សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
គោលនយោបាយជាតិស្ដីពីកម្មសិទ្ធិបញ្ញា ដែលជាគោលនយោបាយសម្រាប់ការពារផលប្រយោជន៍អ្នកប្រើប្រាស់ ក៏ដូចជាប្រឆាំងនឹងការធ្វើចរាចរណ៍នៃផលិតផលក្លែងក្លាយ កំពុងត្រូវបានក្រសួង ពាណិជ្ជកម្មត្រៀមដាក់ជូនកិច្ចប្រជុំពេញអង្គគណៈរដ្ឋមន្ត្រីក្នុងពេលឆាប់ៗខាងមុខ។
គោលនយោបាយថ្មីសម្រាប់ឆ្នាំ២០២៣-២០២៨ ជាការរឹតបន្តឹងបន្ថែម ក៏ដូចជាពង្រឹងនូវការអនុវត្តច្បាប់កម្មសិទ្ធិបញ្ញាឱ្យកាន់តែមានប្រសិទ្ធភាពខ្ពស់។ ដោយឡែក ដើម្បីឈានដល់ការអនុវត្តដែលមានប្រសិទ្ធភាពខ្ពស់ គេត្រូវជំរុញការចុះបញ្ចីម៉ាកសម្គាល់ភូមិសាស្ត្រ ក្នុងនោះក៏ត្រូវជំរុញសហគ្រាសធនតូច និងមធ្យមឱ្យប្រើប្រាស់កម្មសិទ្ធិបញ្ញាដើម្បីលើកកម្ពស់ភាពប្រកួតប្រជែងផងដែរ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានឱ្យដឹងថា ការរឹតបន្តឹងការអនុវត្តគោលនយោបាយថ្មីនេះ បើមានគឺពិតជាល្អណាស់ ព្រោះវាជាខែលការពារផលប្រយោជន៍របស់ផលិតផលក្នុងស្រុក។
លោកឧកញ៉ាបន្តមានប្រសាសន៍ថា ៖
“វាមិនមែនជួយតែសម្រាប់កសិកម្មទេ វាជួយដល់ផ្នែកឧស្សាហកម្មកែច្នៃ ផលិតផលកសិកម្ម វត្ថុធាតុដើមផ្សេងៗដែលយើងមានស្រាប់ក្នុងប្រទេស ហើយដែលក្រុមហ៊ុនសហគ្រាសខំកែច្នៃដើម្បីផលិតជាផលិតផលរៀងៗខ្លួននោះ ត្រូវតែមានការការពារកម្មសិទ្ធិបញ្ញាជូនគាត់ ដើម្បីធានាដល់និរន្តរភាព និងការប្រកួតប្រជែងដោយស្មើភាពរបស់អាជីវករទាំងអស់ ទាំងការនាំចូល និងនាំចេញ។”
លោកឧកញ៉ាក៏បានរំលេចពីផលចំណេញលើសហគ្រាសធនតូច និងមធ្យមផងដែរថា គោលនយោបាយនេះនឹងជួយដល់ SME ក្នុងកិច្ចការពារផលប្រយោជន៍អ្នកវិនិយោគពីបរទេសដែលមកដំណើរការផលិតកម្មនៅក្នុងប្រទេសកម្ពុជា ខណៈដែលចំណុចនេះ នឹងអាចទាក់ទាញវិនិយោគិនបរទេសមកវិនិយោគក្នុងស្រុកកាន់តែច្រើនថែមទៀត។
លោកឧកញ៉ាបន្តថា ៖
“នេះជាការទាក់ទាញវិនិយោគិនបន្ថែមទៀត និងលើកទឹកចិត្តបន្ថែមទៀតសម្រាប់ទាំងវិនិយោគិនក្នុងស្រុក និងបរទេសដើម្បីបង្កើតផលិតផលថ្មីៗ និងជាស្នាដៃរបស់ខ្លួន ដើម្បីជាផលប្រយោជន៍សេដ្ឋកិច្ចជាតិយើងផង ហើយក៏ជាស្នាដៃសម្រាប់ប្រទេសជាតិយើងផង ហើយការចុះកម្មសិទ្ធិបញ្ញារក្សាតម្លៃ មិនត្រឹមតែផលិតផលនោះទេ ថែមទាំងរក្សាបាននូវវប្បធម៌ អរិយធម៌ រួមទាំងសិល្បៈ និងកីឡាផងដែរ។”
ក្នុងនោះផងដែរ អ្នកជំនាញសេដ្ឋកិច្ចខាងលើក៏បានលើកឡើងអំពីផ្នែកមួយនៃគោលនយោបាយជាតិស្ដីពីកម្មសិទ្ធិបញ្ញា គឺច្បាប់ការពារអ្នកប្រើប្រាស់ និងការប្រកួតប្រជែងដោយស្មើភាពគ្នា។ ត្រង់ចំណុចនេះ លោកឧកញ៉ា លឹម ហេង បានបញ្ជាក់ថា មិនគួរមានការចុះបញ្ជីកម្មសិទ្ធិបញ្ញាសម្រាប់ផលិតផលនាំចូលនោះទេ ក្រោមមូលហេតុថាវានឹងធ្វើឱ្យរាំងស្ទះដល់ការអភិវឌ្ឍសេដ្ឋកិច្ចផ្ទៃក្នុង។ ដោយឡែក សម្រាប់អ្នកធ្វើការក្នុងវិស័យ SME ក៏កំពុងទទួលបានការជំរុញឱ្យចុះបញ្ជីសម្គាល់ម៉ាកសញ្ញាផងដែរ ខណៈដែលអ្នកធ្វើការក្នុងវិស័យនេះបានកើនឡើងរហូតដល់ជាង ៧៣ម៉ឺន សហគ្រាសទៅហើយ៕
Account
Security
Favourite Content