ភ្នំពេញ ៖ ក្រសួងពាណិជ្ជកម្មបានប្រកាសជូនដំណឹងនៃការផ្តល់នូវប្រព័ន្ធអនុគ្រោះពន្ធថ្មី UK’s Developing Countries Trading Scheme (DCTS) ជំនួស UK’s Generalized Scheme of Preference (GSP) របស់រដ្ឋាភិបាលនៃចក្រភពអង់គ្លេសជូនបណ្តាប្រទេសកំពុងអភិវឌ្ឍ និងប្រទេសអភិវឌ្ឍតិចតួច ដើម្បីធ្វើពិពិធកម្មការនាំចេញ ដែលក្នុងនោះក៏មានឈ្មោះប្រទេសកម្ពុជាដែរ។

តាមរយៈសេចក្តីជូនដំណឹងបានបញ្ជាក់ថា ក្រសួងពាណិជ្ជកម្មមានកិត្តិយសសូមជម្រាបជូនដំណឹងដល់អ្នកឧកញ៉ា ឧកញ៉ា លោក-លោកស្រី អ្នកនាងកញ្ញា ដែលជាផលិតករ ឬអ្នកនាំចេញទាំងអស់ជ្រាបថា រដ្ឋាភិបាលនៃចក្រភពអង់គ្លេសបានប្រកាសអំពីការផ្តល់នូវប្រព័ន្ធអនុគ្រោះពន្ធថ្មី: UK’s Developing Countries Trading Scheme (DCTS) ជំនួស UK’S Generalized_scheme_of_Proference (GSP) ក្នុងគោលបំណងគាំទ្រដល់កំណើនសេដ្ឋកិច្ចប្រកបដោយ ចីរភាពក្នុងបណ្ដាប្រទេសកំពុងអភិវឌ្ឍ រួមទាំងប្រទេសអភិវឌ្ឍតិចតួច ដោយក្នុងនោះក៏មានប្រទេសកម្ពុជា​ផងដែរ។

សេចក្តីជូនដំណឹងបានបញ្ជាក់ថា បន្ថែមលើអត្រាពន្ធសូន្យ និងមិនកម្រិតបរិមាណ (duty-free & quota-free) ដែលប្រទេសអភិវឌ្ឍតិចតួច រួមទាំងប្រទេសកម្ពុជាធ្លាប់ទទួលបានប្រព័ន្ធអនុគ្រោះពន្ធថ្មីនេះ (DCTS) នឹងផ្ដល់ភាពងាយស្រួលបន្ថែមទៀត តាមរយៈការធ្វើសេរីភាវូបនីយកម្ម វិធានដើមកំណើតទំនិញ និងការធ្វើសាមញ្ញកម្មលើលក្ខខណ្ឌតម្រូវ ដែលក្នុងនោះបានអនុញ្ញាតឱ្យប្រើប្រាស់តម្លៃបន្ថែមក្នុងស្រុក (Local content) ត្រឹម ២៥% (តម្លៃវត្ថុធាតុដើមនាំចូលសម្រាប់ប្រើប្រាស់ (Non-originating content) រហូតដល់ ៧៥%) ឬការផ្លាស់ប្តូរចំណាត់ថ្នាក់បន្ទាត់ពន្ធ រហូតដល់៤ខ្ទង់ ទៅ៦ខ្ទង់។

ដើម្បីទទួលបានការអនុគ្រោះពន្ធពីចក្រភពអង់គ្លេស ផលិតករ ឬអ្នកនាំចេញទាំងអស់ ត្រូវអនុវត្តតាមវិធានដើមកំណើតទំនិញរបស់ចក្រភពអង់គ្លេស។ ប្រព័ន្ធអនុគ្រោះពន្ធ ឌីស៊ីធីអេស (Developing Countries Trading Scheme,DCTS) នៃចក្រភពអង់គ្លេសបានចូលជាធរមាននៅខែមេសា ឆ្នាំ២០២៣ ខណៈដែលកម្ពុជា ស្ថិតក្នុងចំណោមប្រទេសចំនួន ៦៥ ពីប្រព័ន្ធអនុគ្រោះពន្ធនេះ។

បើតាមសុន្ទរកថារបស់ Anne-Marie Trevelyan រដ្ឋលេខាធិការក្រសួងពាណិជ្ជកម្មអន្តរជាតិ បានបញ្ជាក់ថាចក្រភពអង់គ្លេសកំពុងដាក់ឱ្យដំណើរការគម្រោងពាណិជ្ជកម្មប្រទេសកំពុងអភិវឌ្ឍន៍ ដើម្បីទាញយកថាមពលពាណិជ្ជកម្ម ដើម្បីជួយប្រទេសកំពុងអភិវឌ្ឍន៍ឱ្យរីកចម្រើន។ គ្រោងការថ្មីនេះផ្តល់ជូនប្រទេសកំពុងអភិវឌ្ឍន៍នូវជម្រើសនៃការធ្វើពាណិជ្ជកម្ម ដ៏សប្បុរសបំផុតរបស់ប្រទេសណាមួយក្នុងពិភពលោក។ គ្រោងការនេះបង្ហាញពីការប្តេជ្ញាចិត្តរបស់ចក្រភពអង់គ្លេសក្នុងការកសាងទំនាក់ទំនងដែលមានអត្ថប្រយោជន៍ទៅវិញទៅមករយៈពេលវែងជាមួយនឹងសេដ្ឋកិច្ចដែលកំពុងរីកចម្រើនដែលមានប្រជាជនជាង ៣,៣ ពាន់លាននាក់។

