ភ្នំពេញ ៖ អង្ករក្រអូបប្រណិត ម្លិះអង្គរ របស់កម្ពុជា ទទួលបានបានពានរង្វាន់ 2-Star Great Taste Award 2025 ដ៏មានកិត្យានុភាព ដែលការឈ្នះពានរង្វាន់ដ៏អស្ចារ្យនេះ បានទទួលស្គាល់ជាអន្តរជាតិយ៉ាងសំខាន់ ដែលជាការត្រួសត្រាយផ្លូវសម្រាប់លទ្ធភាពចូលទីផ្សារអន្តរជាតិ និងតម្រូវការអង្ករកម្ពុជា ដែលនឹងកើនឡើងកាន់តែច្រើននៅឆ្នាំខាងមុខ ។

អេមរុរាយស៍កម្ពុជា (Amru Rice Cambodia) ដែលជាក្រុមហ៊ុននាំចេញអង្ករឈានមុខគេ ជាមួយនឹងអង្ករប្រណិត ម៉ាកម្លិះអង្គរ (Malys Angkor) របស់ខ្លួន បានចូលរួមក្នុងការប្រកួតប្រជែងដែលធ្វើឡើងនៅប្រទេសអង់គ្លេស ។

ឧកញ៉ា សុង សារ៉ន អគ្គនាយកក្រុមហ៊ុន អេមរុរាយស៍កម្ពុជា និងជាប្រធានក្រុមប្រឹក្សាភិបាលនៃសហព័ន្ធស្រូវអង្ករកម្ពុជា (CRF) បានមានប្រសាសន៍ថា ម្លិះអង្គរ ត្រូវបានគេស្គាល់ថាមានក្លិនក្រអូបឈ្ងុយឆ្ងាញ់ រមួត និងរសជាតិល្អលើសគេ គុណភាពដែលទាក់ទាញដល់ចៅក្រម Great Taste ដែលនាំឱ្យទទួលបានពានរង្វាន់លំដាប់ផ្កាយពីរ។

សូមជ្រាបថា ពានរង្វាន់ Great Taste Awards ដែលជារឿយៗត្រូវបានគេហៅថា “Oscars of Food World” ត្រូវបានរៀបចំឡើងដោយ Guild of Fine Food នៅចក្រភពអង់គ្លេស ហើយត្រូវបានទទួលស្គាល់យ៉ាងទូលំទូលាយថាជាស្តង់ដារសម្រាប់គុណភាព និងឧត្តមភាពនៅក្នុងឧស្សាហកម្មម្ហូបអាហារ និងភេសជ្ជៈ។

យោងតាម Amru Rice អង្ករសសុទ្ធនេះមានក្លិនក្រអូបស្រាល និងផ្អែមតិចៗ។ វានឹងជាមូលដ្ឋានដ៏ល្អសម្រាប់មុខម្ហូបផ្សេងៗ។ វាស្អិតបន្តិច ប៉ុន្តែគ្រាប់អង្ករណែនល្អ ដែលធ្វើឱ្យវារឹងជាងអង្ករដំណើបអាស៊ីខ្លះ។ គ្រាប់អង្ករឆៅមានរាងស្អាត តូច វែង គ្រាប់ថ្លា គ្មានបំណែកខូច។ បាយឆ្អិនភ្លឺដូចព្រិលធ្លាក់មកថ្មីៗក្នុងចាន ហើយក្លិនក្រអូបឈ្ងុយមែនទែន។ ទន់ ណែន ស្អិតរមួត ពេលចម្អិន និងមានរសជាតិឈ្ងុយឆ្ងាញ់ ជាប់ចិត្ត។ គ្រាប់អង្ករទាំងនេះមានពណ៌សថ្លា ហើយមានទំហំប៉ុនៗគ្នា។ អង្ករមានរសជាតិឈ្ងុយឆ្ងាញ់ និងរមួតជាប់មាត់។ អង្ករនេះត្រូវជាមួយមុខម្ហូបជាច្រើន មិនមែនតែម្ហូបខ្មែរនោះទេ។

ក្នុងនាមជាឈ្មោះ ដែលគួរឱ្យទុកចិត្តសម្រាប់អង្ករក្រអូបប្រណីតកម្ពុជា «ម្លិះអង្គរ» ដែលជាម៉ាកបញ្ជាក់សម្រាប់អង្ករក្រអូបប្រណីតកម្ពុជា បានឈ្នះពានរង្វាន់អង្ករល្អបំផុតលើពិភពលោកជាលើកទី៦ ពីការប្រកួតប្រជែងអង្ករល្អបំផុតលើពិភពលោកកាលពីខែវិច្ឆិកា ឆ្នាំ២០២៤ នៅប្រទេសហ្វីលីពីន។

សូមអបអរសាទរ និងថ្លែងអំណរគុណដល់ក្រសួងកសិកម្ម រុក្ខាប្រមាញ់ និងនេសាទ ដែលបានខិតខំស្រាវ​ជ្រាវ និងបញ្ចេញនូវពូជល្អ និងប្រជាកសិករកម្ពុជាដែលបានខិតខំធ្វើការងារបានយ៉ាងល្អក្នុងការដាំដុះ ហើយក៏សូមអរគុណដល់រោងម៉ាស៊ីនកិនស្រូវដែលបានខិតខំសម្រិតសម្រាំងនិង កិនកែច្នៃអង្ករបានយ៉ាងល្អរហូតទទួលបានជ័យជំនះជូនប្រទេសជាតិ។

អង្ករម៉ាក “ម្លិះអង្គរ” ជាអង្ករដែលមានគុណភាព និងទុកចិត្តបានសម្រាប់ អង្ករក្រអូបប្រណិតកម្ពុជា។ការទទួលបានពានរង្វាន់នេះ នឹងជួយលើកតម្លៃអង្ករខ្មែរឱ្យមានការទទួលស្គាល់កាន់តែច្រើន និងទីផ្សារកាន់តែធំទូលាយ។ ទន្ទឹមនេះ ​ក្រសួងកសិកម្ម រុក្ខាប្រមាញ់ និងនេសាទ និងសហព័ន្ធស្រូវអង្ករកម្ពុជា ក៏តែងតែបានលើកទឹកចិត្តឱ្យកសិករងាកមកដាំស្រូវផ្ការំដួល សែនក្រអូប និងផ្កាម្លិះដែលជាពូជប្រណិតរបស់កម្ពុជាវិញ ដើម្បីទទួលបានតម្លៃទីផ្សារខ្ពស់ ជាពិសេស ជួយលើកកិត្តនាមពូជស្រូវក្នុងស្រុកកាន់តែល្បីល្បាញ៕