បរទេស ៖​​ យោងតាមប្រភពពី Weforum បានលើកឡើងថា ​បញ្ញាសិប្បនិម្មិត AI កំពុងត្រូវបានប្រើប្រាស់នៅក្នុងទីក្រុងជាច្រើន ហើយទីក្រុងខ្លះបានប្រើប្រាស់វាចាប់តាំងពីដំណើរការជំនាន់ដំបូងបង្អស់របស់ AI។ ដើម្បីក្លាយជាទីក្រុងឆ្លាតវៃ ការប្រើប្រាស់ទិន្នន័យ បច្ចេកវិទ្យា និង AI នឹងជួយសម្រួលសេវាកម្មសាធារណៈ អាចជួយជំរុញកំណើនសេដ្ឋកិច្ច និងទទួលបានភាពទាក់ទាញ។

យោងតាម City AI Connect ជាវេទិកាឌីជីថលថ្មីដែលភ្ជាប់រដ្ឋាភិបាលក្នុងតំបន់សាកល្បងបញ្ញាសិប្បនិម្មិតទូទៅបានបញ្ជាក់ថា ករណីប្រើប្រាស់បច្ចុប្បន្នរួមមានការបង្កើត chatbots ច្រើនភាសា ដើម្បីបង្កើនភាពងាយស្រួលនៃសេវាកម្ម និងសម្រួលកាលវិភាគដឹកជញ្ជូនសាធារណៈ។ ខាងក្រោមនេះគឺជាទីក្រុងចំនួន ៤ នៅលើពិភពលោកដែលកំពុងឈានមុខគេជាមួយនឹងបច្ចេកវិទ្យា។

១. ទីក្រុង Buenos Aires គឺជារដ្ឋធានីរបស់ប្រទេសអាហ្សង់ទីន បានបើកដំណើរការ chatbot របស់ខ្លួនដែលមានឈ្មោះថា “Boti” នៅឆ្នាំ ២០១៩។ Boti បានវិវត្តន៍ជាមួយ AI ជំនាន់ថ្មីដោយសម្រេចបាន ១១ លានសន្ទនាក្នុងខែមករា ឆ្នាំ២០២២ ហើយវាបានក្លាយជាបណ្តាញទំនើបដែលប្រជាពលរដ្ឋពេញចិត្ត។ វាបានបម្រើការជាបណ្តាញផ្លូវការរបស់រដ្ឋាភិបាលសម្រាប់ការធ្វើតេស្ត និងការចាក់វ៉ាក់សាំងក្នុងអំឡុងពេលរាតត្បាត ប៉ុន្តែឥឡូវនេះ វាបានពង្រីកវិសាលភាពរបស់ខ្លួនដើម្បីរួមបញ្ចូលសេវាកម្ម ដូចជា សេវាកម្មជិះកង់ និងការថែទាំសង្គម។

២. សិង្ហបុរី គឺទីក្រុងដំបូងគេរបស់ពិភពលោកដែលមាន Digital Twin (គំរូបច្ចេកវិទ្យាភ្ជាប់ពិភពរូបវន្តជាមួយឌីជីថលដោយការចម្លងជាក់ស្តែងនៃរូបវន្តទៅជារូបនិមិ្មត ហើយវាត្រូវបានប្រើប្រាស់នៅក្នុងទិន្នន័យ 3D និងក្រាហ្វិក ដើម្បីបង្កើតស្ថាបត្យកម្មនិម្មិត និងម៉ូដែលផ្សេងៗទៀត)។ ឥឡូវនេះ តាមគំនិតផ្តួចផ្តើមរបស់រដ្ឋាភិបាលដែលបានចាប់ផ្តើមកាលពីឆ្នាំមុន សិង្ហបុរីបានបង្កើតឡើងជាមួយនឹងដំណោះស្រាយ Gen AI ជាង ១០០។ ស្របពេលដែលរដ្ឋាភិបាលនៃបណ្តាប្រទេសជាច្រើនលើពិភពលោកកំពុងចាត់វិធានការប្រុងប្រយ័ត្នចំពោះ AI និងណែនាំផ្លូវការពារ រដ្ឋាភិបាលសិង្ហបុរីចង់ប្រើប្រាស់បច្ចេកវិទ្យាច្រើនបំផុតក្នុងគោលបំណងធ្វើឱ្យសេដ្ឋកិច្ចសិង្ហបុរីទទួលយក និងប្រើប្រាស់ AI។

