ហ្វីលីពិន​​៖ ​ថ្លែងទៅកាន់វិនិយោគិនជាង២០០នាក់ ​មកពីបណ្តាក្រុមហ៊ុនចំនួន១៥១ក្រុមហ៊ុន ដែលចូលរួមក្នុងវេទិកាធុរកិច្ចកម្ពុជា-ហ្វីលីពីន នៅប្រទេសហ្វីលីពីន នៅថ្ងៃដើមសប្ដាហ៍នេះ ​សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានរំលេចអំពីសក្តានុពលសំខាន់ៗចំនួន៦ចំណុច នៃការវិនិយោគនៅកម្ពុជា ​ដែលនឹងផ្តល់អត្ថប្រយោជន៍​ដល់វិនិយោគិនបរទេសដែលចូលមកវិនិយោគនៅកម្ពុជា ជាពិសេសសក្ដានុពលអង្ករក្រសអូបប្រណិតកម្ពុជាតែម្ដង។

តាមរយៈសុន្ទរកថាគន្លឹះពិសេសក្នុង «វេទិកាធុរកិច្ចកម្ពុជា-ហ្វីលីពីន»សម្ដេចធិបតី ហ៊ុន ម៉ាណែត បានប្រាប់ទៅកាន់ធុរកិច្ចជនហ្វីលីពីនថា អង្ករក្រអូបប្រណិតកម្ពុជា បានឈ្នះពានរង្វាន់អង្ករល្អប្រណិតដាច់គេចំនួន៦លើករួចមកហើយ រាប់ចាប់តាំងពីឆ្នាំ២០១២មក រួមបញ្ចូលទាំងពានរង្វាន់សន្និសី ទ ស្រូវអង្ករពិភពលោក ឆ្នាំ២០២៤ នាទីក្រុងម៉ានីឡា។

សម្តេចធិបតី មានប្រសាសន៍ថា កម្ពុជាបានក្លាយជាទិសដៅចម្បងសម្រាប់ការវិនិយោគផ្ទាល់ពីបរទេសក្នុងចំណោមគោលដៅ FDI កំពូលទាំង ៥០ របស់ពិភពលោក។ នៅឆ្នាំ២០២៤ កម្ពុជាទទួលបានគម្រោងវិនិយោគចំនួនជាង ៤០០គម្រោងជាមួយនឹងទំហំវិនិយោគជិត៧ពាន់លានដុល្លារ កើនឡើងជាង៤០% បើធៀបនឹងឆ្នាំ២០២៣។

ស្របជាមួយនឹងកំណើននៃការទទួលបានទុនវិនិយោគនេះ សម្តេចធិបតី ហ៊ុន ម៉ាណែត បានគូសរំលេចអំពីសក្តានុពល និងការផ្តល់ជូនអត្ថប្រយោជន៍ជាច្រើនដល់វិនិយោគិន​ដែលរួមមាន​៖

ទី១- កម្ពុជាមានបរិយាកាសអំណោយផល និងការលើកទឹកចិត្ត តាមរយៈការកែទម្រង់ ​និងការកែសម្រួលបទបញ្ញត្តិ និងការផ្តល់ការលើកទឹកចិត្តពន្ធជាច្រើនដល់វិនិយោគិន។

ទី២- កិច្ចទំនាក់ទំនងដ៏រឹងមាំរវាងរដ្ឋាភិបាល និងប្រជាជន ទំនាក់ទំនងបើកចំហរវាងវិនិយោគិន ដែលជាអាទិភាពដ៏សំខាន់ធានាថា កង្វល់ទាំងអស់របស់វិស័យឯកជន និងវិនិយោគិន នឹងត្រូវបានលើកឡើង និងដោះស្រាយជាប់ជាប្រចាំ។

ទី៣- ទីតាំងយុទ្ធសាស្រ្ត និងការអភិវឌ្ឍន៍ហេដ្ឋារចនាសម្ព័ន្ធ ​ដោយកម្ពុជាស្ថិតនៅទីតាំងយុទ្ធសាស្រ្តចំកណ្តាលនៃអាស៊ាន ដែលធ្វើឱ្យកម្ពុជាកាន់តែល្អឥតខ្ចោះក្នុងការតភ្ជាប់ទីផ្សារ ខណៈរាជរដ្ឋាភិបាលបានអភិវឌ្ឍន៍ហេដ្ឋារចនាសម្ព័ន្ធ និងឡូជីស្ទីក ដើម្បីងាយស្រួលដល់ការតភ្ជាប់។

ទី៤- លទ្ធភាពក្នុងការចូលទីផ្សារតំបន់ និងសាកលដ៏ទូលំទូលាយ តាមរយៈកិច្ចព្រមព្រៀងនានា ដូចជា កិច្ចព្រមព្រៀងអាសិប​ កិច្ចព្រមព្រៀងពាណិជ្ជកម្មសេរីជាមួយចិន កូរ៉េ និងអេមីរ៉ាតអារ៉ាប់រួមជាដើម។

ទី៥- សេដ្ឋកិច្ចឌីជីថល និងនវានុវត្តន៍ ដោយរាជរដ្ឋាភិបាលទទួលស្គាល់អំពីអំណាចបដិវត្តកម្មនៃឌីជីថលូបនីយកម្ម និងការផ្តល់អាទិភាពដល់ការអភិវឌ្ឍន៍ប្រព័ន្ធអេកូឡូស៊ីឌីជីថលដ៏រឹងមាំ។ ក្នុងន័យនេះសម្តេចបានលើកទឹកចិត្តដល់វិនិយោគិនហ្វីលីពិន ក្នុងការ​ធ្វើជាដៃគូរួមគ្នាជាមួយកម្ពុជា ក្នុងការកសាង​អនាគតឌីជីថលនៅកម្ពុជា។

ទី៦- ថាមពលប្រកបដោយចីរភាព និងកំណើនបៃតង ​ដោយកម្ពុជាមានការប្តេជ្ញាចិត្តចំពោះការអភិវឌ្ឍន៍ថាមពលប្រកបដោយចីរភាព និងកំណើនបៃតង​​។

សម្តេចធិបតី ក៏បានថ្លែងអញ្ជើញវិនិយោគិនពីគ្រប់ទិសទីទាំងអស់ មកស្វែងយល់អំពីកាលានុវត្តភាពដ៏សំបូរបែបនៅក្នុងទីផ្សារដែលកំពុងរីកលូតលាស់យ៉ាងឆាប់ ប្រកបដោយចីរភាព តាមរយៈយន្តការគាំទ្រ និងគន្លិះគ្រប់ជ្រុងជ្រោយ។ រាជរដ្ឋាភិបាលកម្ពុជា ប្តេជ្ញាសម្របសម្រួល និងធ្វើឱ្យការវិនិយោគរបស់អ្នកមកស្វែងរកឱកាសវិនិយោគនៅកម្ពុជា ទទួលបាននូវបទពិសោធន៍ដ៏រលូន និងជោគជ័យ៕