បរទេស ៖ យោងតាមប្រភពព័ត៌មានពី Tasnim បានរាយការណ៍ថា ចំនួនអ្នកអត់ការងារធ្វើបានកើនឡើងជិត ២ម៉ឺននាក់នៅអាល្លឺម៉ង់ ដែលជាប្រទេសសេដ្ឋកិច្ចធំជាងគេរបស់សហភាពអឺរ៉ុប។ ជាការឆ្លើយតបទៅនឹងបញ្ហានេះ សភាអាល្លឺម៉ង់បានអនុម័តផែនការថ្មីមួយគឺ «ច្បាប់ស្តីពីអន្តោប្រវេសន៍ដែលមានជំនាញ»។

យោងទៅតាមរបាយការណ៍ពីទីភ្នាក់ងារសហព័ន្វផ្នែកមុខរបរ និងការងារ (BA)បានគូសបញ្ជាក់ថា កំណើននេះបានកើនឡើងពីខែឧសភាដែលមានអត្រាអ្នកអត់ការងារធ្វើចំនួន ១ ៣០០០ នាក់។ នៅឆ្នាំនេះ គេបានកត់សម្គាល់ថា រដ្ឋទាំង ១៦ របស់អាល្លឺម៉ង់បានជួបប្រទះនឹងកំណើននៃអត្រាអ្នកអត់ការងារធ្វើបើធៀបនឹងរយៈពេលដូចគ្នាក្នុងឆ្នាំ២០២២ ពីព្រោះស្ថានភាពសេដ្ឋកិច្ចកាន់តែលំបាក ដែលធ្វើឲ្យភាពអត់ការងារធ្វើកំពុងកើនឡើង។ មួយវិញទៀតនោះ កំណើនចំនួនអ្នកគ្មានការងារភាគច្រើនមកពីលំហូរជនភៀសខ្លួនពីអ៊ុយក្រែនចាប់តាំងពីខែកុម្ភៈឆ្នាំមុនមកម្ល៉េះ ដែលមានចំនួនជាង ១លាននាក់។

ទិន្នន័យផ្លូវការមួយបានបង្ហាញថា ពលរដ្ឋអ៊ុយក្រែនជិត ២ម៉ឺននាក់នៅតែគ្មានការងារធ្វើនៅក្នុងអាល្លឺម៉ង់គិតត្រឹមខែនេះ ខណៈដែលជនជាតិអ៊ុយក្រែនដែលមានការងារធ្វើចំនួនជិត ៥ម៉ឺននាក់ទៀតបានចុះឈ្មោះជាមួយមជ្ឈមណ្ឌលការងារ និងទីភ្នាក់ងារការងារក្នុងប្រទេសអាល្លឺម៉ង់។ បើទោះបីជាមិនមានជនភៀសខ្លួនពីអ៊ុយក្រែន ក៏កំណើននៃភាពអត់ការងារធ្វើនៅអាឡឺម៉ង់នឹងនៅតែបន្តកើនឡើងពីមួយឆ្នាំទៅមួយឆ្នាំដែរ។ ទន្ទឹមនឹងនេះដែរ សេដ្ឋវិទូមើលឃើញថា អាល្លឺម៉ង់កំពុងស្ថិតក្នុងវិបត្តិសេដ្ឋកិច្ច ហើយធនាគារកណ្តាលអាល្លឺម៉ង់បានប្រកាសកាលពីខែមុននេះថា ពួកគេរំពឹងថាវិបត្តិសេដ្ឋកិច្ចនឹងបញ្ចប់នៅនិទាឃរដូវ។

កាលពីខែកក្កដា ឆ្នាំ២០២២កន្លងទៅនេះ ការខ្វះខាតបុគ្គលិកបានប៉ះពាល់ដល់ក្រុមហ៊ុនទាំងអស់នៅអាល្លឺម៉ង់ក្នុងចំនួនស្ទើរតែពាក់កណ្តាល ដោយបង្ខំឱ្យពួកគេបន្ថយប្រតិបត្តិការរបស់ពួកគេ។ កង្វះ​កម្លាំង​ពលកម្ម​ជំនាញ​ត្រូវ​បាន​គេ​ចាត់​ទុក​ថា​ជាបញ្ហា​ដ៏​ធំ​បំផុត​មួយ​នៃកំណើន​សេដ្ឋកិច្ច​ក្នុង​អាល្លឺម៉ង់ ខណៈដែលបុគ្គលិក​ជំនាញកំពុងខ្វះខាត​គ្រប់​ទីកន្លែង​ ហើយវិជ្ជាជីវៈជាច្រើនក្នុងវិស័យការងារកំពុងជួបការលំបាកមានដូចជា ការថែទាំថែទាំកុមារ ឧស្សាហកម្មសំណង់ បច្ចេកវិទ្យារថយន្ត អ្នកបើកបរឡានដឹកទំនិញ ស្ថាបត្យករ ឱសថការី និងអ្នកឯកទេសផ្នែកព័ត៌មានវិទ្យា។

