សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពី Fortune បានរាយការណ៍ថា សហរដ្ឋអាម៉េរិកបានដាក់ទណ្ឌកម្មលើក្រុមហ៊ុនដឹកជញ្ជូនរបស់អារ៉ាប់រួម បន្ទាប់ពីពួកគេបានដឹកជញ្ជូនប្រេងឆៅរបស់រុស្ស៊ីលើសពីតម្លៃកំណត់ ៦០ ដុល្លារក្នុងមួយបារ៉ែល។ ទន្ទឹមនឹងនេះ ប្រេងឆៅម៉ាក WTI មានតម្លៃ ៧៤,០៨ ដុល្លារក្នុងមួយបារ៉ែល ខណៈដែលប្រេងឆៅម៉ាក Brent មានតម្លៃ ៧៨,៩២ ដុល្លារក្នុងមួយបារ៉ែល។
គិតត្រឹមពេលនេះ រតនាគារអាម៉េរិកបានរឹតបន្តឹងលើក្រុមហ៊ុន Hennesea Holdings Limited និងនាវាចំនួន ១៨ របស់ខ្លួនជាទ្រព្យសម្បត្តិដែលត្រូវបានហាមឃាត់ ដោយក្រុមហ៊ុនអាម៉េរិកមិនអាចធ្វើអាជីវកម្មជាមួយពួកគេបានទៀតទេ។ នេះគឺជាសកម្មភាពអនុវត្តវិធានការកំណត់តម្លៃប្រេងជាលើកដំបូងនៅឆ្នាំ ២០២៤ ។
លោក Wally Adeyemo លេខាធិការរងរតនាគារបាននិយាយថា សកម្មភាពពេលនេះបង្ហាញជាថ្មីម្តងទៀតថានរណាម្នាក់ដែលបំពានលើតម្លៃកំណត់នឹងប្រឈមមុខនឹងផលវិបាកដោយគ្មាននរណាម្នាក់មិនគួរសង្ស័យលើការប្តេជ្ញាចិត្តរបស់សម្ព័ន្ធមិត្តអាម៉េរិកក្នុងការបញ្ឈប់អ្នកដែលជួយរុស្ស៊ីនោះទេ។ យ៉ាងណាមិញ អ្នកតំណាងមកពីក្រុមហ៊ុន Hennesea Holdings មិនអាចនិយាយអ្វីបានភ្លាមៗសម្រាប់ការធ្វើអត្ថាធិប្បាយទេ។
គួរបញ្ជាក់ផងដែរថា សហរដ្ឋអាម៉េរិក សហភាពអឺរ៉ុប បណ្តាប្រទេសក្នុងក្រុម G7 និងអូស្ត្រាលីបានយល់ព្រមលើការកំណត់តម្លៃប្រេងរុស្ស៊ី ៦០ ដុល្លារក្នុងមួយបារ៉ែលកាលពីឆ្នាំ ២០២២។ រាល់ការទិញលើសពីតម្លៃកំណត់នឹងត្រូវបានចាត់ទុកថាជាការបំពានលើគោលការណ៍ដែលបានព្រមព្រៀង។ វិធានការកំណត់តម្លៃប្រេងនេះត្រូវបានបង្កើតឡើងដើម្បីរឹតបន្តឹងចំណូលរបស់រុស្ស៊ី ដែលផ្តល់មូលនិធិដល់សង្រ្គាមរបស់ខ្លួនក្នុងប្រទេសអ៊ុយក្រែន។
កាលពីឆ្នាំ២០២៣ ក្រុមហ៊ុននានានៅទូទាំងអារ៉ាប់រួម ហុងកុង និងតួកគី ត្រូវបានកំណត់គោលដៅសម្រាប់ការដាក់ទណ្ឌកម្មសេដ្ឋកិច្ចដោយផ្អែកលើការចោទប្រកាន់ថាបានរំលោភលើតម្លៃកំណត់។ វិធានការកំណត់តម្លៃនេះត្រូវបានដាក់ចេញដើម្បីយុត្តិធម៌ និងក្តីសង្ឃឹមថាគោលនយោបាយនេះនឹងទប់ស្កាត់ការលុកលុយរបស់រុស្ស៊ីមកលើអ៊ុយក្រែន។
លើសពីនេះផងដែរ លោកខាងលិចបានដាក់ទណ្ឌកម្មរុស្ស៊ីជាច្រើនដងតាំងពីឆ្នាំ២០២២ ហើយខែក្រោមនេះគឺជាឆ្នាំទី៣ ដែលរុស្ស៊ីជាប់ទណ្ឌកម្ម។ ការដាក់ទណ្ឌកម្មនេះគឺសំដៅលើប្រតិបត្តិការធនាគារ និងហិរញ្ញវត្ថុ បច្ចេកវិទ្យា ការផលិត និងជនជាតិរុស្ស៊ីដែលមានទំនាក់ទំនងរវាងរដ្ឋាភិបាល៕
Account
Security
Favourite Content