បរទេស៖ យោងតាមប្រភពព័ត៌មានពី BBC បានរាយការណ៍ថា ការដំឡើងពន្ធគយរបស់ប្រធានាធិបតីអាម៉េរិក Donald Trump បានជំរុញឲ្យអ្នកនាំចេញសម្រេចចិត្តបង្វែរទិសដៅទៅកាន់ប្រទេសផ្សេងទៀតជាពិសេសចិន ដែលអាចជំរុញឲ្យទំនិញជាច្រើនប្រភេទកាន់តែមានតម្លៃថ្លៃសម្រាប់អ្នកទិញអាម៉េរិកផងដែរ។

ប្រេស៊ីល ដែលជាប្រទេសផលិតកាហ្វេដ៏ធំបំផុតរបស់ពិភពលោក ត្រូវបានអាម៉េរិកសម្រេចដំឡើងអត្រាពន្ធគយខ្ពស់បំផុតរហូតដល់ទៅ ៥០% ដែលធ្វើឲ្យអ្នកផលិតរបស់ប្រេស៊ីលមិនសូវចង់នាំចេញទំនិញទៅកាន់មហាអំណាចមួយនេះទេ ខណៈដែល ចិន បានក្លាយជាគោលដៅសម្រាប់អ្នកនាំចេញកាហ្វេរបស់ប្រេស៊ីលជំនួសអាម៉េរិក ដោយសារនិន្នាការហាងកាហ្វេកំពុងរីកចម្រើន និងជាទីផ្សារដ៏ធំសម្បើម។

កាលពីខែកក្កដាកន្លងទៅនេះ នៅពេលដែលអ្នកនាំចេញបានត្រៀមលក្ខណៈសម្រាប់ពន្ធចូលជាធរមាន ក្រុមហ៊ុនកាហ្វេប្រេស៊ីលជាង ១៨០ បានចុះឈ្មោះដើម្បីនាំចេញទៅកាន់ប្រទេសចិន។ អ្នកជំនួញគ្រាប់កាហ្វេ Hugo Portes បានលើកឡើងថា គោលបំណងនៃការដំឡើងពន្ធគឺចង់ធ្វើឱ្យប្រេស៊ីលចុះខ្សោយ ប៉ុន្តែតាមពិតវាកំពុងជំរុញអ្នកលក់ឱ្យខិតទៅរកប្រទេសចិន ហើយអាចនឹងបើកឱកាសឲ្យពួកគេចូលទីផ្សារអាស៊ីថែមទៀតផង។ បច្ចុប្បន្ន ប្រេស៊ីល មានចំណែកផ្គត់ផ្គង់កាហ្វេប្រហែលមួយភាគបីរបស់អាម៉េរិក ដែលលក់កាហ្វេ ៨ លានកញ្ចប់ឲ្យប្រទេសនេះជារៀងរាល់ឆ្នាំ។ គេព្យាករណ៍ថា គ្រាប់កាហ្វេប្រេស៊ីលមួយកញ្ចប់ទម្ងន់ ២,២៦ គីឡូក្រាមអាចឡើងថ្លៃប្រហែល ២៥% នៅទីផ្សារអាម៉េរិកក្នុងប៉ុន្មានខែខាងមុខនេះ ដែលធ្វើឲ្យហាងកាហ្វេត្រូវចំណាយបន្ថែម ហើយអ្នកផឹកកាហ្វេអាចនឹងចំណាយប្រាក់បន្ថែមរហូតដល់ ៧% ក្នុងមួយកែវ។

កាលឆ្នាំ២០២៤ ក្រុមហ៊ុនកាហ្វេចិន Luckin Coffee បានចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយទីភ្នាក់ងារជំរុញពាណិជ្ជកម្ម និងវិនិយោគប្រេស៊ីល (ApexBrasil) ដើម្បីទិញគ្រាប់កាហ្វេចំនួន ១២០ ០០០ តោនក្នុងរយៈពេល ២ឆ្នាំ ដែលមានតម្លៃប្រហែល ៥០០ លានដុល្លារអាម៉េរិក។ ទន្ទឹមនឹងនេះ អ្នកនាំចេញគ្រាប់កាហ្វេប្រេស៊ីល លោកស្រី Fernanda Pizol បានលើកឡើងថា ចំការកាហ្វេរបស់គាត់ Daterra Coffee បានត្រៀមលក់កាហ្វេកាន់តែច្រើនទៅប្រទេសចិន និងទីផ្សារផ្សេងទៀត ប្រសិនបើតម្រូវការនៅអាម៉េរិកធ្លាក់ចុះ ខណៈដែលអ្នកទិញអាម៉េរិកជាច្រើនបានស្នើសុំឱ្យផ្អាកការបញ្ជាទិញ ដោយសារពន្ធខ្ពស់លើទំនិញនាំចូលពីប្រេស៊ីល។

