សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ នៅក្នុងសប្ដាហ៍ទី៣ នៃខែតុលា គិតពីថ្ងៃទី១២ ដល់ថ្ងៃទី២០ ខែតុលា ឆ្នាំ២០២៥ កម្ពុជា បានទាក់ទាញគម្រោងវិនិយោគចំនួន៥ ដែលមានទុនវិនិយោគសរុប ៣៩,៧លានដុល្លារអាម៉េរិក និងអាចបង្កើតការងារបានជាង២៥០០កន្លែង។ គម្រោងទាំងនេះ មានទីតាំងនៅខេត្តស្វាយរៀង ខេត្តព្រះសីហនុ ខេត្តកំពង់ឆ្នាំង ខេត្តកណ្តាល និងខេត្តតាកែវ ។
យោងតាមក្រុមប្រឹក្សាអភិវឌ្ឍន៍កម្ពុជាបានឱ្យដឹងថា នៅក្នុងចំណោមគម្រោងវិនិយោគទាំង៥ មានទីតាំងនៅក្នុងខេត្តផ្សេងៗគ្នា ដូចជា ស្រុកកំពង់ត្រឡាច ខេត្តកំពង់ឆ្នាំង ទទួលបានគម្រោងវិនិយោគបង្កើតរោងចក្រផ្គុំដំឡើងរថយន្ត ក្នុងទំហំទុនវិនិយោគប្រមាណ ១៩,៤លានដុល្លារអាម៉េរិក និងអាចបង្កើតការងារបានចំនួន ១.១៤២កន្លែង។
ចំណែកស្រុកកំពង់រោទិ៍ ខេត្តស្វាយរៀង ទទួលបានគម្រោងវិនិយោគបង្កើតរោងចក្រផលិត និងកែច្នៃបន្ទះឈីប ខ្សែភ្លើង USB និងគ្រឿងបរិក្ខារអគ្គិសនីគ្រប់ប្រភេទ ស្ថិតក្នុងតំបន់សេដ្ឋកិច្ចពិសេស ហ័រស៊ាំង អ៊ិនធើណេសិនណាល ក្នុងទំហំទុនវិនិយោគប្រមាណ ២,៩លានដុល្លារអាម៉េរិក និងអាចបង្កើតការងារបានចំនួន ៣៧៤កន្លែង។
រីឯប្រជាពលរដ្ឋស្រុកព្រៃនប់ ខេត្តព្រះសីហនុ ទទួលបានគម្រោងវិនិយោគបង្កើតរោងចក្រផលិតគ្រឿងសង្ហារិម ក្នុងទំហំទុនវិនិយោគប្រមាណ ៦,២លានដុល្លារអាម៉េរិក និងអាចបង្កើតការងារបានចំនួន ២១៨កន្លែង។
ចំពោះប្រជាពលរដ្ឋស្រុកកណ្តាលស្ទឹង ខេត្តកណ្តាល ទាក់ទាញបានគម្រោងវិនិយោគបង្កើតរោងចក្រផលិតថង់ប្លាស្ទិច បង់ស្អិត និងក្រដាសម៉ាកឃឺ ក្នុងទំហំទុនវិនិយោគប្រមាណ ៥,៤លានដុល្លារអាម៉េរិក និងអាចបង្កើតការងារបានចំនួន ១៦៣កន្លែង។
ក្រុមប្រឹក្សាអភិវឌ្ឍន៍កម្ពុជា ក៏បានចូលរួមអបអរសាទរដល់ប្រជាពលរដ្ឋស្រុកបាទី ខេត្តតាកែវ ដែលទទួលបានគម្រោងវិនិយោគបង្កើតរោងចក្រផលិតបរិក្ខារអគ្គិសនីបំភ្លឺ និងគ្រៀងបន្ទាប់បន្សំ ក្នុងទំហំទុនវិនិយោគប្រមាណ ៥,៣លានដុល្លារអាម៉េរិក និងអាចបង្កើតការងារបានចំនួន៣៥៣កន្លែង។
សូមជម្រាបថា ក្នុងរយៈពេល៩ខែនៃឆ្នាំ២០២៥នេះ គណៈកម្មាធិការវិនិយោគកម្ពុជាបានសម្រេចចុះបញ្ជីគម្រោងវិនិយោគសរុបចំនួន ៥៤៦គម្រោង ក្នុងទំហំទុនវិនិយោគប្រមាណ ៧,៨ពាន់លានដុល្លារអាម៉េរិក នៅក្នុងវិស័យចម្រុះ៕
Account
Security
Favourite Content