សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពី Oil Price បានរាយការណ៍ថា តម្លៃប្រេងបានបន្តឡើងថ្លៃជាង១ដុល្លារក្នុង១បារ៉ែលនៅដើមឆ្នាំ២០២៥ នេះ ខណៈដែលការព្យាករណ៍របស់ទីផ្សារមានភាពវិជ្ជមានទៅលើកំណើនសេដ្ឋកិច្ច និងតម្រូវការប្រេងកាន់តែខ្លាំង។
ថ្មីៗនេះ តម្លៃប្រេងបានឡើងថ្លៃបន្ថែមជាង ១ ដុល្លារក្នុងមួយបារ៉ែល ខណៈដែលការអ្នកវិនិយោគព្យាករណ៍ពីភាពវិជ្ជមានលើសេដ្ឋកិច្ចចិន និងតម្រូវការប្រេងរបស់ចិនអាចនឹងកើនឡើងវិញ។ តម្លៃប្រេងឆៅម៉ាក Brent ឡើងថ្លៃ ១,២៩ ភាគរយ ឬ ៧៥,៩៣ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក West Texas Intermediate (WTI) ឡើងថ្លៃ ១,៤១ ភាគរយ ឬ ៧៣,១៣ ដុល្លារក្នុងមួយបារ៉ែល។ កាលពីឆ្នាំ ២០២៤ តម្លៃប្រេងមានភាពឡើងចុះមិនច្បាស់លាស់ ដោយសារមានការព្រួយបារម្ភអំពីតម្រូវការនៅក្នុងប្រទេសចិន និងសេដ្ឋកិច្ចនៅតាមបណ្តាប្រទេសសំខាន់ៗផ្សេងទៀត។ តម្លៃប្រេងបានធ្លាក់ចុះប្រចាំឆ្នាំជាលើកទី២ជាប់ៗគ្នា ដោយបានធ្លាក់ចុះប្រហែល ៣ ភាគរយ បើគិតចាប់តាំងពីឆ្នាំ២០២៣។
កាលពីថ្ងៃព្រហស្បតិ៍ សប្ដាហ៍នេះ ដែលជាថ្ងៃជួញដូរដំបូងនៃឆ្នាំ២០២៥ តម្លៃប្រេងបានកើនឡើងនៅក្នុងទីផ្សារអាស៊ី ខណៈដែលទីផ្សាររំពឹងថា ចិននឹងដាក់ចេញវិធានការបន្ថែមដើម្បីជំរុញកំណើនសេដ្ឋកិច្ចរបស់ខ្លួននៅឆ្នាំនេះ។
ប្រធានាធិបតីចិន លោក Xi Jinping បាននិយាយនៅក្នុងសុន្ទរកថាឆ្នាំថ្មីថា ចិននឹងមានវិធានការជំរុញភាពសកម្មបន្ថែមទៀត ដើម្បីគាស់កំណើនសេដ្ឋកិច្ចនៅឆ្នាំ២០២៥ ។ លើសពីនេះ ប្រធានាធិបតីរូបនេះក៏បានបង្ហាញពីក្ដីសង្ឃឹមថា ចិនអាចនឹងសម្រេចគោលដៅកំណើនសេដ្ឋកិច្ច ៥ ភាគរយជាផ្លូវការក្នុងឆ្នាំ២០២៤។
ទន្ទឹមនឹងនេះ ទិន្នន័យនៃការប្រើប្រាស់ប្រេងផ្លូវការពីសហរដ្ឋអាម៉េរិកក៏បានជំរុញឱ្យមានទីផ្សារប្រេងមានភាពវិជ្ជមានផងដែរ។ ជាក់ស្ដែង កាលពីដើមសប្តាហ៍នេះ ទិន្នន័យពីរដ្ឋបាលព័ត៌មានថាមពល (EIA) បានបង្ហាញថា កាលពីខែតុលា ឆ្នាំ២០២៤ តម្រូវការប្រេងសរុបរបស់អាម៉េរិកបានកើនឡើងជាង ២១ លានបារ៉ែលក្នុងមួយថ្ងៃ ដែលជាបរិមាណខ្ពស់បំផុតនៃផលិតផលប្រេងឆៅ និងប្រេងសរុបសម្រាប់ផ្គត់ផ្គង់។ ជាមួយនឹងតុល្យភាពរវាងការផ្គត់ផ្គង់ និងការងើបឡើងវិញនៃសេដ្ឋកិច្ច គេព្យាករណ៍ថា តម្លៃប្រេងឆៅនឹងឡើងថ្លៃបន្ថែម ខណៈដែលកត្តាភូមិសាស្ត្រ និងសេដ្ឋកិច្ចសកលអាចនឹងមានភាពល្អប្រសើរជាងឆ្នាំកន្លងទៅ៕
Account
Security
Favourite Content