មិនត្រឹមតែប៉ុណ្ណោះ ឥណ្ឌាដែលរងពន្ធទ្វេរដងដល់ទៅ ៥០% ពីអាម៉េរិកផងដែរនោះ ក៏កំពុងសម្លឹងការនាំចេញទៅទិសដៅប្រទេសចិនដូចគ្នាទៅនឹងប្រេស៊ីល។  

អគ្គលេខាធិការសមាគមអ្នកនាំចេញគ្រឿងសមុទ្ររបស់ឥណ្ឌា លោក K N Raghavan បានលើកឡើងថា អ្នកទិញអាម៉េរិកជាច្រើនបានផ្អាកការបញ្ជាទិញបង្គា បើទោះបីជាកិច្ចពិភាក្សាពាណិជ្ជកម្មឥណ្ឌាជាមួយទីក្រុងវ៉ាស៊ីនតោនកំពុងបន្តក៏ដោយ។ យ៉ាងណាមិញ អ្នកនាំចេញគ្រឿងសមុទ្ររបស់ឥណ្ឌាកំពុងបង្កើនការលក់ទៅឲ្យប្រទេសចិន ដែលកំពុងក្លាយជាគោលដៅដ៏ធំមួយរប់ឥណ្ឌាសម្រាប់នាំចេញគ្រឿងសមុទ្រ។ លើសពីនេះ អឺរ៉ុបដែលកិច្ចព្រមព្រៀងពាណិជ្ជកម្មសេរីជាមួយឥណ្ឌាក៏ជាគោលដៅនាំចេញផងដែរ។

ក្នុងពេលឥឡូវនេះ ធុរកិច្ច និងអាជីវកម្មអាម៉េរិកមួយចំនួនកំពុងជួបការលំបាកដោយសារគោលនយោបាយពាណិជ្ជកម្មរបស់ Trump ។ ហេតុផលនៅត្រង់ថា ការផលិតទំនិញខ្លះនៅក្នុងស្រុកមិនអាចបំពេញតម្រូវការពេញលេញបាននោះទេ ជាក់ស្ដែង ដូចជាកាហ្វេ និងបង្គាជាដើម។ សមាគមពាណិជ្ជកម្មខាងគ្រឿងសមុទ្រដ៏ធំមួយរបស់អាម៉េរិក បានអំពាវនាវឱ្យមានការលើកលែងពន្ធ ដោយសារទីផ្សារអាហារសមុទ្ររបស់អាម៉េរិកភាគច្រើនពឹងផ្អែកលើការនាំចូល ខណៈដែលការនេសាទក្នុងស្រុកបានឈានហួសកម្រិតរួចទៅហើយ។ លើសពីនេះ ហាងលក់គ្រឿងទេសដ៏ធំរបស់អាម៉េរិក Walmart បានព្រមានផងដែរថា ពន្ធគយធ្វើឲ្យទំនិញឡើងថ្លៃ ហើយអាចនឹងបន្តឡើងបន្ថែមទៀត ខណៈដែលខ្លួនបានចំណាយថ្លៃដើមខ្ពស់រួចទៅហើយ។

អ្នកនាំចេញគ្រឿងសមុទ្រឥណ្ឌា Abuthahir Aboobakar បានលើកឡើងថា អតិថិជនអាម៉េរិកមួយចំនួននៅបន្តបញ្ជាទិញសម្រាប់ប៉ុន្មានខែខាងមុខបើទោះបីជាមានពន្ធគយធ្វើឲ្យពួកគេបង្កើនថ្លៃដើមក៏ដោយ ដោយសារមិនទាន់រកអ្នកផ្គត់ផ្គត់ជំនួសបាន។ យ៉ាងណាមិញ លោក Abuthahir មានទំនុកចិត្តថា ក្រុមហ៊ុនរបស់គាត់អាចទប់ទល់នឹងការផ្លាស់ប្តូរបាន ជាមួយនឹងអតិថិជននៅក្នុង ៦០ ប្រទេសជុំវិញពិភពលោក ដែលធ្វើឲ្យគាត់មានជម្រើសបង្វែរការនាំចេញឆ្ងាយពីអាម៉េរិក៕