សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រោយពីសម្ដេចធិបតី ហ៊ុន ម៉ាណែត ឡើងកាន់តំណែងជានាយករដ្ឋមន្ត្រីនៃព្រះរាជាណាចក្រកម្ពុជា តាំងពីអំឡុងខែសីហា ឆ្នាំ២០២៣ មក សម្ដេចបានអញ្ជើញទៅកាន់ប្រទេសចិនពីរដងរាប់ទាំងលើកនេះ ។ ដំណើរបេសកកម្មរបស់សម្ដេចធិបតី បាននាំមកនូវប្រយោជន៍ធំធេងសម្រាប់ប្រទេសជាតិ ជាក់ស្ដែងក្នុងដំណើរបេសកកម្មជាលើកទី២នេះ កម្ពុជារំពឹងថានឹងទទួលបានវិនិយោគិនចិនជាច្រើនចូលមកបណ្ដាក់ទុនវិនិយោគនៅកម្ពុជា ហើយនឹងរំពឹងថាកម្ពុជាទទួលបានរំហូរទុនវិនិយោគពីចិនរាប់ពាន់លានដុល្លារ ។
ក្នុងពេលសម្ដេចធបិតី ហ៊ុន ម៉ាណែត បានអញ្ជើញទៅប្រទេសចិនភ្លាម សម្ដេចមិនបានបង្អង់យូរឡើយ ដោយបានជួបជាមួយបណ្ដាវិនិយោគិននៅប្រទេសចិន ដែលកំពុងបណ្ដាក់នៅកម្ពុជា និងវិនិយោគិនថ្មីៗរបស់ចិនជាច្រើនទៀត ក្នុងនោះដែរ មានក្រុមហ៊ុនធំៗរបស់ចិនជាច្រើន បានប្ដេជ្ញាក្នុងការបន្ថែមទុនវិនិយោគនៅកម្ពុជារាប់រយរាប់ពាន់លានដុល្លារអាមេរិក ។
នៅក្នុងជំនួបជាមួយក្រុមហ៊ុន CMEC ដែលជាបុត្រសម្ព័ន្ធរបស់ក្រុមហ៊ុន Sinomarch ប្រធានក្រុមប្រឹក្សាភិបាលនៃក្រុមហ៊ុននេះបានជម្រាបជូនសម្ដេចធិបតី ហ៊ុន ម៉ាណែត ថា ក្នុងរយៈពេល១០ឆ្នាំបន្តទៅមុខ ក្រុមហ៊ុននឹងបណ្ដាក់ទុនពង្រីកការវិនិយោគក្នុងទំហំទឹកប្រាក់៣ពាន់លានដុល្លារអាមេរិកទៅលើវិស័យថាមពលហ្កាស់ នៅក្នុងប្រទេសកម្ពុជា ។ ក្នុងនោះដែរ សម្ដេចធិបតីបានស្វាគមន៍ចំពោះការវិនិយោគរបស់ក្រុមហ៊ុនមួយនេះ នៅក្នុងប្រទេសកម្ពុជា ដើម្បីជម្រុញនិងលើកស្ទួយវិស័យសេដ្ឋកិច្ចកម្ពុជាបានមួយម្រិតទៀត ។
ក្រៅពីក្រុមហ៊ុនធំមួយនេះ ក៏មានក្រុមហ៊ុនផ្សេងទៀតរបស់ចិន បានប្ដេជ្ញាក្នុងការបន្ថែមទុនវិនិយោគរបស់ខ្លួន ដោយនឹងសហការជាមួយក្រុមហ៊ុនរបស់កម្ពុជាក្នុងការបង្កើនប្រតិបត្តិការវិនិយោគរួម ក្នុងនោះដែរក្រុមហ៊ុន China Datang Corporation Ltd បានជម្រាបជូនសម្ដេចធិបតីថា ក្រុមហ៊ុនខ្លួននឹងសហការជាមួយក្រុមហ៊ុនក្នុងស្រុករបស់កម្ពុជា បណ្ដាក់ទុនវិនិយោគក្នុងទំហំទឹកប្រាក់៦០០លានដុល្លារអាមេរិក ។
ក្រៅពីនេះមានក្រុមហ៊ុនជាច្រើនទៀត ក៏បានជួបពិភាក្សាជាមួយសម្ដេចធិបតី ហ៊ុន ម៉ាណែត និងជម្រាបពីគម្រោងវិនិយោគនៅពេលអនាគត ក្នុងនោះដែរ លទ្ធផលធំមួយគឺផលិតផលខ្មែរជាច្រើននឹងបង្ហាញវត្តមានលើផ្សារអនឡាញរបស់ក្រុមហ៊ុនយក្ស Alibaba របស់ចិន ដែលរំពឹងថាទីផ្សារនៃផលិតផលរបស់ខ្មែរនឹងកាន់តែទូលាយបន្ថែមទៀត ដែលជាក្ដីរំពឹងសម្រាប់អ្នកផលិតក្នុងស្រុក ។
វិនិយោគិនក្នុងស្រុកជាច្រើនក៏បានបង្ហាញពីសុទិដ្ឋិនិយមខ្ពស់ចំពោះដំណើរទស្សនកិច្ចនិងបេសកកម្មរបស់មេដឹកនាំកម្ពុជាទៅកាន់ឆាកអន្តរជាតិ ដោយនឹងនាំមកនូវឧត្តមប្រយោជន៍ដល់ជាតិមាតុភូមិ ជាពិសេសនឹងអាចជួយលើកស្ទួយសេដ្ឋកិច្ចកម្ពុជា ដែលទើបងើបចេញពីវិបត្តិ ឱ្យកាន់តែមានប្រសើរឡើងបន្ថែមទៀត ៕
Account
Security
Favourite Content