ភ្នំពេញ ៖ បន្ទាប់ពីក្រុមហ៊ុនចិនជាច្រើនបានដាក់ទីតាំងរោងចក្រផលិតកង់ឡាននៅកម្ពុជាជាបន្តបន្ទាប់ ដូចជា ការដាក់ទីតាំងនៅក្នុងខេត្តស្វាយរៀង និងខេត្តព្រះសីហនុ ហើយកាលពីខែកុម្ភៈកន្លងទៅនេះក៏មានគម្រោងថ្មីមួយទៀតនៅក្នុងខេត្តក្រចេះ ដែលគម្រោងទាំងនេះ បានផ្ដល់នូវក្ដីសង្ឃឹមកាន់តែច្រើនទៅដល់បណ្ដាអ្នកពាក់ព័ន្ធក្នុងវិស័យកៅស៊ូនៅកម្ពុជា។

កន្លងមក ទីផ្សារកៅស៊ូនៅកម្ពុជាតែងពឹងផ្អែកលើការនាំចេញទៅទីផ្សារក្រៅប្រទេស ជាពិសេស​ប្រទេស​ជិតខាង រួមមាន ថៃ និងវៀតណាម ហើយទីផ្សារទាំងនោះមិនមានភាពជាក់លាក់នោះទេសម្រាប់​ប្រជា​កសិករដែលជាអ្នកផលិតនៅក្នុងស្រុក។ ដូច្នេះ វត្តមាននៃរោងចក្រផលិត និងកែច្នៃសំបកកង់ឡាន​នៅក្នុងស្រុក​កាន់តែច្រើននឹងធានាបានទីផ្សារដែលមានលំនឹង។

ទាក់ទិននឹងរឿងនេះ លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានលើក​ឡើងថា វិស័យកៅស៊ូ​នៅកម្ពុជា ពីមួយឆ្នាំទៅមួយឆ្នាំកាន់តែមានភាពល្អប្រសើរជាលំដាប់ ជាពិសេសក្រោយ​មាន​វត្តមានរបស់បណ្ដាក្រុមហ៊ុន និងរោងចក្រផលិតសំបក់កង់កៅស៊ូនៅក្នុងប្រទេសទាំងក្នុងខេត្តស្វាយរៀង ខេត្តព្រះសីហនុ ក៏ដូចជានៅក្នុងខេត្តក្រចេះដែលជាគម្រោងថ្មីទើបតែប្រកាសដោយរាជរដ្ឋាភិបាលកម្ពុជាតាមរយៈក្រុមប្រឹក្សាអភិវឌ្ឍន៍កម្ពុជា។

លោកឧកញ៉ាបានបន្ថែមថា ៖

“កាលពីប៉ុន្មានឆ្នាំមុន ទិន្នផលនៃកៅស៊ូរបស់កម្ពុជាគឺពឹងផ្អែកមួយ​ចំណែកធំលើ​​បណ្ដាប្រទេសជិតខាង ដូចជា វៀតណាម ថៃ តែប៉ុណ្ណោះ ហើយនៅពេលដែលគេទិញ​គ្រប់តម្រូវការ គេនឹងឈប់ទិញ ឬបោះបង់ចោលទីផ្សារមួយរយៈ ដែលវារិតត្បិតជម្រើសសម្រាប់​អ្នកដាំដុះជាលក្ខណៈគ្រួសារ ក៏ដូចជាអ្នក​វិនិយោគ​​ជាលក្ខណៈគ្រួសារ និងក្រុមហ៊ុន។ ប៉ុន្តែវត្តមាន​ថ្មីនៃរោងចក្រនេះ នឹងបង្កើនទំនុកចិត្ត លើកទឹកចិត្ត​ដល់​អ្នកដែលពាក់ព័ន្ធនៅក្នុងប្រទេសកម្ពុជាឱ្យបង្កើនលទ្ធភាពរបស់ខ្លួនតាមដែលអាចធ្វើទៅបាន”

យ៉ាងណា ក្នុងនាមជាអ្នកជំនាញសេដ្ឋកិច្ច លោកឧកញ៉ាក៏បានស្នើសុំរាជរដ្ឋាភិបាលឱ្យពិនិត្យ​ទៅលើគោលការណ៍លើកទឹកចិត្តដល់អ្នកពាក់ព័ន្ធនៅក្នុងវិស័យនេះ តាមរយៈការបន្ធូរបន្ថយពន្ធនៃការលក់ក្នុងស្រុក ដើម្បីអាចផ្ដល់លទ្ធភាពឱ្យអ្នកវិនិយោគមានឱកាសចំណេញកាន់តែប្រសើរ ក៏ដូចជាទាក់ទាញអ្នកវិនិយោគមកបន្ថែមផងដែរ។

គួររំលឹកថា កាលពីថ្ងៃទី២០ ខែកុម្ភៈ ឆ្នាំ២០២៣ កន្លងទៅ ក្រុមហ៊ុន Qingdao Double Star Group បានប្រកាសពីគម្រោង​វិនិយោគ​ទុនចំនួន២០០លានដុល្លារអាមេរិក ដើម្បីសាងសង់រោងចក្រ​ផលិតសំបកកង់ឡាន​ក្នុងតំបន់​សេដ្ឋកិច្ចពិសេសខេត្តក្រចេះ។ ក្រោយការប្រកាសនេះ អ្នកវិនិយោគលើវិស័យកៅស៊ូ ក៏ដូចជាអ្នកដាំដុះកៅស៊ូជាលក្ខណៈគ្រួសារ មានការសប្បាយចិត្ត និងសាទរ ដោយដាក់ការរំពឹងលើភាពប្រសើរឡើងនៃទីផ្សារកៅស៊ូក្នុងថ្ងៃខាងមុខ៕