សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ គណៈកម្មាធិការជាតិគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ (NC-CBTE) បានបើកកិច្ចប្រជុំជាលើកដំបូងក្នុងអាណត្តិរាជរដ្ឋាភិបាលអាណត្តិទី៧ សំដៅជំរុញការអភិវឌ្ឍសហគមន៍ទេសចរណ៍ និងអេកូទេសចរណ៍ ប្រកបដោយចីរភាព និងការទទួលខុសត្រូវខ្ពស់។
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធាន NC-CBTE បានថ្លែងថា កម្ពុជាត្រូវបានទទួលស្គាល់ជាលក្ខណៈអន្តរជាតិលើការងារសហគមន៍ និងអេកូទេសចរណ៍តាមរយៈការអនុវត្តគំរូអភិវឌ្ឍសហគមន៍ទេសចរណ៍ ក្រោមទម្រង់ភាពជាដៃគូ-រដ្ឋ-ឯកជន-ប្រជាជន (4Ps : Public Private People Partnership) ដោយលើកទឹកចិត្តការវិនិយោគតម្រូវឱ្យមានការចូលរួមពីប្រជាជនមូលដ្ឋាន ការផ្តល់សិទ្ធិអំណាចដល់ប្រជាពលរដ្ឋសហគមន៍ ការផ្តល់ប្រយោជន៍អតិបរមាដល់មូលដ្ឋាន ព្រមទាំងការគោរពគោលការណ៍ចីរភាព និងទទួលខុសត្រូវ។
ឯកឧត្តម ហួត ហាក់ បានគូសបញ្ជាក់ថា ការអភិវឌ្ឍសហគមន៍ទេសចរណ៍ និងអេកូទេសចរណ៍ គឺជាការងារអាទិភាព ដោយឈរលើទស្សនទាន ការអភិរក្សបម្រើដល់ការអភិវឌ្ឍ និងការអភិវឌ្ឍបម្រើដល់ការអភិរក្ស ព្រមទាំងស្របតាមគោលការណ៍នៃការបែងចែកផលប្រយោជន៍ប្រកបដោយសមធម៌ដល់ប្រជាសហគមន៍។
មន្ត្រីជាន់ខ្ពស់បរិស្ថាន ក្នុងដំណើរទស្សនកិច្ចគម្រោងនិរន្តរភាពបរិស្ថាន និងអេកូទេសចរណ៍ កាលពីពេលថ្មីៗនេះបានលើកឡើងថា ដើម្បីការពារធនធានធម្មជាតិដ៏សម្បូរបែបរបស់ប្រទេសកម្ពុជា អ្នកទេសចរគួរដើរកម្សាន្តនៅតំបន់ការពារធម្មជាតិឱ្យបានច្រើន ដើម្បីបញ្ជាក់ពីការស្រឡាញ់ធម្មជាតិ និងដើម្បីស្វែងយល់អំពីមាតុភូមិកម្ពុជា ដែលជាការរួមចំណែកលើកកម្ពស់ជីវភាពរបស់ប្រជាសហគមន៍ឱ្យកាន់តែមានភាពល្អប្រសើរ។
ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន បានលើកឡើងថា តំបន់ការពារធម្មជាតិរបស់កម្ពុជា មានសក្តានុពលច្រើនសម្រាប់ការពង្រីកនូវគោលដៅលម្ហែបៃតង ជាក់ស្តែង ដូចជា តំបន់ឧទ្យានជាតិព្រះបាទជ័យវរ្ម័ន-នរោត្តមភ្នំគូលែន គឺបានរៀបចំឱ្យមានកន្លែងតង់ស្នាក់លម្ហែបៃតងចំនួន ១០កន្លែង ដល់សហគមន៍។ រីឯឧទ្យានជាតិព្រះសុរាម្រិតកុសុមៈគីរីរម្យ ក៏មានរៀបចំជាកន្លែងវិបស្សនាសម្រាកលម្ហែបែបសាសនា ក្នុងទីលម្ហែបៃតងផងដែរ។
ឯកឧត្តម ខ្វៃ អាទិត្យា បានបញ្ជាក់ថា ៖ តំបន់ការពារធម្មជាតិមានសត្វព្រៃ និងទេសភាពល្អស្អាត ដែលជាសក្តានុពល និងបានផ្តល់ប្រាក់ចំណូលដល់ពលរដ្ឋនៅក្នុងសហគមន៍ ក៏ដូចជាសហគមន៍ទាំងមូល តាមរយៈការទាញយកប្រយោជន៍ពីគោលដៅលម្ហែបៃតង។
ជាមួយគ្នានេះ ឯកឧត្តមក៏បានជំរុញលើកទឹកចិត្តអ្នកទេសចរដែលស្រឡាញ់ធម្មជាតិ ទៅកម្សាន្តនៅតំបន់ការពារធម្មជាតិផ្សេងៗទៀត ដោយនៅមានសហគមន៍ផ្សេងៗជាច្រើន ដែលក្រសួងបរិស្ថាននិងដៃគូអភិវឌ្ឍន៍បានជួយរៀបចំហេដ្ឋារចនាសម្ព័ន្ធ មានទាំងទឹកស្អាត បន្ទប់អនាម័យ ក៏ដូចជា រៀបចំទីតាំងបោះតង់ ឬកន្លែងសម្រាកកម្សាន្តនៅតាមសហគមន៍តំបន់ការពារធម្មជាតិទាំងអស់ ដែលមានសក្តានុពលសម្រាប់ការបង្កើតនូវគោលដៅលម្ហែបៃតង ។
សូមបញ្ជាក់ថា ក្រសួងបរិស្ថាន បាន និងកំពុងអភិវឌ្ឍគោលដៅលម្ហែបៃតងនៅតាមសហគមន៍តំបន់ការពារធម្មជាតិ ស្របតាមគោលនយោបាយ រាជរដ្ឋាភិបាល និងយុទ្ធសាស្ត្រចក្រាវិស័យបរិស្ថាន ហើយធ្វើឱ្យសហគមន៍មានចំណូលបន្ថែម បង្កើតជម្រើសថ្មីសម្រាប់ការប្រកបមុខរបរចិញ្ចឹមជីវិត ដោយផ្តល់ចំណេះដឹង ជំនាញ និងមុខរបរថ្មី ដូចជា ការចិញ្ចឹមសត្វ ការដាំដំណាំរួមផ្សំ សម្រាប់ប្រើប្រាស់ប្រចាំថ្ងៃផង និងសម្រាប់នាំចូលទៅទីផ្សារផង ព្រមទាំងជួយរៀបចំបង្កើតជាអេកូទេសចរណ៍ នៅក្នុងតំបន់សហគមន៍ទេសចរណ៍របស់ខ្លួនថែមទៀត៕
Account
Security
Favourite Content