ជម្លោះនៅអ៊ុយក្រែនបានអូសបន្លាយអស់រយៈពេលជិត២ឆ្នាំមិនទាន់រកឃើញច្រកចេញនៅឡើយ ប៉ុន្តែកាលពីដើមខែតុលាកន្លងទៅនេះ ជម្លោះដ៏ធំមួយទៀតបានធ្វើឲ្យពិភពលោកភ្ញាក់ផ្អើលយ៉ាងខ្លាំងរវាងក្រុមហាម៉ាស និងអ៊ីស្រាអែលដែលវាបានបណ្តាលឲ្យជនស៊ីវិលទាំងសងខាងបាត់បង់ជីវិតអស់ជាច្រើនពាន់នាក់រួចមកហើយ។

មានអ្នកវិភាគ និងអ្នកជំនាញជាច្រើនបានមើលឃើញថា រូបរាងនៃជម្លោះធំទាំងពីរនេះមានការកើតឡើងមិនមែនជារឿងចៃដន្យនោះទេ ប៉ុន្តែអ្វីដែលគេបានលើកឡើងមកពិនិត្យពិច្ច័យឲ្យលំអិតនោះគេនឹងសង្កេតឃើញថា សហរដ្ឋអាមេរិក និងលោកខាងលិចដែលជាអ្នកដើរតួសំខាន់ក្នុងការដោះស្រាយជម្លោះបែរជាបានប្រើប្រាស់ស្តង់ដា២ទៅវិញចំពោះកិច្ចិខិតខំប្រឹងប្រែងរបស់ខ្លួន។

កាសែតអន្តរជាតិជាច្រើនរូមទាំង Anadolu Ajansi, Al Jazeera និង The New York Times សុទ្ធតែបានចេញផ្សាយនូវការយល់ឃើញស្រដៀងគ្នាថា លោកខាងលិច និងអាមេរិកពិតជាបានប្រើប្រាស់ស្តង់ដា២ពិតមែនចំពោះជម្លោះរវាងអ៊ុយក្រែន-រុស្សី និងហាម៉ាស-ប៉ាឡេស្ទីន ជាពិសេសទៅលើសកម្មភាពវាយប្រហាររបស់ភាគីជម្លោះទៅលើមន្ទីរពេទ្យ, ហេដ្ឋារចនា, សម្ព័ន្ធជនស៊ីវិល ហើយសូម្បីតែអ្នកកាសែតក៏រងគ្រោះដូចគ្នា។

ខណៈដែលរដ្ឋាភិបាលអាមេរិកហាក់ដូចជាមិនមានភាពស្ទាក់ស្ទើរក្នុងការចេញការថ្កោលទោស និងទណ្ឌកម្មសេដ្ឋកិច្ចជាបន្តបន្ទាប់ចំពោះរុស្សីនោះ ប៉ុន្តែចំពោះជំហជាមួយនឹងអ៊ីស្រាអែលវិញ ក្រុងវ៉ាស៊ិនតោនហាក់ដូចជារក្សាភាពស្ងប់ស្ងាត់ និងចាត់ទុកថាវាគឺជាសកម្មភាពដែលស្របច្បាប់ទៅវិញក្នុងការវាយប្រហារទៅលើតំបន់ហ្គាហ្សា។

ជាឧទាហរណ៍ជាក់ស្តែង ទោះបីជាចំនួនអ្នកស្លាប់នៅមន្ទីរពេទ្យ Al Ahli Baptish នៅហ្គាហ្សាមានចំនួនច្រើនជាងចំនួនអ្នកស្លាប់នៅមន្ទីរពេទ្យក្នុងទីក្រុង Mariupol កាលពីខែមិនាឆ្នាំ២០២២កន្លងទៅក្តី ប៉ុន្តែអាមេរិក និងលោកខាងលិចនាំគ្នាស្តីបន្ទោសយ៉ាងខ្លាំងចំពោះប្រទេសរុស្សីជាជាងការថ្កោលទោសចំពោះអ៊ីស្រាអែល។

ថ្លែងចំពោះការវាយប្រហារលើគោលដៅមន្ទីរពេទ្យក្នុងទីក្រុង Mariupol ប្រធានាធិបតីអាមេរិក លោក Joe Biden បាននិយាយថា ការវាយប្រហារនេះគឺជាភាពអយុត្តិធម៌ និងជា ការអាម៉ាស់បំផុតដល់ពិភពលោកទាំងមូល។ លោកបាននិយាយថា ពិភពលោកទាំងមូលរួបរួមគ្នាគាំទ្រអ៊ុយក្រែន និងធ្វើយ៉ាងណាបង្ខំឲ្យប្រធានាធិបតីរុស្ស៊ី Vladimir Putin ត្រូវតែទទួលខុសត្រូវទាំងអស់ចំពោះហេតុការណ៍នេះ។ ប៉ុន្តែ បន្ទាប់ពីការវាយប្រហារលើមន្ទីរពេទ្យក្នុងតំបន់ហ្គាហ្សា លោក Biden បែរត្រឹមបាននិយាយថា លោកមានការសោកស្តាយយ៉ាង ខ្លាំងចំពោះហេតុការណ៍នោះ។

