សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រឹត្តិការណ៍សង្ក្រាន្តឆ្នាំថ្មី២០២៣ បានទាក់ទាញទេសចរ និងបង្កើតឱ្យមានរំហូរសាច់ប្រាក់ ធ្វើឱ្យចរន្តសេដ្ឋកិច្ចមានភាពល្អប្រសើរជាងឆ្នាំមុន ដែលបានបញ្ចប់ទៅជាមួយនឹងស្នាមញញឹមរបស់ប្រជាពលរដ្ឋទូទៅ ក៏ដូចជាបណ្តាទេសចរជាតិ និងអន្តរជាតិគួរឱ្យកត់សម្គាល់។
លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានលើកឡើងថា សង្រ្កាន្តឆ្នាំថ្មី២០២៣នេះ ហាក់មានសកម្មភាពផុសផុលយ៉ាងខ្លាំង ទាំងនៅរាជធានី និងនៅតាមបណ្តាខេត្តផ្សេងៗ ហើយទិដ្ឋភាពទាំងអស់នេះបានលេចចេញជារូបរាងដោយសារកិច្ចខិតខំប្រឹងប្រែងរបស់ប្រមុខរាជរដ្ឋាភិបាលក្នុងការដឹកនាំ និងប្រើយុទ្ធសាស្ត្រ ព្រមគ្នាជាមួយនឹងវិធានការដ៏ប្រសើរជាច្រើន រហូតធ្វើឱ្យកម្ពុជាគេចចេញពីភាពប្រឈមប្រកបដោយប្រសិទ្ធភាពខ្ពស់។
លោកបណ្ឌិតបានកត់សម្គាល់ថា ៖
“ជាទិដ្ឋភាពសេដ្ឋកិច្ច យើងអាចនិយាយបានថាជាស្ថានភាពមួយដែលជួយជំរុញឱ្យមានរំហូរ និងចរន្តសាច់ប្រាក់តាមរយៈការចំណាយចាយវាយផ្សេងៗរបស់ទេសចរទាំងជាតិ និងអន្តរជាតិ ដែលជះឥទ្ធិពលល្អទៅដល់បណ្តាម្ចាស់អាជីវកម្មតូចធំ ដែលស្ថិតនៅក្នុងផ្នែកសេដ្ឋកិច្ចក្រៅប្រព័ន្ធ ដូចជាការលក់ចំណីអាហារ ការផ្តល់សេវាកម្មនានានៅក្នុងឱកាសនៃពិធីបុណ្យចូលឆ្នាំរយៈពេល៣ថ្ងៃកន្លងទៅនេះ”
លោកបណ្ឌិត ហុង វណ្ណៈ បានមានប្រសាសន៍បន្តថា ៖
“ការចំណាយ និងតម្រូវការ គឺធ្វើឱ្យមានរំហូរសាច់ប្រាក់ ហើយថវិកាទាំងនោះបានចាក់ចូលទៅក្នុងសកម្មភាពសេដ្ឋកិច្ចសង្គមរបស់កម្ពុជាយើង ដែលធ្វើឱ្យសេដ្ឋកិច្ចយើងដើរ នាំឱ្យមានចរន្តសេដ្ឋកិច្ចល្អប្រសើរ។ ដោយឡែក សម្រាប់ការចេញដំណើរកម្សាន្តរបស់ប្រជាពលរដ្ឋក្នុងស្រុក ក៏មានកំណើនច្រើនដែរ នៅតាមតំបន់កម្សាន្តនានា ដែលជាគោលដៅទេសចរណ៍សំខាន់ៗ ដូចជា ខេត្តព្រះសីហនុ, ខេត្តសៀមរាប, បាត់ដំបង, កែប, កំពត និងខេត្តដែលមានសហគមន៍ទេសចរណ៍ធម្មជាតិដ៏សម្បូរបែប”
សូមបញ្ជាក់ថា នៅក្នុងព្រឹត្តិការណ៍អង្គរសង្រ្កាន្តឆ្នាំ២០២៣នេះ មានទស្សនីយភាពវប្បធម៌ជាច្រើនត្រូវបានបង្ហាញ រួមមានដូចជា ល្បែងប្រជាប្រិយ របាំបុរាណ របាំប្រពៃណី ការបង្ហាញពីជីវភាពរស់នៅរបស់ប្រជាជនកម្ពុជានៅតាមតំបន់ នៅតាមសហគមន៍ សិល្បៈទស្សនីយភាពផ្ទះខ្មែរ សិល្បៈទស្សនីយភាព ផ្ទះសេដ្ឋី ផ្ទះនំ និងសាលាឆទានជាដើម សម្រាប់ភ្ញៀវទេសចរទស្សនាកម្សាន្ត ហើយអ្វីដែលជាពិសេសនោះ កម្ពុជាថែមទាំងបានបំបែកឯទគ្គកម្មពិភពលោកចំនួន២បន្ថែមទៀត រួមមានការរាំចង្វាក់ម៉ាឌីហ្សុនចំនួន៤៤៤៩នាក់ និងការបត់រូបបេះដូងច្រើនជាងគេលើពិភពលោក។
យោងតាមរបាយការណ៍ក្រសួងទេសចរណ៍បានបង្ហាញថា រយៈពេលបីថ្ងៃនៃបុណ្យចូលឆ្នាំថ្មីប្រពៃណីជាតិខ្មែរ កម្ពុជាបានទទួលទេសចរសរុបជាង១៣លាននាក់ដែលជាចំនួនលើសការរំពឹងទុក ដោយនៅក្នុងនោះភ្ញៀវទេសចរជាតិមានចំនួន ១៣ ១៣២ ០៨០នាក់ និងភ្ញៀវអន្តរជាតិមានចំនួន ៥៥ ៦៩១នាក់។ ដោយឡែកខេត្តគោលដៅទេសចរណ៍ដែលមានភ្ញៀវទេសចរច្រើនជាងគេ គឺខេត្តសៀមរាប ខេត្តបាត់ដំបង ខេត្តកំពង់ចាម ហើយបន្ទាប់មកគឺរាជធានីភ្នំពេញ៕
Account
Security
Favourite Content