សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពពី Investing រាយការណ៍ថា តម្លៃប្រេងឡើងថ្លៃនៅតែបន្តឡើងថ្លៃដល់កម្រិតខ្ពស់បំផុតក្នុងរយៈពេលបីសប្តាហ៍កន្លងមកនេះ។
តម្លៃប្រេងឆៅ Brent ដែលជាស្តង់ដារអន្តរជាតិបានកើនឡើង ០,៩ ភាគារយ ឬ ៩៥,២៦ ដុល្លារក្នុងមួយបារ៉ែល ចំណែកឯតម្លៃប្រេងឆៅអាមេរិក West Texas Intermediate (WTI) កើនឡើង ១,៥ ភាគរយ ឬ ៩២,៨៦ ដុល្លារក្នុងមួយបារ៉ែល។ បើធៀបទៅនឹងត្រីមាសមុន តម្លៃប្រេងទាំងពីរនេះកើនឡើងប្រហែល ២៥ ភាគរយ ដោយសារការរឹតបន្តឹងនៃការផ្គត់ផ្គង់ ខណៈដែលតម្រូវការនៅតែមានកម្រិតខ្ពស់។ លើសពីនេះ តួលេខបច្ចុប្បន្នគឺជាកម្រិតខ្ពស់បំផុតក្នុងរយៈពេលជិតមួយឆ្នាំកន្លងមកនេះ។
មិនត្រឹមតែប៉ុណ្ណោះ ការកាត់បន្ថយផលិតកម្មប្រេងរបស់ OPEC+នឹងជំរុញឱ្យមានការខ្វះខាតការផ្គត់ផ្គង់យ៉ាងខ្លាំងរហូតដល់ត្រីមាសទី៤។ ទន្ទឹមនឹងនេះ អារ៉ាប៊ីសាអូឌីតកាត់បន្ថយផលិតកម្ម និងការនាំចេញប្រេងចំនួន ១ លានបារ៉ែលក្នុងមួយថ្ងៃ និង ៣ សែនបារ៉ែលបន្ថែមទៀតពីប្រទេសរុស្ស៊ី។ ការកាត់បន្ថយនេះត្រូវបានបន្តរហូតដល់ខែធ្នូឆ្នាំនេះក្នុងគោលបំណងគាំទ្រដល់ស្ថិរភាព និងតុល្យភាពនៃទីផ្សារប្រេង។ កាលពីសប្តាហ៍មុន ស្តុកប្រេងឆៅរបស់អាមេរិកបានធ្លាក់ចុះប្រហែល ៥,២៥ លានបារ៉ែល ដែលលើសពីការរំពឹងទុករបស់អ្នកវិភាគថា វានឹងធ្លាក់ចុះ ២,២ លានបារ៉ែលប៉ុណ្ណោះ។ ការធ្លាក់ចុះដ៏ខ្លាំងនៃស្តុកប្រេង និងការធ្លាក់ចុះនៃទិន្នផលថ្ម Shale របស់អាមេរិកបានបន្ថែមពីលើការព្រួយបារម្ភអំពីការរឹតងបន្តឹងផលិតកម្មប្រេងដោយអារ៉ាប៊ីសាអូឌីត និងរុស្ស៊ី។
លោក Mike Wirth នាយកប្រតិបត្តិនៃក្រុមហ៊ុន Chevron បានលើកឡើងថា៖ តម្លៃប្រេងអាចនឹងឡើងថ្លៃដល់ ១០០ ដុល្លារក្នុងមួយបារ៉ែល។
លើសពីនេះផងដែរ និន្នាកានៃការឡើងថ្លៃតម្លៃប្រេងអាចបង្កជាបញ្ហាប្រឈមសម្រាប់ធនាគារកណ្តាលអាមេរិក ខណៈដែលខ្លួនកំពុងបង្កើនអត្រាការប្រាក់ដើម្បីទប់ស្កាត់អតិផរណា។ យ៉ាងណាមិញ គេរំពឹងថា ធនាគារកណ្តាលអាមេរិកអាចនឹងផ្អាកលើការដំឡើងអត្រាការប្រាក់បន្ថែមទៀតក្នុងកិច្ចប្រជុំសប្តាហ៍នេះ។ លើសពីនេះ គេរំពឹងផងដែរថា ការធ្លាក់ចុះសេដ្ឋកិច្ចនៅអឺរ៉ុប និងចិនអាចនឹងដាក់សម្ពាធឲ្យតម្លៃប្រេងធ្លាក់ចុះនៅប៉ុន្មានខែខាងមុខនេះ ហើយកំណើនសេដ្ឋកិច្ចយឺតអាចនឹងកាត់បន្ថយតម្រូវការថាមពល៕
Account
Security
Favourite Content