សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រុមហ៊ុនអាមេរិកដ៏ធំមួយបានមកសិក្សាអំពីសក្តានុពលស្រូវអង្ករនៅកម្ពុជា ក្នុងគោលបំណងនាំចេញអង្ករកម្ពុជាទៅសហរដ្ឋអាមេរិកនាពេលអនាគត។
ទាក់ទងនឹងការពិនិត្យលទ្ធភាពក្នុងការបញ្ជាទិញអង្ករកម្ពុជាសម្រាប់ចែកចាយក្នុងទីផ្សារអាមេរិកនេះ លោក Patrick Murphy អនុប្រធានប្រតិបត្តិទទួលបន្ទុកផ្នែកបញ្ជាទិញអង្ករ និងគ្រាប់ធញ្ញជាតិ នៃក្រុមហ៊ុន Otis McAllister, Inc បានមកពិភាក្សាជាមួយលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងសហព័ន្ធស្រូវអង្ករកម្ពុជា កាលពីល្ងាចថ្ងៃចន្ទ ទី៣ ខែមិថុនា ឆ្នាំ២០២៤ នៅសណ្ឋាគារ រ៉ាហ្វល ឡឺ រ៉ូយ៉ាល់ រាជធានីភ្នំពេញ។
ក្នុងជំនួបនោះ លោកអនុប្រធានប្រតិបត្តិក្រុមហ៊ុនបានសម្តែងនូវមោទនភាព និងការពេញចិត្តនូវភាពរីកចម្រើនជារួមរបស់កម្ពុជាដែលខុសប្លែកពីអ្វីដែលលោកធ្លាប់បានទទួលព័ត៌មាននៅខាងក្រៅ។ លើសពីនេះលោកបានធ្វើការកត់សម្គាល់ និងកោតសរសើរទៅលើកសិកម្មកម្ពុជា ជាពិសេសផលិតផលអង្ករដែលធានាបាននូវគុណភាព និងបរិមាណដែលទទួលយកបាន។
ជាកិច្ចឆ្លើយតប លោកជំទាវរដ្ឋមន្ត្រី បានលើកទឹកចិត្តឱ្យក្រុមហ៊ុននាំចេញអង្ករធំៗទាំង ១៦ ដែលជាសមាជិករបស់សហព័ន្ធធ្វើការដោយផ្ទាល់ជាមួយក្រុមហ៊ុន Otis McAllister ដើម្បីឈានដល់ការចុះកិច្ចព្រមព្រៀងបញ្ជាទិញអង្ករកម្ពុជាចូលទៅផ្សារសហរដ្ឋអាមេរិកក្នុងពេលឆាប់ៗខាងមុខ។
បើតាមសហព័ន្ធស្រូវអង្ករកម្ពុជា ក្រុមហ៊ុនមួយផ្សេងទៀតដែលមានមូលដ្ឋាននៅសហរដ្ឋអាមេរិកក៏បានបង្ហាញពីចំណាប់អារម្មណ៍របស់ពួកគេក្នុងការទិញអង្ករពីប្រទេសកម្ពុជាក្នុងគោលបំណងជួយកសិករក្នុងស្រុក និងជំរុញសេដ្ឋកិច្ចរបស់ប្រទេសកម្ពុជា៕
Account
Security
Favourite Content