លោក Biden បាននិយាយនៅក្នុងសន្និសីទកាសែតជាមួយនាយករដ្ឋមន្ត្រីអ៊ីស្រាអែល Benjamin Netanyahu ដោយសំដៅលើការអះអាងរបស់អ៊ីស្រាអែលថា ក្រុមជីហាតអ៊ីស្លាមទៅវិញទេ ដែលជាអ្នករៀបចំផែនការវាយប្រហារ។

ខណៈដែលហេតុការណ៍វាយប្រហារចាប់ផ្តើមដោយក្រុមហាម៉ាសកាលពីថ្ងៃទី៧ ខែតុលាដែលបានធ្វើឲ្យពលរដ្ឋស៊ីវិលអ៊ីស្រាអែលស្លាប់ជាង១៤០០នាក់នោះ គិតមកទល់ពេលនេះអ៊ីស្រាអែលបានបើកប្រតិបត្តិការតបតវិញក្នុងការឈានទៅដល់ការគ្រប់គ្រងតំបន់ហ្គាហ្សាទាំងមូលនោះបានធ្វើឲ្យជនស៊ិវិលក្នុងតំបន់ហ្គាហ្សាស្លាប់ជាង ៩ ៥០០នាក់រួមមានទាំង ៣ ៩០០នាក់ជាកុមារ និងជាង ២ ៥០០នាក់ជាស្ត្រី។

មកទល់បច្ចុប្បន្ន រដ្ឋមន្ត្រីការបរទេសអាមេរិក លោក Antony Blinken នៅតែមិនបញ្ចេញប្រតិកម្មអ្វីឡើយចំពោះការវាយប្រហាររបស់អ៊ីស្រាអែលលើមន្ទីរពេទ្យនៅហ្គាហ្សា និងប្រតិបត្តិការយោធាជាបន្តបន្ទាប់របស់អ៊ីស្រាអែល ខណៈដែលសេតវិមានទាំងមូលកំពុងស្តីបន្ទោសខ្លាំងទៅលើក្រុមហាម៉ាសដែលវាផ្ទុយទាំងស្រុងទៅនឹងស្ថានភាពដូចគ្នានៅអ៊ុយក្រែនដោយយោធារុស្ស៊ី។ ក្រៅពីនោះអ្វីដែលគេមើលឃើញកាន់តែច្បាស់ថា ស្តង់ដា២របស់លោកខាងលិច​ និងអាមេរិកកំពុងត្រូវបានអនុវត្តទៅលើជម្លោះទាំងនេះនោះគឺរបាយការណ៍ស្លាប់របស់ក្រុមអ្នកកាសែតអន្តរជាតិ។

កាលពីហេតុការណ៍ស្លាប់អ្នកកាសែតអាមេរិក លោក Brent Renaud នៅអ៊ុយក្រែនភ្លាម អ្នកនាំពាក្យរបស់ក្រសួងការបរទេសអាមេរិកបានថ្លែងថា ពួកយើងមានអារម្មណ៍ខ្លោចផ្សារបំផុតនៅពេលដែលបានដឹងថាអ្នកកាសែត និងក្រុមការងារមិនមានប្រដាប់ដោយអាវុធផ្សេងទៀតត្រូវបានសម្លាប់ និងរបួសនៅអ៊ុយក្រែនដោយយោធារុស្ស៊ី។ ប៉ុន្តែក្នុងពេលដែលអ៊ីស្រាអែលបានបើកប្រតិបត្តិការយោធាសម្លាប់ក្រុមអ្នកកាសែតអន្តរជាតិដល់ទៅ៣៦នាក់នៅហ្គាហ្សានោះ​ អ្នកនាំពាក្យក្រសួងការបរទេស ឬក្រុមមន្ត្រីអាមេរិកផ្សេងទៀតមិនមានអ្នកណាម្នាក់ចេញមកធ្វើការឆ្លើយតប ឬថ្កោលទោសឡើយចំពោះកងកម្លាំងយោធាអ៊ីស្រាអែលនោះទេ។

គួរឲ្យដឹងដែរថា នៅថ្ងៃពុធសប្ដាហ៍នេះ​ កិច្ចប្រជុំប្រទេសមហាអំណាច G7 ថ្នាក់រដ្ឋមន្ត្រីការបរទេសនឹងត្រូវធ្វើឡើងដើម្បីពិភាក្សាគ្នាទៅលើបញ្ហាជម្លោះរវាងអ៊ីស្រាអែល និងហាម៉ាសដែលរួមមានទាំងដំណើរការផ្តល់ជំនួយមនុស្សធម៍ និងដំណើរការនៃបទឈប់បាញ់គ្នាផងដែរ៕