សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពី រ៉យទ័រ បានរាយការណ៍ថា ម៉ាកយីហោធំៗកំពុងព្រួយបារម្ភអំពីកង្វះការផ្គត់ផ្គង់ដោយសារតែការរំខាននៃការដឹកជញ្ជូនតាមព្រែកជីកស៊ុយអេ ដែលបង្កឡើងដោយក្រុមសកម្មប្រយុទ្ធ Houthi មកពីប្រទេសយេម៉ែន។
ការវាយប្រហារនៅសមុទ្រក្រហមដោយក្រុមសកម្មប្រយុទ្ធ Houthi មកពីប្រទេសយេម៉ែន កំពុងបង្កការរំខានដល់ពាណិជ្ជកម្មតាមសមុទ្រតាមរយៈព្រែកជីកស៊ុយអេ ដោយនាវាមួយចំនួនប្តូរផ្លូវធ្វើដំណើរទៅកាន់ផ្លូវខាងកើត-ខាងលិច ដែលវែងឆ្ងាយតាមរយៈចុងភាគខាងត្បូងនៃទ្វីបអាហ្វ្រិក។ លើសពីនេះ ក្រុមហ៊ុនដឹកជញ្ជូនសកលជាច្រើនបានផ្អាកការដឹកជញ្ជូនរបស់ពួកគេនៅក្នុងសមុទ្រក្រហម ដែលរំខានដល់ពាណិជ្ជកម្មដែនសមុទ្រជាសាកល និងធ្វើឲ្យតម្លៃទំនិញឡើងថ្លៃ។
កាលពីសប្តាហ៍មុន ក្រុមហ៊ុនគ្រឿងសង្ហារិមយក្សរបស់ស៊ុយអែត IKEA បានប្រកាសថា ខ្លួនកំពុងស្វែងរកជម្រើសថ្មី ដើម្បីធានាបាននូវផលិតផលរបស់ខ្លួនដែលត្រូវបានចែកចាយជាចម្បងតាមរយៈសមុទ្រក្រហម និងព្រែកជីកស៊ុយអេ ពីរោងចក្រអាស៊ីទៅកាន់ទីផ្សារលោកខាងលិច។ Oscar Ljunggren អ្នកនាំពាក្យរបស់ Inter IKEA Group និយាយថា ស្ថានភាពនៅព្រែកជីកស៊ុយអេនឹងបណ្តាលឱ្យមានការពន្យារពេល និងអាចបណ្តាលឱ្យមានឧបសគ្គសម្រាប់ការដឹកជញ្ជូនផលិតផល Ikea ។ ទន្ទឹមនឹងនេះដែរ Abercrombie & Fitch គ្រោងនឹងផ្លាស់ប្តូរពីការដឹកជញ្ជូនតាមផ្លូវសមុទ្រទៅជាការដឹកជញ្ជូនតាមផ្លូវអាកាសនៅពេលណាដែលអាចធ្វើទៅបានដើម្បីកាត់បន្ថយការរំខានដូចដែលបានរាយការណ៍នៅក្នុងអ៊ីមែលទៅកាន់អ្នកផ្គត់ផ្គង់។
កាលពីដើមសប្តាហ៍នេះ ក្រុមដឹកជញ្ជូនរបស់ដាណឺម៉ាក Maersk បាននិយាយថា ដោយសារតែហានិភ័យនៃការវាយប្រហារកើនឡើង ខ្លួនបានបញ្ជូននាវាជុំវិញទ្វីបអាហ្រ្វិកតាមរយៈ Cape of Good Hope ដែលនឹងកាត់បន្ថយប្រសិទ្ធភាពនៃការធ្វើដំណើរអាស៊ីទៅកាន់អឺរ៉ុប ២៥ ភាគរយ។ បន្ថែមពីនេះ ក្រុមហ៊ុនដឹកជញ្ជូនអាល្លឺម៉ង់ Hapag-Lloyd បានធ្វើតាមវិធីបែបនេះដែរ។ ទោះជាយ៉ាងណាក្តី ការបញ្ជូនកប៉ាល់នៅជុំវិញទ្វីបអាហ្រ្វិកបង្កើនការធ្វើដំណើរទៅមកជិតពីរសប្តាហ៍កន្លះ ដោយជៀសមិនផុតពីការប៉ះពាល់ដល់សមត្ថភាពដឹកជញ្ជូន និងការបង្កើនថ្លៃដើមនោះទេ។
គួរឲ្យបញ្ជាក់ផងដែរថា ព្រែកជីកស៊ុយអេមានប្រវែង ១៩២ គីឡូម៉ែត្រ ដែលជាផ្លូវសមុទ្រលឿនបំផុតរវាងអាស៊ី និងអឺរ៉ុប ហើយវាជាចំណុចផ្សារភ្ជាប់ភូមិសាស្រ្តសំខាន់មួយក្នុងចំណោម ៧ របស់ពិភពលោក ដែលមានសារៈសំខាន់យ៉ាងខ្លាំងចំពោះពាណិជ្ជកម្មប្រេងពិភពលោក។ មិនត្រឹមតែប៉ុណ្ណោះ វាគឺជាសរសៃឈាមដឹកជញ្ជូនដ៏សំខាន់ដែលមានចំណែកប្រហែល ១៥ ភាគរយនៃសកម្មភាពដឹកជញ្ជូនសរុបរបស់ពិភពលោក រួមទាំងជិត ៣០ ភាគរយនៃពាណិជ្ជកម្មកុងតឺន័រសកលផងដែរ។ នាពេលថ្មីៗនេះ ការវាយប្រហារដែលកើតឡើងចំពេលសង្រ្គាមអ៊ីស្រាអែល និងក្រុមហាម៉ាស់ បានបង្កឱ្យមានការសង្គ្រោះបន្ទាន់ផ្នែកពាណិជ្ជកម្ម និងការដឹកជញ្ជូន។ ករណីនេះបានរំលឹកដល់ឧប្បត្តិហេតុឆ្នាំ ២០២១ ដែលកប៉ាល់កុងតឺន័រដ៏ធំបំផុតមួយបានបិទព្រែកជីកស៊ុយអេយៈពេលប្រាំមួយថ្ងៃ ដែលបណ្តាលឱ្យពាណិជ្ជកម្មសកលខាតបង់ចំនួន ៩,៦ ពាន់លានដុល្លារប្រចាំថ្ងៃ៕
Account
Security
Favourite Content