សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រទេសចិនជាដៃគូអភិវឌ្ឍន៍ដ៏សំខាន់របស់កម្ពុជា ដោយចិនបានជួយកសាងផ្លូវ ស្ពាន ហេដ្ឋារចនាសម្ព័ន្ធសំខាន់ៗដល់កម្ពុជា ជាក់ស្ដែងគិតមកដល់បច្ចុប្បន្ននេះ ប្រទេសចិនបានជួយសាងសង់ផ្លូវដល់កម្ពុជាប្រមាណ៣០ខ្សែដែលមានប្រវែងប្រមាណ ៣ ០០០គីឡូម៉ែត្រ គិតជាទឹកប្រាក់ជិត២ពាន់លានដុល្លារអាមេរិក ។ នេះបើតាមប្រសាសន៍សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាថ្លែងពិធីបើកការដ្ឋានលើកកម្រិតគុណភាពផ្លូវជាតិលេខ៤១ ព្រឹកថ្ងៃទី២៦ ខែធ្នូ ឆ្នាំ២០២២នេះ។
សម្ដេចបានមានប្រសាសន៍ថា ផ្លូវចំនួន៣០ខ្សែ មានប្រវែង ៣ ០០០គីឡូម៉ែត្រ ដែលចិនជួយសាងសង់នោះគឺបានសាងសង់ និងបានដាក់ដំណើរការរួចហើយ ហើយក៏មានផ្លូវចំនួន៣ខ្សែទៀត ដែលត្រូវចំណាយថវិកាប្រមាណ៥០០លានដុល្លារអាមេរិក ។
សម្ដេចបន្តថា ក្រៅពីផ្លូវ ចិនក៏បានជួយសាងសង់ស្ពានដល់កម្ពុជាចំនួន៩ ទាំងការសាងសង់រួចហើយ និងកំពុងសាងសង់ ហើយនៅថ្ងៃទី២ ខែមករា ឆ្នាំ ២០២៣ខាងមុខនេះ យើងនឹងបើកការដ្ឋានសាងសង់ស្ពានឆ្លងទន្លេមេគង្គនៅខេត្តក្រចេះ ។
ជោគវាសនារួមក្នុងភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន បានបង្កើតនូវការជឿទុកចិត្តគ្នា ហើយក្រៅពីការផ្ដល់ជំនួយឥតសំណង មិត្តចិនក៏បានផ្ដល់នូវឥណទានសម្បទានសម្រាប់កម្ពុជា ។ រឿងនេះគេអាចមើលឃើញជាក់ស្ដែងនៅតាមសមិទ្ធផលទាំងអស់ដែលប្រជាពលរដ្ឋបាន និងកំពុងធ្វើដំណើរលើផ្លូវ លើស្ពាន ប្រជាពលរដ្ឋដែលមានកូនកំពុងចូលរៀននៅតាមសាលា កំពុងសម្រាកព្យាបាលនៅតាមមន្ទីរពេទ្យ បាននិងកំពុងទទួលទឹកសម្រាប់ការដាក់ស្រែ ។
សម្ដេចតេជោបានមានប្រសាសន៍ថា ៖
“ក្នុងឆ្នាំ២០២២នេះ កម្ពុជា និងចិនមានកិច្ចជាច្រើនដែលបានធ្វើ និងកំពុងធ្វើ ហើយក៏បន្តធ្វើ ។ ជាក់ស្ដែង គម្រោងអភិវឌ្ឍន៍ហេដ្ឋារចនាសម្ព័ន្ធ ជាច្រើនទៀតនឹងត្រូវបើកការដ្ឋាននៅចុងឆ្នាំនេះ ហើយ និងដើមឆ្នាំក្រោយដែលហេដ្ឋារចនាសម្ព័ន្ធទាំងនោះសុទ្ធតែជាហិរញ្ញប្បទានរបស់មិត្តចិនរបស់យើង”៕
Account
Security
Favourite Content