សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតត្រឹមថ្ងៃទី១៩ ខែមេសា ឆ្នាំ២០២៣នេះ កម្ពុជានៅសល់ត្រឹមតែ១៦ថ្ងៃទៀតប៉ុណ្ណោះនឹងត្រូវដល់ពេលនៃការ ប្រារព្ធព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ហើយ។ ក្នុងរយៈពេលដែលកាន់តែខើចនេះ កម្ពុជាក្នុងនាមជាម្ចាស់ផ្ទះ បាន និងកំពុងដុតដៃដុតជើងរៀបចំទទួលស្វាគមន៍ប្រតិភូកីឡា ជាពិសេសទីតាំងសម្រាប់ប្រកួតកីឡានានាគ្រប់វិញ្ញាសារ។
ពាក់ព័ន្ធនឹងការរៀបចំនេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ CAMSOC-CAMAPGOC មានប្រសាសន៍នាថ្ងៃទី១៩ ខែមេសា នេះថា ការត្រួតពិនិត្យទីលានប្រកួតនានាសម្រាប់ការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ ត្រូវបានធ្វើឡើងជាបន្តបន្ទាប់ ហើយពេលនេះបានចប់សព្វគ្រប់រៀបរយអស់ហើយ។
សម្តេចពិជ័យសេនា ទៀ បាញ់ មានប្រសាសន៍ទៀតថា ៖
“ពេលវេលាយើងជិតមកដល់ហើយ ជាពិសេសគឺព្រឹត្តិការណ៍ប្រកួតស៊ីហ្គេម លើកទី៣២ នៅសល់តែ១៥ថ្ងៃទៀតប៉ុណ្ណោះ ដូច្នេះគ្រប់គណៈកម្មការ ក៏ដូចជាគ្រប់ផ្នែកនានា កំពុងមមាញឹកមែនទែនក្នុងការត្រួតពិនិត្យគ្រប់ផ្នែក គ្រប់វិស័យទាំងអស់ ជាពិសេសគឺទីលានប្រកួត ត្រូវតែរួចរាល់មុនអ្វីៗទាំងអស់ ដើម្បីធានាឱ្យបានស្អាត អនាម័យ ព្រមទាំងត្រឹមត្រូវតាមស្តង់ដាអន្តរជាតិផងដែរ។ ជារួម គឺគ្រប់ទិសទីទាំងអស់ យើងបានត្រួតពិនិត្យជាបន្តបន្ទាប់រួចរាល់ចប់សព្វគ្រប់អស់ហើយ ដោយនៅសល់តែការសម្អាតអនាម័យ តុបតែងស្លាកសញ្ញា និមិត្តសញ្ញាឱ្យកាន់តែស្រស់ប្រិមប្រិយប៉ុណ្ណោះ”
សម្ដេចពិជ័យសេនាក៏បានគូសបញ្ជាក់ដែរថា គ្រប់ទីកន្លែងប្រកួតទាំងអស់ គឺបានរៀបរយរួចរាល់ជិត១០០ភាគរយហើយ។ រីឯទីលានប្រកួតនៃកីឡដ្ឋានស្តាតចាស់សម្រាប់ប្រកួតបាល់ទាត់នារី ដែលពីមុនគណៈកម្មាការរៀបចំមានក្តីបារម្ភថាអាចប្រកួតបាន១ពេល ពេលនេះគឺបានដោះស្រាយទាន់ពេលវេលាហើយ តាមរយៈការបំពាក់ភ្លើងបំភ្លឺ ដើម្បីអាចប្រកួតបាន២ពេល ឱ្យស្របតាមស្តង់ដា សំដៅធានាឱ្យការប្រកួតនៅទីលានមួយនេះប្រកបដោយភាពរលូន។
ដោយឡែក ទីលានបាល់ទាត់មាន៤កន្លែងសម្រាប់បម្រើដល់ការប្រកួតកីឡាស៊ីហ្គេមលើកទី៣២ ឆ្នាំ២០២៣ គឺនៅស្តាតចាស់ ពហុកីឡដ្ឋានជាតិ (អូឡាំពិក) កីឡដ្ឋានភ្នំពេញក្រោន កីឡដ្ឋានព្រីនស៍ ហើយប្រភេទកីឡាបាល់ទាត់ ត្រូវដំណើរការប្រកួតមុនគេ ដោយនឹងចាប់ផ្តើមប្រកួត ពីថ្ងៃទី២៩ ខែមេសា ឆ្នាំ២០២៣។
គួរបញ្ជាក់ថា ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នេះមានប្រទេសចំនួន១១ចូលរួមប្រកួតប្រជែងលើប្រភេទកីឡាចំនួន៣៧ ស្មើនឹង ៥៨១វិញ្ញាសា ដែលត្រូវបានអនុម័តដោយក្រុមប្រឹក្សាសហព័ន្ធកីឡាអាស៊ីអាគ្នេយ៍។ ព្រឹត្តិការណ៍ស៊ីហ្គេមនេះ នឹងដំណើរការជាផ្លូវការ ពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣។
ចំណែកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ សម្រាប់ក្រុមអត្តពលិកជនពិការ នឹងដំណើរការជាផ្លូវការពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣ ដោយមាន១៣ប្រភេទកីឡាស្មើនឹង ៤៣១វិញ្ញាសា។ ចំពោះប្រតិភូកីឡាទាំង១១ប្រទេស រួមទាំងម្ចាស់ផ្ទះកម្ពុជា ដែលត្រៀមចូលរួមប្រកួតប្រជែងមេដាយស៊ីហ្គេម-អាស៊ានប៉ារ៉ាហ្គេម ជាប្រវត្តិសាស្ត្រលើកដំបូង នៅកម្ពុជានេះ មានចំនួនសរុប ១២ ៤០៤នាក់៕
Account
Security
Favourite Content