៣. ទីក្រុង Amsterdam៖ មូលដ្ឋានគ្រឹះនៃជំនាន់ AI chatbots ដូចជា ChatGPT អាចបំប្លែងភាសាធម្មជាតិទៅជាភាសាបច្ចេកទេសដោយប្រើប្រាស់ទិន្នន័យពាក្យ។ ឥឡូវនេះ គម្រោងស្រាវជ្រាវមួយនៅសាកលវិទ្យាល័យ Amsterdam កំពុងផ្លាស់ប្តូរពាក្យសម្រាប់ម៉ូលេគុលគីមីទៅជាពាក្យថ្មី ឬ សម្ភារៈថ្មីមួយទៀតប្រកបដោយនិរន្តរភាព។ Bernd Ensing សាស្ត្រាចារ្យដឹកនាំនៃគម្រោង Artificial Intelligence for Sustainable Molecules and Materials (AI4SMM) លើកឡើងថា ការអនុវត្តវិធីសាស្រ្តគំរូ AI ចំពោះធាតុគីមី ឬ សម្ភារៈ​ដែលពួកគេប៉ះក្នុងនាមជាអ្នកគីមីវិទ្យា។ ពួកគេបង្កើតម៉ូលេគុលថ្មី និងសម្ភារៈថ្មី ហើយការប្រើប្រាស់ AI អាចជួយពួកគេក្នុងកិច្ចការនោះ ព្រមទាំងអាចនឹងផ្លាស់ប្តូររបៀបដែលពួកគេធ្វើការងារវិទ្យាសាស្ត្រ ហើយពួកគេនឹង​​មិន​សូវ​ពឹង​ផ្អែក​លើ​វិចារណញាណ​គីមីថែមទៀតផង។ ក្រុម AI4SMM ដំបូងផ្តោតលើការអភិវឌ្ឍប្រូតេអ៊ីនថ្មីលើរុក្ខជាតិ ដែកថែបប្រកបដោយនិរន្តរភាព ប្លាស្ទិកសុវត្ថិភាព និងអំបិលស្តុកទុកថាមពល។

៤. ទីក្រុង Dallas៖ ស្របពេលដែលរថយន្តស្វយ័តបើកបរដោយខ្លួនឯងត្រូវបានសាកល្បងរួចហើយជាមួយនឹងកម្រិតនៃភាពជោគជ័យផ្សេងៗគ្នា ឥឡូវនេះ រថយន្តប្រភេទថ្មីដែលបើកបរដោយខ្លួនឯងកំពុងត្រូវបានសាកល្បងរវាងទីក្រុង Dallas និង Houston ក្នុងរដ្ឋតិចសាស់សហរដ្ឋអាមេរិក។

យោងតាម ​​MIT Technology Review បានឲ្យដឹងថា ស្របពេលដែលស្តង់ដារនៃរថយន្តស្វយ័តប្រើប្រាស់ទិន្នន័យ និងរូបថតដើម្បីរៀបចំផែនការផ្លូវ និងកំណត់អត្តសញ្ញាណវត្ថុ ប្រព័ន្ធ Copilot4D ថ្មីនឹងត្រូវបានបណ្តុះបណ្តាលលើឧបករណ៍ចាប់សញ្ញា lidar ដែលអាចកំណត់ចម្ងាយរបស់វត្ថុ និងកំណត់ផែនទី 3D ជុំវិញរថយន្ត។ នេះមានន័យថា យានជំនិះអាចបង្កើតការទស្សន៍ទាយអំពីបញ្ហា និងអ្វីដែលអាចនឹងកើតឡើងរហូតដល់ ១០ វិនាទីនៅពេលខាងមុខ។ Raquel Urtasun នាយកប្រតិបត្តិនៃ Waabi ដែលជាក្រុមហ៊ុនបច្ចេកវិទ្យាសម្រាប់រថយន្តស្វយ័តបើកបរដោយខ្លួនឯង ហើយក៏ជាអ្នកនៅពីក្រោយការបង្កើតថ្មីនេះ លើកឡើថា គំរូ “AI-first” របស់ពួកគេនឹងសិក្សាពីទិន្នន័យជាមុនសិនជាជាងប្រតិកម្មចំពោះស្ថានភាពជាក់លាក់។ ប្រសិនបើយានជំនិះ AI ជំនាន់ថ្មីទាំងនេះបង្ហាញថាមានសុវត្ថិភាព និងអាចទុកចិត្តបានជាងរថយន្តជំនាន់មុន នោះសក្តានុពលរបស់វាអាចដោះស្រាយបញ្ហាមួយចំនួនរួមមាន ការរក្សាខ្សែសង្វាក់ផ្គត់ផ្គង់ ការបំភាយកាបូន និងកង្វះកម្លាំងពលកម្ម៕