បរទេស៖ យោងតាមប្រភព័ព័ត៌មានពី CNA បានរាយការណ៍ថា ប្រទេសកូរ៉េខាងត្បូងបានបញ្ចេញកញ្ចប់ជំនួយសង្គ្រោះបន្ទាន់ចំនួន ២ ពាន់លានដុល្លារសម្រាប់ក្រុមហ៊ុនផលិតរថយន្ត និងបានព្រមានថា ពន្ធ ២៥ ភាគរយរបស់ប្រធានាធិបតី Donald Trump នឹងវាយប្រហារលើវិស័យនេះយ៉ាងធ្ងន់ធ្ងរ។

រដ្ឋាភិបាលកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា ដោយសាររថយន្ត និងគ្រឿងបន្លាស់រថយន្តគឺជាការនាំចេញកំពូលរបស់កូរ៉េខាងត្បូងទៅកាន់សហរដ្ឋអាម៉េរិក ហើយការសម្រេចចិត្តដាក់ពន្ធ ២៥ ភាគរយលើទំនិញទាំងនេះត្រូវបានព្យាករណ៍ថា នឹងប៉ះពាល់ដល់ឧស្សាហកម្មរថយន្តយ៉ាងធ្ងន់ធ្ងរ។

កាលពីខែសប្តាហ៍មុន ប្រធានាធិបតីសហរដ្ឋអាម៉េរិក Donald Trump បានប្រកាសយកពន្ធឆ្លើយតបឲ្យស្មើភាពគ្នា ឬ Reciprocal tariffs លើការនាំចូលពីប្រទេស និងដែនដីជាង ១៨០ ដែលបង្កឲ្យមានការភ្ញាក់ផ្អើលនៅជុំវិញពិភពលោក។ ទន្ទឹមនឹងនេះ ទំនិញ​មក​ពី​កូរ៉េ​ខាង​ត្បូងចូលក្នុងទឺកដីអាម៉េរិក​ត្រូវ​បាន​កំណត់​យក​ពន្ធ​ ២៥ ​ភាគរយ។ មិនត្រឹមតែប៉ុណ្ណោះ Trump ក៏​បាន​ដាក់​ពន្ធ ២៥ ភាគរយលើ​រថយន្តទាំងឡាយណាដែលនាំចូលក្នុងអាម៉េរិកផងដែរ ដោយ​បាន​បង្កើន​ការ​ព្រួយ​បារម្ភ​អំពី​ទស្សនវិស័យ​សេដ្ឋកិច្ច​ពិភពលោក ដោយកូរ៉េខាងត្បូងចាំបាច់ត្រូវតែរកដំណោះស្រាយភ្លាមៗ។

បន្ទាប់ពីមានការពិគ្រោះយោបល់ ទីក្រុងសេអ៊ូលបានសម្រេចចិត្តណែនាំ “សំណុំនៃវិធានការសុវត្ថិភាពឧស្សាហកម្មដែលផ្តោតលើតម្រូវការបន្ទាន់បំផុត” ។ បន្ថែមពីនេះ រដ្ឋាភិបាលក៏បានប្តេជ្ញានឹងចាត់វិធានការដែលអាចបត់បែនបានអាស្រ័យលើកម្រិតនៃការខូចខាតរបស់ឧស្សាហកម្ម។ នៅក្រោមផែនការនេះ រដ្ឋាភិបាលនឹងពង្រីកកម្មវិធីហិរញ្ញប្បទានតម្លៃទាបរបស់ខ្លួនសម្រាប់ឧស្សាហកម្មរថយន្តចំនួន ២ ទ្រីលានវ៉ុន (១,៣៤ ពាន់លានដុល្លារអាមេរិក)។ ក្នុងភាពជាដៃគូជាមួយស្ថាប័នហិរញ្ញវត្ថុធំៗ Hyundai Motor ដែលជាក្រុមហ៊ុនផលិតរថយន្តធំជាងគេរបស់កូរ៉េខាងត្បូងក៏នឹងបង្កើតកម្មវិធីគាំទ្រ ១ ទ្រីលានវ៉ុន (៦៧២,៤ លានដុល្លារ) សម្រាប់ជួយក្រុមហ៊ុនរថយន្តក្នុងស្រុកផងដែរ។ ជាសរុប កញ្ចប់ជំនួយសង្គ្រោះបន្ទាន់នេះមានចំនួនជាង ២ ពាន់លានដុល្លារ។

រដ្ឋាភិបាលកូរ៉េខាងត្បូងបន្ថែមថា ក្រុមហ៊ុនដែលរងផលប៉ះពាល់ដោយសារពន្ធនឹងមានសិទ្ធិទទួលបានពន្យាពេលពន្ធរហូតដល់ ៩ ខែ។ នៅក្នុងសេចក្តីថ្លែងការណ៍មួយ រដ្ឋាភិបាលលើកឡើងថា សារៈសំខាន់នៃទីផ្សារក្នុងស្រុកកំពុងត្រូវបានផ្តោតយ៉ាងសំខាន់ ដើម្បីឆ្លើយតបទៅនឹងការកាត់បន្ថយបរិមាណនាំចេញទាបដោយសារពន្ធអាម៉េរិក និងរក្សាមូលដ្ឋានផលិតកម្មរបស់ប្រទេស។ គួរឲ្យបញ្ជាក់ដែរថា ការនាំចេញនៃឧស្សាហកម្មរថយន្តរបស់កូរ៉េខាងត្បូងទៅកាន់សហរដ្ឋអាម៉េរិកមានចំនួនសរុប ៤២,៩ ពាន់លានដុល្លារលក្នុងឆ្នាំ​ ២០២៤ ។ លើសពីនេះ ឱនភាពពាណិជ្ជកម្មរបស់សហរដ្ឋអាម៉េរិកជាមួយកូរ៉េខាងត្បូងមានចំនួនជាង ៦៦ ពាន់លានដុល្លារ៕