ជាការឆ្លើយតបទៅនឹងបញ្ហានេះ កាលពីថ្ងៃសុក្រ សប្ដាហ៍កន្លងទៅនេះ សភារបស់ប្រទេសអាល្លឺម៉ង់បានអនុម័តផែនការថ្មីមួយដែលជាច្បាប់កំណែទម្រង់អន្តោប្រវេសន៍ ដើម្បីទាក់ទាញបុគ្គលិកជំនាញក្រៅសហភាពអឺរ៉ុប ដើម្បីជួយដោះស្រាយបញ្ហាកង្វះកម្លាំងពលកម្មនៅក្នុងវិស័យការងារ និងសេដ្ឋកិច្ចរបស់ខ្លួន។ ច្បាប់ថ្មីនេះមានឈ្មោះថា ច្បាប់ស្តីពីអន្តោប្រវេសន៍ដែលមានជំនាញ ដោយផ្តោតជាពិសេសលើពលករដែលមានការបណ្តុះបណ្តាលវិជ្ជាជីវៈ មានបទពិសោធន៍ការងារ និងមិនចាំបាច់មានសញ្ញាប័ត្រដែលត្រូវបានទទួលស្គាល់នៅក្នុងប្រទេសអាល្លឺម៉ង់ ប្រសិនបើពួកគេអាចបង្ហាញថាពួកគេមានបទពិសោធន៍វិជ្ជាជីវៈយ៉ាងហោចណាស់ពីរឆ្នាំ និងសញ្ញាបត្រដែលទទួលស្គាល់ដោយប្រទេសកំណើតដើមរបស់ពួកគេ។ ច្បាប់នេះត្រូវបានបោះឆ្នោតគាំទ្រដោយសមាជិកសភាចំនួន ៣៨៨ សម្លេងដែលយកឈ្នះលើការបោះឆ្នាត ២៣៤ សម្លេងទៀតដែលមិនគាំទ្រ។ ផែនការនៃច្បាប់អន្តោប្រវេសន៍នេះត្រូវបានគេរំពឹងថា វានឹងធ្វើឱ្យមានភាពងាយស្រួលសម្រាប់ពលរដ្ឋប្រទេសទី៣ ក្នុងការមកធ្វើការនៅប្រទេសអាល្លឺម៉ង់ ហើយវាអាចនឹងបង្កើនចំនួនកម្មករមិនមែនសហភាពអឺរ៉ុបនៅក្នុងប្រទេសអាល្លឺម៉ង់ចំនួន ៦ ម៉ឺនក្នុងមួយឆ្នាំៗ។

មិនត្រឹមតែប៉ុណ្ណោះ អ្នកស្វែងរកសិទ្ធិជ្រកកោនដែលបានមកដល់អាល្លឺម៉ង់មុនថ្ងៃទី២៩ ខែមីនា ដែលមានទាំងគុណសម្បត្តិការងារ ឬ ការផ្តល់ជូនការងារអាចទទួលបានបណ្ណស្នាក់នៅក្នុងនាមជាអ្នកជំនាញ ប្រសិនបើពួកគេដកពាក្យសុំសិទ្ធិជ្រកកោនរបស់ពួកគេចេញ ហើយដាក់ពាក្យសុំបណ្ណការងារម្តងទៀត។ បុគ្គលិកដែលមានជំនាញខ្ពស់នឹងត្រូវបានអនុញ្ញាតឱ្យនាំសាច់ញាតិបន្ថែមទៀតមកទៅកាន់អាល្លឺម៉ង់មកផងដែរ ដរាបណាពួកគេអាចជួយសាច់ញាតិទាំងនោះផ្នែកហិរញ្ញវត្ថុបាន។ ជាច្រើនឆ្នាំមកហើយ ប្រទេសអាល្លឺម៉ង់ជួបផលលំបាកជាមួយនឹងតម្រូវការក្នុងការទាក់ទាញកម្មករជំនាញបន្ថែមទៀតពីខាងក្រៅសហភាពអឺរ៉ុប ហើយប្រទេសនេះត្រូវការជនអន្តោប្រវេសន៍ដែលមានជំនាញប្រហែល ៤ ម៉ឺននាក់ក្នុងមួយឆ្នាំៗ ដោយសារកម្លាំងពលកម្មដែលមានវ័យចំណាស់របស់ខ្លួនធ្លាក់ចុះ។ ទីភ្នាក់ងារការងារជាតិបាននិយាយថា អ្នកបើកឡានក្រុង ការងារផ្នែកលោហៈ ការងារសេវាកម្មនៅក្នុងសណ្ឋាគារ និងភោជនីយដ្ឋាន គឺជាការងារស្ថិតក្នុងបញ្ជីមួយនេះ៕