បរទេស៖ យោងតាមប្រភពព័ត៌មានពី France24 បានរាយការណ៍ថា ការរអិលបាក់ដី និងទឹកជំនន់ដែលបង្កឡើងដោយព្យុះទីហ្វុង Yagi បានសម្លាប់មនុស្សជាង ២៥០ នាក់នៅអាស៊ីអាគ្នេយ៍។

ខ្យ់ល់ព្យុះទីហ្វុង Yagi បក់វិលក្នុងល្បឿន ១៥០ គីឡូម៉ែត្រក្នុងមួយម៉ោងបានបង្កទឹកជំនន់ដ៏ធំ និងការបាក់ដីនៅតំបន់ភាគខាងជើងនៃប្រទេសវៀតណាម ឡាវ ថៃ និងមីយ៉ាន់ម៉ា។ ក្នុងរយៈពេលប៉ុន្មានថ្ងៃនេះ មនុស្សរាប់លាននាក់នៅទូទាំងអាស៊ីអាគ្នេយ៍កំពុងជួបការលំបាក ដូចជា ផ្ទះលិចទឹក ការដាច់ចរន្តអគ្គិសនី និងខូចខាតហេដ្ឋារចនាសម្ព័ន្ធ បន្ទាប់ពីព្យុះទីហ្វុង Yagi បានបោកបក់ពេញតំបន់ ព្រមទាំងឆក់អាយុជីវិតមនុស្សថែមទៀតផង។ ទន្ទឹមនឹងនេះ វៀតណាមកំពុងរងគ្រោះខ្លាំងបំផុតដោយអ្នកស្លាប់បានកើនឡើងដល់ ២២៦ នាក់ ខណៈដែលភាគខាងជើងប្រទេសថៃមានមនុស្សស្លាប់ ៩ នាក់។ សេវាពន្លត់អគ្គីភ័យជាតិរបស់មីយ៉ាន់ម៉ាបានបញ្ជាក់ថា សាកសពចំនួន ១៧ នាក់ត្រូវបានរកឃើញនៅភូមិមួយដែលលិចទឹកស្ថិតក្នុងតំបន់ម៉ាន់ដាឡាយ ខណៈដែលមនុស្សជាង ៥ ម៉ឺននាក់ត្រូវបានបង្ខំឱ្យចាកចេញពីផ្ទះ។

អង្គការយូនីសេហ្វ UNICEF លើកឡើងថា ព្យុះទីហ្វុងនេះបានបំផ្លាញផ្ទះជាង ១៤០ ០០០ ខ្នងនៅទូទាំង ២៦ ខេត្តក្នុងប្រទេសវៀតណាម។ ឥឡូវនេះ ទឹក​ជំនន់​ក្នុង​ប្រទេស​វៀតណាម​កំពុង​ស្រក​ចុះ ដោយ​ហូរ​កាត់​ទន្លេ​ក្រហម​ដែល​ជា​ផ្លូវ​ទឹក​សំខាន់ចូលទៅ​​សមុទ្រ។ អាជ្ញាធរនៅតាមស្រុកជាច្រើននាតំបន់ដីសណ្ដទន្លេក្រហមបានបញ្ជាឱ្យមនុស្សជាង ៥ ម៉ឺននាក់ជម្លៀសចេញ ដើម្បី​ការពារពីទឹកហូរកាត់។

ក្រសួងកសិកម្មវៀតណាមបាននិយាយថា ទឹកជំនន់បានបំផ្លិចបំផ្លាញដំណាំជាង ២៥០ ០០០ ហិកតា និងសម្លាប់សត្វពាហនៈយ៉ាងច្រើន ជាពិសេសដីស្រែចំការជុំវិញទីក្រុងហាណូយបានរងផលប៉ះពាល់យ៉ាងខ្លាំង។ កសិករម្នាក់នៅមាត់ទន្លេហាណូយ និយាយថា ចម្ការផ្លែប៉េសទាំងមូលរបស់គាត់ត្រូវបានលិចទឹក ដោយបំផ្លាញដំណាំជាង ៤០០ ដើម។ គាត់បង្ហាញពីក្តីព្រួយបារម្ភថា វា​មានភាព​ពិបាកក្នុងការស្រោចស្រង់​ពី​ការ​ខាត​បង់​នេះ​រហូត​ដល់​ទៅ ៤ ម៉ឺនដុល្លារ​ក្នុង​រដូវ​កាល​នេះ។ បន្ថែមពីនេះ ការបាក់ដីនៅក្នុងខេត្ត Lao Cai ដែលជាឧបទ្ទវហេតុដ៏អាក្រក់បំផុតមួយបានបំផ្លាញភូមិទាំងមូលមានផ្ទះចំនួន ៣៧ ខ្នង ដោយបានសម្លាប់មនុស្សយ៉ាងហោចណាស់ ៤០-៥០ នាក់។ កាលពីថ្ងៃព្រហស្បតិ៍កន្លងទៅនេះ ក្រុមជួយសង្គ្រោះបានទាញជនរងគ្រោះចេញពីភក់ ដោយជញ្ជូនពួកគេទៅកាន់ជម្រកបណ្តោះអាសន្នដើម្បីជួយសង្គ្រោះ ហើយអ្នកស្លាប់ត្រូវបានលាងសាកសពយ៉ាងប្រុងប្រយ័ត្នសម្រាប់ត្រៀមបញ្ចុះ។ សាកសពចំនួន ១៥ នាក់ត្រូវបានរកឃើញនៅក្នុងខេត្ត Cao Bang បន្ទាប់ពីការរអិលបាក់ដីបានឆក់ឡានក្រុង រថយន្ត និងម៉ូតូជាច្រើនគ្រឿងចូលទៅក្នុងទឹកហូរកាលពីថ្ងៃចន្ទ។