យោងតាមសេចក្តីបញ្ជាក់របស់រដ្ឋាភិបាលចក្រភពអង់គ្លេសបានឱ្យដឹងថា រដ្ឋាភិបាលកំពុងណែនាំគម្រោងពាណិ​ជ្ជ​កម្មប្រទេសកំពុងអភិវឌ្ឍន៍ (DCTS) ដើម្បីកែលម្អលទ្ធភាពចូលទៅកាន់ទីផ្សារអង់គ្លេសសម្រាប់ប្រទេស​កំពុងអភិវឌ្ឍន៍ ស្របតាមយុទ្ធសាស្ត្រអភិវឌ្ឍន៍អន្តរជាតិថ្មីរបស់រដ្ឋាភិបាល គ្រោងការនេះរួមចំណែកដល់ការធ្វើសមាហរណកម្មរបស់ប្រទេសកំពុងអភិវឌ្ឍន៍ទៅក្នុងសេដ្ឋកិច្ចពិភពលោក បង្កើតដៃគូពាណិជ្ជកម្ម និងវិនិយោគកាន់តែរឹងមាំសម្រាប់អនាគត និងការពង្រឹងខ្សែសង្វាក់ផ្គត់ផ្គង់។ គ្រោងការនេះជួយប្រទេសនានា ក្នុងការធ្វើពិពិធកម្មការនាំចេញរបស់ពួកគេ និងបង្កើនសេដ្ឋកិច្ចរបស់ពួកគេ ខណៈដែលអាជីវកម្មអង់គ្លេសទទួលបានអត្ថប្រយោជន៍ពីតម្លៃទាប និងជម្រើសជាច្រើនទៀត។

DCTS មានគោលបំណងគាំទ្រដល់កំណើនប្រកបដោយនិរន្តរភាពក្នុងប្រទេសកំពុងអភិវឌ្ឍន៍តាមរយៈការផ្តល់ជូនឯកតោភាគី។ គ្រោងការថ្មី ក៏មានគោលបំណងបង្ហាញពីភាពជាអ្នកដឹកនាំរបស់ចក្រភពអង់គ្លេសក្នុងការប្រើប្រាស់ពាណិជ្ជកម្មសម្រាប់ការអភិវឌ្ឍ។ នេះបាននាំឱ្យមានបទប្បញ្ញត្តិនៅក្នុង DCTS ដែលកាត់បន្ថយពន្ធគយ ធ្វើសេរីភាវូបនីយកម្មច្បាប់នៃតម្រូវការប្រភពដើម និងសម្រួលលក្ខខណ្ឌដែលភ្ជាប់ជាមួយគ្រោងការ។

DCTS អនុវត្តចំពោះប្រទេស ដែលបច្ចុប្បន្នទទួលបានអត្ថប្រយោជន៍ក្រោមគ្រោងការទូទៅនៃ (GSP) របស់ចក្រភពអង់គ្លេស។ GSP រួមមានប្រទេសចំនួន៤៧ នៅក្នុងក្របខណ្ឌ GSP Least Developed Country (LDC) និង ១៨ ប្រទេស ឬដែនដីបន្ថែម ដែលចាត់ថ្នាក់ដោយធនាគារពិភពលោកជាចំណូលទាប (LIC) និងចំណូលមធ្យមកម្រិតទាប (LMIC)។ វាមិនអនុវត្តចំពោះប្រទេស ដែលត្រូវបានចាត់ថ្នាក់ដោយធនាគារពិភពលោកថាជាប្រាក់ចំណូលមធ្យមកម្រិតខ្ពស់សម្រាប់រយៈពេល ៣ ឆ្នាំជាប់ៗគ្នា ឬចំពោះ LICs និង LMICs ដែលមានកិច្ចព្រមព្រៀងពាណិជ្ជកម្មសេរី (FTA) ជាមួយចក្រភពអង់គ្លេសនោះទេ។

ជុំវិញនៃការអនុវត្តប្រព័ន្ធអនុគ្រោះពន្ធថ្មីរបស់អង់គ្លេសសម្រាប់ប្រទេសកំពុងអភិវឌ្ឍន៍នេះ  កម្ពុជានឹងខិតខំជំរុញការនាំចេញរបស់ខ្លួនទៅកាន់ទីផ្សារប្រទេសអង់គ្លេសបន្ថែមទៀត តាមរយៈការធ្វើពិពិធកម្មទំនិញ។ ជាពិសេស គឺជំរុញការនាំចេញផលិតផលកសិកម្ម ដែលចំណុចនេះត្រូវបានលើកឡើង ដោយសម្តេចធិបតី ហ៊ុន ម៉ាណែត ក្នុងជំនួបកាលពីថ្ងៃ០៤ ខែកញ្ញាឆ្នាំ២០២៣ ជាមួយលោកលោក Dominic Williams ឯកអគ្គរដ្ឋទូតចក្រភពអង់គ្លេសប្រចាំនៅកម្ពុជា។