ភ្នំពេញ ៖ ការធ្វើស្រែជាក្រុមដោយក្រុមកសិករមានដីនៅក្បែរគ្នា រួមគ្នាប្រើពូជតែមួយ និងប្រតិទិនដាំដុះ ព្រមទាំងពេលច្រូតកាត់ដូចគ្នាដើម្បីងាយស្រួលក្នុងការប្រើគ្រឿងយន្តប្រកបដោយប្រសិទ្ធភាព ចំណាយទាប (economy of scale) និងងាយស្រួលក្នុងការលក់ផលិត​ផ​ល​ទទួលបានតម្លៃសមរម្យ ដែលផ្តល់ផលប្រយោជន៍ដល់កសិករក្នុងការបង្កើនប្រាក់ចំណេញ និងផ្តល់ភាពងាយស្រួលដល់អ្នកប្រមូលទិញស្រូវ អ្នកផ្តល់សេវាគ្រឿងយន្ត អ្នកផ្គត់ផ្គង់ធាតុចូល។ល។ នេះបើតាមការឱ្យដឹងរបស់ឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។

ឯកឧត្តមរដ្ឋលេខាធិការបានឱ្យដឹងថា៖ គោលការណ៍សំខាន់ៗមានដូចជា៖១) ប្រើពូជតែមួយ ​ ២) កាលវិភាគដាំដុះនិងច្រូតតែមួយ ៣) រួមគ្នាជួល សេវាភ្ជូរដោយត្រាក់ទ័រ, សេវាស្ទូងនិងដាំដុះដោយគ្រឿងយន្ត, សេវាបាញ់ថ្នាំ និងជីបំប៉នដោយគ្រឿងយន្តនិងដ្រូន៤) រួមគ្នាជួលសេវាច្រូតដោយម៉ាស៊ីននិងប្រមូលផ្តុំស្រូវដើម្បីងាយស្រួលដឹកជញ្ជូននិងលក់ទៅកាន់រោងម៉ាស៊ីននិងទី៥) មានគោលការណ៍រួមនិងអ្នកដឹកនាំសម្របសម្រួលរួមរបស់ក្រុម។

ឯកឧត្តម បានលើកឧទាហរណ៍ថា៖

«កសិករ ៥ នាក់មានដីជាប់គ្នាសរុប ១០ ហិកតា រួមគ្នាប្រីពូជស្រូវផ្ការំដួល (ឬពូជអ្វីមួយ) ហើយកំណត់ពេលវេលាដាំដុះដូចគ្នា ជួលសេវាភ្ជួរ ដាំដុះ និងច្រូតដោយម៉ាស៊ីនរួមគ្នា និងលក់រួមគ្នា ដោយកសិករជាសមាជិកនៅតែទទួលខុសត្រូវលើការធ្វើស្រែ ចំណាយ និងចំណេញខាតតាមស្រែរៀងៗខ្លួនដដែល។ លើសពីនេះទៀតក្រុមកសិករដាំដុះសមកាលកម្ម (Synchronized rice cultivation) ក៏អាចរួមគ្នាសហការជាមួយអ្នកពាក់ព័ន្ធ ដូចជាការរួមគ្នាទិញជី និងពូជដើម្បីទទួលបានតម្លៃសមរម្យជាមួយគោលការណ៍ពិសេសក្នុងការបង់ប្រាក់។ក្រុមកសិករក៏អាចសហការគ្នាក្នុងការខ្ចីទុនពីធនាគារសម្រាប់ផលិតកម្មស្រូវផងដែរ ជាពិសេសបើក្រុមមានកិច្ចសន្យាផលិតកម្មកសិកម្មច្បាស់លាស់ និងសហការគ្នាដើម្បីទទួលបានសេវាធានារ៉ាប់រងកសិកម្ម»។

ឯកឧត្តមបណ្ឌិត យ៉ង សាំងកុមារ បានបញ្ជាក់ថា៖ ដើម្បីដំណើរការបានល្អ ក្រុមកសិករដាំដុះសមកាលកម្មរៀបចំឲ្យមានគោលការណ៍ក្រុម និងធ្វើការជ្រើសរើសតំណាងរបស់ខ្លួនដើម្បីសម្របសម្រួលការដាំដុះរបស់ក្រុម និងសហការជាមួយអ្នកពាក់ព័ន្ធ។

គួរបញ្ជាក់ដែរថា មន្រ្តីកសិកម្មឃុំ មានតួនាទីសំខាន់ក្នុងការរៀបចំក្រុមកសិករសមកាលកម្មនៅដំណាក់កាលដំបូង។ ការរៀបចំក្រុមកសិករសមកាលកម្មជាជំហានទី១ ឬដំណាក់កាលដំបូងនៃដំណើរការរៀបចំសហគមន៍កសិកម្មទំនើបនៅរដូវបន្តបន្ទាប់។ មានន័យថា បន្ទាប់ពីការរៀបចំក្រុមសមកាលកម្មបានជោគជ័យ នឹងអាចឈាមទៅរកការពង្រឹងពង្រីកក្រុមសមកាលកម្មបន្ថែមទៀត ដើម្បីធ្វើសមាហរណកម្មក្រុមដាំដុះសមាលកម្មផ្សេងៗនៅតាមភូមិ-ឃុំ ជាជំហានៗ ដើម្បីកសាងសហគមន៍កសិកម្មទំនើបដ៏ធំមួយនៅកម្រិតឃុំ ឬអាចដល់កម្រិតស្រុក។

ដោយឡែក សម្រាប់ឆ្នាំ២០២៤ នេះ ក្រសួងកសិកម្មមានផែនការគាំទ្រដល់មន្រ្តីកសិកម្មឃុំក្នុងការរៀបចំបង្កើតឲ្យមានក្រុមកសិករដាំដុះសមកាលឲ្យបានយ៉ាងតិចបំផុតមួយក្រុមក្នុងមួយឃុំ។