កាលពីថ្ងៃព្រហស្បតិ៍ គណៈកម្មការទន្លេមេគង្គ ដែលជាស្ថាប័នអន្តរជាតិត្រួតពិនិត្យផ្លូវទឹកដ៏សំខាន់បានចេញការព្រមានអំពីទឹកជំនន់សម្រាប់ទីក្រុងហ្លួងប្រាបាងរបស់ប្រទេសឡាវផងដែរ។ គេព្យាករណ៍ថា ទន្លេមេគង្គអាចនឹងឡើងដល់កម្រិតទឹកជំនន់នៅប៉ុន្មានថ្ងៃខាងមុខនេះនៅទីក្រុងហ្លួងព្រះបាង ដែលជាតំបន់បេតិកភណ្ឌពិភពលោករបស់អង្គការយូណេស្កូ។

ដោយឡែក នៅខាងប្រទេសមីយ៉ាន់ម៉ាវិញ រដ្ឋាភិបាល​បាន​បង្កើត​ជំរុំ​ប្រហែល ៥០ ដើម្បី​ជួយ​ប្រជាជន​ដែល​រងគ្រោះ​ដោយ​ទឹកជំនន់។ ទន្ទឹមនឹងនេះ បណ្តាញខ្សែរថភ្លើងសំខាន់រវាងទីក្រុងយ៉ាងហ្គូន និងទីក្រុងម៉ាន់ដាឡាយត្រូវបានផ្អាក ដោយសារផ្នែកខ្លះត្រូវបានជន់លិច។

លោក Suttipong Juljarern មន្ត្រីជាន់ខ្ពស់ក្រសួងមហាផ្ទៃប្រទេសថៃ បាននិយាយនៅក្នុងសេចក្តីថ្លែងការណ៍មួយថា ភាគខាងជើងនៃស្រុកម៉ៃសៃ(ឈៀងរ៉ៃ) ជាប់ព្រំដែនជាមួយប្រទេសមីយ៉ាន់ម៉ាកំពុងទទួលរងនូវទឹកជំនន់ដ៏អាក្រក់បំផុតក្នុងរយៈពេល ៨០ ឆ្នាំ។ នាយកដ្ឋានបង្ការ និងកាត់បន្ថយគ្រោះមហន្តរាយថៃបានលើកឡើងថា ចំនួនអ្នកស្លាប់បានកើនឡើងដល់ ៩ នាក់ ដែលក្នុងនោះមាន ៦ នាក់បានស្លាប់នៅក្នុងការរអិលបាក់ដីនៅក្នុងខេត្តឈៀងម៉ៃ។ អាជ្ញាធរអាកាសចរណ៍បានលើកឡើងថា ជើងហោះហើរទាំងអស់ត្រូវបានផ្អាកក្នុងខេត្តឈៀងរ៉ៃ ដោយសារវាមានចម្ងាយប្រហែល ១៤៥ គីឡូម៉ែត្រប៉ុណ្ណោះពីភាគឦសាននៃខេត្តឈៀងម៉ៃ។

គួរឲ្យបញ្ជាក់ដែរថា ភ្លៀងមូសុងបានវាយប្រហារតំបន់អាស៊ីអាគ្នេយ៍ជារៀងរាល់ឆ្នាំ ប៉ុន្តែការប្រែប្រួលអាកាសធាតុដែលបង្កើតឡើងដោយមនុស្សកំពុងបណ្តាលឱ្យមានគ្រោះមហន្តរាយអាកាសធាតុកាន់តែខ្លាំង ដែលអាចធ្វើឱ្យមានទឹកជំនន់បំផ្លិចបំផ្លាញកាន់តែធ្ងន់ធ្ងរ។ បម្រែបម្រួលអាកាសធាតុកំពុងបង្កឲ្យខ្យល់ព្យុះទីហ្វុងក្នុងល្បឿនលឿនខ្លាំង ហើយតំបន់ឆ្នេរនឹងងាយរងគ្រោះបំផុតជាមួយនឹងរយៈពេលយូរជាងដីគោក៕