សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងទៅតាមប្រភពព័ត៌មានពីរ៉យទ័រ បានរាយការណ៍ថា ប្រទេសរុស្ស៊ីបានកាត់បន្ថយទិន្នផលប្រេងរបស់ខ្លួននៅកាលពីខែមីនាកន្លងទៅនេះចំនួន ៤០ ភាគរយ ដែលច្រើនជាងការសន្យាលើកមុន ហើយការធ្លាក់ចុះនេះស្មើនឹងប្រហែល ៧០០ ០០០ បារ៉ែលក្នុងមួយថ្ងៃ។
កាលពីដើមខែមេសានេះ OPEC+ ដែលមានសមាជិកជាប្រទេសផលិតប្រេងសំខាន់ៗដូចជា រុស្ស៊ី អារ៉ាប៊ីសាអូឌីត អ៊ីរ៉ាក់ និងគុយវ៉ែត បានសន្យាកាត់បន្ថយទិន្នផលប្រេងជាសរុបចំនួន ១,៦៦ លានបារ៉េលក្នុងមួយថ្ងៃ។ សេចក្តីប្រកាសដ៏គួរឱ្យភ្ញាក់ផ្អើលនេះបានធ្វើឱ្យតម្លៃប្រេងឆៅពិភពលោកឡើងថ្លៃ ហើយប្រទេស OPEC+ បាននិយាយថា ពួកគេសុខចិត្តកាត់បន្ថយទិន្នផលប្រេងរបស់ពួកគេ ដោយចាប់ផ្តើមពីខែឧសភារហូតដល់ចុងឆ្នាំ ២០២៣ ដើម្បីធ្វើឱ្យទីផ្សារប្រេងមានស្ថេរភាព។
លើសពីនេះផងដែរ កាលពីខែកុម្ភៈកន្លងទៅនេះ រុស្ស៊ីបានសន្យាថានឹងកាត់បន្ថយការផលិតប្រេងចំនួន ៥០០ ០០០ បារ៉ែលក្នុងមួយថ្ងៃ ដោយចាប់ផ្តើមពីខែមីនាតទៅ។ ការផ្លាស់ប្តូរនេះគឺជាផ្នែកមួយនៃការឆ្លើយតបទៅវិញទៅនឹងទណ្ឌកម្ម ដែលក្រុមប្រទេស G7 បានកំណត់ការលក់ប្រេងរុស្ស៊ីក្នុងកម្រិតតម្លៃ ៦០ ដុល្លារក្នុងមួយបារ៉ែល។
ទោះជាយ៉ាងណាក្តី ការកាត់បន្ថយពិតប្រាកដបានប្រែទៅជាខ្ពស់ជាង ៤០ ភាគរយ ហើយគេបានរកឃើញថា បរិមាណបូមប្រេងឆៅជាមធ្យមប្រចាំថ្ងៃបានធ្លាក់មកត្រឹម ១,២៨ លានតោននៃ ឬស្មើនឹងប្រហែល ៩,៤ បារ៉ែលក្នុងមួយថ្ងៃ ដែលគេគណនាឃើញថា រុស្ស៊ីបានកាត់បន្ថយផលិតកម្មជិត ៧០០ ០០០ បារ៉ែលក្នុងមួយថ្ងៃ។
យោងតាមការគណនារបស់ Bloomberg បានឱ្យដឹងថា ការផលិតប្រេងឆៅ និងប្រភេទប្រេង condensate ជាសរុបមានចំនួន ១,៤១ លានតោនក្នុង ឬស្មើនឹង ១០,៣៦ លានបារ៉ែលក្នុងមួយថ្ងៃកាលពីខែមីនាកន្លងទៅនេះ បើធៀបនឹង ១១,១ លានបារ៉ែលប្រចាំខែកុម្ភៈ។
មិនត្រឹមតែប៉ុណ្ណោះ រុស្ស៊ីបានព្រមានម្តងហើយម្តងទៀតអំពីការកាត់បន្ថយទិន្នផលផលិតកម្ម ចាប់តាំងពីសហភាពអឺរ៉ុប EU និងក្រុមប្រទេស G7 បានចាប់ផ្តើមពិភាក្សាអំពីតម្លៃនៃប្រេងរបស់រុស្ស៊ី ហើយទីក្រុងមូស្គូបានហៅវិធានការនេះថាជាការអន្តរាគមន៍ទំនាក់ទំនងក្នុងទីផ្សារ និងការពង្រីកគោលនយោបាយបំផ្លិចបំផ្លាញថាមពលដោយប្រទេសលោកខាងលិច។
ស្របពេលនេះផងដែរ រុស្ស៊ីគឺជាអ្នកផ្គតផ្គង់ប្រេងដ៏ធំជាងគេរបស់ឥណ្ឌា និងបានឈានដល់កម្រិតខ្ពស់ចំនួន ១,៦៤ លានបារ៉ែលក្នុងមួយថ្ងៃកាលពិខែមីនាកន្លងទៅនេះ។ មិនត្រឹមតែប៉ុណ្ណោះ ការនាំចេញប្រេងឆៅរបស់រុស្ស៊ីទៅកាន់ប្រទេសឥណ្ឌាបានកើនឡើងជាខ្លាំង ដែលធ្វើឲ្យរុស្ស៊ីជាអ្នកផ្គត់ផ្គង់ប្រេងឈានមុខគេរបស់ឥណ្ឌាក្នុងរយៈពេលប្រាំមួយខែជាប់ៗគ្នា។
ទិន្នន័យក៏បានបង្ហាញផងដែរថា ការនាំចូលប្រេងរុស្ស៊ីមកកាន់ឥណ្ឌាពីរុស្ស៊ីមានកំណើនគួរឲ្យកត់សម្គាល់ ដែលបានកើនដល់ ៣៤ ភាគរយ ដែលជាចំនួនទ្វេដងសម្រាប់អ៊ីរ៉ាក់ ដែលជាអ្នកផ្គត់ផ្គង់ជាប្រចាំរបស់ឥណ្ឌា។ អ៊ីរ៉ាក់បាននាំចេញប្រេងឆៅទៅកាន់ឥណ្ឌា ៨២១ ៩៥២ បារ៉ែលក្នុងមួយថ្ងៃ ដែលធ្វើឱ្យប្រទេសនេះក្លាយជាអ្នកផ្គត់ផ្គង់ធំបំផុតទីបីរបស់ឥណ្ឌា បន្ទាប់ពីអារ៉ាប៊ីសាអូឌីតដែលបាននាំចេញ ៩៨៦ ២៨៨ បារ៉ែលក្នុងមួយថ្ងៃទៅកាន់ឥណ្ឌា។ គួរបញ្ជាក់ផងដែរថា ឥណ្ឌាជាប្រទេសប្រើប្រាស់ប្រេងធំជាងគេទីបីរបស់ពិភពលោក ហើយប្រទេសនេះបានចាប់ផ្តើមជំរុញការទិញប្រេងរបស់រុស្ស៊ី ដែលបានផ្តល់ជូនការបញ្ចុះតម្លៃ៕
Account
Security
Favourite Content