម្រាប់រក្សាទឹកទុកក្នុងរដូវប្រាំងផងដែរ។
ឯកឧត្តមបានបញ្ជាក់ថា ដើម្បីផ្ដល់ទឹកឱ្យប្រជាពលរដ្ឋប្រើប្រាស់បានគ្រប់គ្រាន់សម្រាប់រដូវប្រាំង រដ្ឋាភិបាលខេត្ត គ្រោងពង្រីកប្រព័ន្ធធារាសាស្ត្រឱ្យបានកាន់តែច្រើនទៅកាន់បណ្ដាឃុំ និងស្រុក នៅទូទាំងខេត្ត។
សូមបញ្ជាក់ថាប្រធានបទខាងលើនេះ បានផ្តោតសំខាន់ក្នុងការគ្រប់គ្រងទឹកប្រកបដោយការប្រុងប្រយ័ត្ន ក្នុងបរិបទនៃកំណើនប្រជាជន ការអភិវឌ្ឍន៍សេដ្ឋកិច្ច នគរូបនីយកម្ម និងការប្រែប្រួលអាកាសធាតុ។ ក្នុងវេទិកាស្បៀងអាហារពិភពលោកខាងលើនេះដែរ ក្រសួងកសិកម្ម រុក្ខាប្រមាញ់ និងនេសាទ ក៏បានចែកគ្រាប់ស្រូវពូជចំនួន ៥តោន និងគ្រាប់ពូជបន្លែមួយចំនួនដល់ប្រជាកសិករ និងសហគមន៍កសិកម្មទាំងអស់ចំនួន ១៥៧នាក់ មកពីភូមិចំនួន ស្ថិតក្នុងស្រុកចិត្របុរី ខេត្តក្រចេះ ដើម្បីដាំដុះនាពេលទឹកស្រកខាងមុខនេះ៕
Account
Security
Favourite Content