សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ វិស័យកាត់ដេរផ្នែកខាងផលិតស្បែកជើង និងផលិតផលធ្វើដំណើរនៅឆ្នាំ២០២៤នេះ មានសន្ទុះល្អប្រសើរដោយការនាំចេញកើនឡើងប្រមាណជាង២០%ធៀបនឹងឆ្នាំ២០២៣។ នេះបើតាមការឱ្យដឹងរបស់អ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជា។
អ្នកឧកញ៉ា លី ឃុនថៃ បានប្រាប់ AMS Economy ថា៖ ការនាំចេញនៅឆ្នាំ២០២៤ មានភាពល្អប្រសើរ មានការបញ្ជាទិញច្រើនជាងរាល់ឆ្នាំ ដោយសារតែស្ថានភាពនឹងនរបស់សេដ្ឋកិច្ច និងនយោបាយកម្ពុជា ហើយអ្នកបញ្ជាទិញក៏ដូចជារោងចក្រពីបរទេសមានទំនុកចិត្តមកលើកម្ពុជា ។
អ្នកឧកញ៉ា បានបញ្ជាក់ថា៖
«តាមការវិភាគរបស់សមាគមសហព័ន្ធអ្នកវិនិយោគកម្ពុជា សម្រាប់ឆ្នាំ២០២៥ ការបញ្ជាទិញនឹងអាចកើនឡើងច្រើនជាងឆ្នាំ២០២៤ ដែលកើនឡើងយ៉ាងតិចមិនក្រោម២០ទៅ៣០ភាគរយនោះទេ »។
អ្នកឧកញ៉ា បានឱ្យដឹងផងដែរ កន្លងមកការនាំចេញផលិតផលស្បែកជើង និងសម្ភារធ្វើដំណើរក្នុងចំនួនដ៏ច្រើនគួរសមទៅប្រទេសអឺរ៉ុប ប្រទេសអង់គ្លេស អាមេរិក កាណាដា និងបណ្តាប្រទេសក្នុងអាស៊ីដូចជា ជប៉ុន និងកូរ៉េ ជាដើម។ សមាគមសហព័ន្ធអ្នកវិនិយោគកម្ពុជា បាន និងកំពុងជំរុញវិស័យស្បែកជើង និងផលិតផលធ្វើដំណើរឱ្យកាន់តែរីកចម្រើន។
ទាក់ទងនឹងការផ្លាស់ប្តូរប្រធានាធិបតីសហរដ្ឋអាមេរិកមានឥទ្ធិពលដល់កម្ពុជាដែរ ឬអត់នោះ អ្នកឧកញ៉ា លី ឃុនថៃ បានលើកឡើងថា៖
«នៅពេល លោក ដូណាល់ ត្រាំ ឡើងកាន់អំណាចនៅខែមករានាពេលខាងមុខ ខ្ញុំជឿជាក់ថាកម្ពុជាមានឱកាសទទួលបានការដាក់បញ្ជាទិញកាន់តែច្រើនពីអាមេរិកជាងឆ្នាំកន្លងទៅ។ យើងមើលឃើញថា អាមេរិកនឹងដំឡើងពន្ធលើទំនិញពីចិន តែសម្រាប់សម្រាប់កម្ពុជាការនាំចេញទៅអាមេរិក ទៅអឺរ៉ុប ភាគច្រើនរួចពន្ធ។ នេះជាសក្តានុពល និងឱកាសល្អបំផុតសម្រាប់កម្ពុជា»។
អ្នកឧកញ៉ា លី ឃុនថៃ ប្រធានសមាគមស្បែកជើងកម្ពុជា បានរំលឹកថា៖ រយៈពេល ៩ខែ ឆ្នាំ២០២៤នេះ ការនាំចេញស្បែកជើង មានការកើនឡើង ២៣ភាគរយ បើធៀបនឹងរយៈពេលដូចគ្នាកាលពីឆ្នាំមុន ក្នុងនោះ មានការនាំចេញទៅអឺរ៉ុប អាមេរិក និងអាស៊ី ដែលមានចិនផងដែរ។ ជាមួយគ្នានេះ ក្នុងឆ្នាំ២០២៤ ពោលគឺនៅសល់ប្រមាណ ២ខែទៀត ការនាំចេញអាចនឹងកើនឡើងបន្តទៀត ក៏ប៉ុន្តែទឹកប្រាក់មិនទាន់អាចប៉ាន់ស្មានបានទេ។
បើតាមអ្នកឧកញ៉ា លី ឃុនថៃ មកដល់ពេលនេះ យ៉ាងហោចណាស់មាន៨០រោងចក្រ កំពុងដំណើរការផលិតស្បែកជើងនៅកម្ពុជា៕
Account
Security
Favourite Content