ភ្នំពេញ៖ ក្នុងជំនួបជាមួយសម្តេច​អគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី និងជាប្រធានព្រឹទ្ធសភានៃកម្ពុជា នៅវិមានសន្តិភាព រាជធានីភ្នំពេញ កាលពីព្រឹកថ្ងៃទី៨ ខែកញ្ញា ឆ្នាំ២០២៥ ឯកឧត្តមប្រធានាធិបតីហ្វីលីពីន Ferdinand Romualdez Marcos Jr. បានបញ្ជាក់ថា ហ្វីលីពីន ក្នុងនាមជាសមាជិកអាស៊ាន នឹងខិតខំប្រឹងប្រែងឱ្យអស់ពីលទ្ធភាពដើម្បីជួយឱ្យកម្ពុជា និងថៃ អាចដោះស្រាយបញ្ហាព្រំដែនដោយសន្តិវិធី និងវិលត្រឡប់ទៅរកស្ថានភាពប្រក្រតីវិញ ព្រមទាំងជំរុញកំណើនពាណិជ្ជកម្មកម្ពុជា-ហ្វីលីពីនផងដែរ។

យោងតាម ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងនៅក្រោយជំនួបថា សម្ដេចតេជោ ហ៊ុន សែន ក្នុងព្រះបរមនាមព្រះមហាក្សត្រកម្ពុជា បានសម្ដែងនូវកិច្ចស្វាគមន៍យ៉ាងកក់ក្ដៅ និងនាំនូវការសួរសុខទុក្ខពីសំណាក់ព្រះមហាក្សត្រនៃកម្ពុជា ជូនចំពោះ លោកប្រធានាធិបតីហ្វីលីពីន ដែលបានអញ្ជើញមកបំពេញទស្សនកិច្ចផ្លូវរដ្ឋនៅកម្ពុជា ហើយក្នុងនាមសម្ដេចផ្ទាល់ ក៏បានបង្ហាញនូវក្ដីរីករាយ និងស្វាគមន៍ចំពោះលោកប្រធានាធិបតីផងដែរ ។ សម្ដេច​តេជោ បានចាត់ទុកដំណើរអញ្ជើញមកបំពេញទស្សនកិច្ចរបស់លោកប្រធានាធិបតីហ្វីលីពីន មកកាន់កម្ពុជា ជាផ្នែកដ៏សំខាន់នៃការរុញទំនាក់ទំនងរវាងកម្ពុជា និងហ្វីលីពីន ឲ្យកាន់តែរីកចម្រើន ។

នៅក្នុងឱកាសនោះ លោក ម៉ាកូស (Ferdinand Romualdez Marcos Jr.) បានសម្តែងនូវការអរគុណ និងបានផ្ដាំផ្ញើតាមរយៈសម្ដេចប្រមុខរដ្ឋស្តីទី ថ្វាយចំពោះព្រះមហាក្សត្រ ក្នុងការសាកសួរសុខទុក្ខពីលោកផ្ទាល់ ហើយលោកក៏បានបង្ហាញនូវក្តីរីករាយនៅ​ពេលបានអញ្ជើញមកដល់កម្ពុជា និងបានឃើញមានយុវជន ប្រជាពលរដ្ឋខ្មែរ បានស្វាគមយ៉ាងកក់ក្តៅ ដែលធ្វើឲ្យលោក និងគណៈប្រតិភូមានការរំភើបចិត្តយ៉ាងខ្លាំងចំពោះបដិសណ្ឋារកិច្ចដ៏ល្អប្រសើររបស់ប្រជាជន និងរដ្ឋាភិបាលកម្ពុជា។

ឯកឧត្តមបានឱ្យដឹងទៀតថា ក្នុងឱកាសជាមួយគ្នានេះ សម្ដេចតេជោ ក៏បានចែករំលែកអំពីវិស័យទេសចរណ៍ ដែលភាគីទាំងពីរត្រូវពង្រឹងជាមួយគ្នាក្នុងការផ្លាស់ប្ដូរប្រជាជន និងប្រជាជន ដោយសម្ដេចតេជោ បានកត់សម្គាល់ និងអរគុណចំពោះលោក ម៉ាកូស ដែលបានចុះចតយន្តហោះនៅអាកាសយានដ្ឋានអន្តរជាតិភ្នំពេញ ក្នុងឱកាសមកបំពេញទស្សនកិច្ចនៅកម្ពុជា ដោយសម្ដេចតេជោ បញ្ជាក់ថា នៅពេលលោកអញ្ជើញនិវត្តន៍វិញ នឹងធ្វើដំណើរតាមអាកាសយានដ្ឋានអន្តរជាតិថ្មីរបស់កម្ពុជា គឺអាកាសយានដ្ឋានអន្តរជាតិតេជោដែលជាការសម្ពោធ ខណៈដែលលោកគឺជាប្រធានាធិបតីទី១ ដែលបានហោះហើរចេញពីអាកាសអន្តរជាតិតេជោ ដែលបង្ហាញពីទំនាក់ទំនងដ៏ល្អប្រសើរ។

លោក ម៉ាកូស ក៏បានលើកឡើងដោយឯកភាពនូវអ្វីដែលជាការលើកឡើងរបស់សម្ដេចតេជោ ដោយបញ្ជាក់អំពីភាគីទាំងពីរត្រូវបង្កើននូវទំនាក់ទំនងជាមួយគ្នាឲ្យកាន់តែល្អប្រសើរជាងនេះ ជាពិសេសគឺផ្ដោតទៅលើពាណិជ្ជកម្មរវាងកម្ពុជា និងហ្វីលីពីន ឲ្យកាន់តែរីកចម្រើនបន្ថែមទៀតលើទំហំពាណិជ្ជកម្ម ជាងនេះទៀតគឺកិច្ចសហប្រតិបត្តិការគ្នានៅក្នុងវិស័យទេសចរណ៍ដែលភាគីទាំងពីរត្រូវរួមគ្នាបន្ថែម។

លោក ម៉ាកូស បានចាត់ទុកអាកាសយានដ្ឋានថ្មីរបស់កម្ពុជា ជាផ្នែកមួយនៃការបង្កើននូវវិស័យទេសចរណ៍រវាងប្រទេសទាំងពីរ ដែលលោកសង្ឃឹមថា វិស័យទេសចរណ៍រវាងប្រទេសទាំងពីរ នឹងមានការរីកចម្រើនតាមរយៈការពង្រីកទំនាក់ទំនងរវាងប្រទេសទាំងពីរ ហើយក៏តាមរយៈអាកាសយានដ្ឋានអន្តរជាតិតេជោនេះផងដែរ ៕