បរទេស៖ យោងតាមប្រភពព័ត៌មានពី Vietnam Briefing បានរាយការណ៍ថា ការវាយប្រហារដោយខ្យល់ព្យុះទីហ្វុង Yagi មកលើវៀតណាម បានប៉ះពាល់ដល់វិស័យសំខាន់ៗមួយចំនួន ដូចជា ហេដ្ឋារចនាសម្ព័ន្ធ សំណង់អគារ និងទេសចរណ៍ យ៉ាងធ្ងន់ធ្ងរ ដែលធ្វើឲ្យប្រទេសមួយនេះត្រូវចំណាយលុយរាប់លានដុល្លារទៅលើការស្តារ និងកែលម្អឡើងវិញ។

របាយការណ៍ផ្លូវការបានបង្ហាញថា គិតត្រឹមថ្ងៃទី១៧ ខែកញ្ញា កាលពីសប្ដាហ៍កន្លងទៅ ខ្យល់ព្យុះទីហ្វុង Yagi បានបង្កឲ្យមានទឹកជំនន់ និងការបាក់ដីជាបន្តបន្ទាប់ ព្រមទាំងបានឆក់យកជីវិតមនុស្ស ៣២៩ នាក់ ហើយមនុស្ស ១ ៩២៩ នាក់ផ្សេងទៀតរងរបួស។ បន្ថែមពីនេះ ខ្យល់ព្យុះទីហ្វុង Yagi បានបង្កការខូចខាតនៅភាគខាងជើងនៃប្រទេសវៀតណាមយ៉ាងធ្ងន់ធ្ងរដោយគិតជាទំហំទឹកប្រាក់ប្រមាណ ៤០ ទ្រីលានដុង (១,៦៣ ពាន់លានដុល្លារ) ខណៈដែលរដ្ឋាភិបាលបានព្យាករណ៍ថា កំណើន GDP របស់ប្រទេសនឹងថយចុះពី ០,២ ភាគរយទៅ ០,៥ ភាគរយ។

យោងតាមរដ្ឋមន្ត្រីក្រសួងផែនការ និងវិនិយោគរបស់វៀតណាម បានឲ្យដឹងថា Yagi គឺជាខ្យល់ព្យុះកម្លាំងខ្លាំងបំផុតក្នុងរយៈពេល ៣០ ឆ្នាំចុងក្រោយដែលកើតមានឡើងនៅក្នុងប្រទេសវៀតណាម និងបានប៉ះពាល់ដល់តំបន់ចំនួន ២៦ ទីតាំង អាចធ្វើឱ្យខាតបង់ប្រមាណ ៤១ ភាគរយនៃផលិតផលក្នុងស្រុកសរុបរបស់ប្រទេស និង ៤០ ភាគរយនៃចំនួនប្រជាជនរបស់ខ្លួន។ មិនត្រឹមតែប៉ុណ្ណោះ Yagi បានវាយលុកតំបន់ដីសណ្ដទន្លេក្រហម ដែលជាទីតាំងនៃមជ្ឈមណ្ឌលសេដ្ឋកិច្ចសំខាន់ៗ ដូចជា ទីក្រុងហាណូយ ទីក្រុងហៃហ្វុង ខេត្តក្វាងនិញ ខេត្តបាកនិញ ខេត្តបាកយ៉ាង និងខេត្តថៃង្វៀន។ តំបន់ទាំងនេះមានចំណែក ៣៨ ភាគរយនៃផលិតផលក្នុងស្រុកសរុបរបស់វៀតណាម និង ៥៥ ភាគរយនៃប្រាក់ចំណូលនាំចេញរបស់ប្រទេសផងដែរ។ ទីក្រុងហៃហ្វុង និងខេត្តក្វាងនិញ ដែលទទួលរងផលប៉ះពាល់ដោយផ្ទាល់ពីខ្យល់ព្យុះបានរាយការណ៍ពីការខាតបង់សរុបជាង ១០,៨ ទ្រីលានដុង (៤៤០លានដុល្លារ) និង ២៣,៧៧ ទ្រីលានដុង (៩៦០ លានដុល្លារ) រៀងគ្នា។ គួរឲ្យបញ្ជាក់ដែរថា គ្រោះមហន្តរាយនេះក៏បានបំផ្លាញផ្ទះចំនួន ២៥៧ ០០០ ខ្នង សាលារៀនចំនួន ១ ៣០០ កន្លែង ទំនប់ទឹកចំនួន ៣០៥ និងហេដ្ឋារចនាសម្ព័ន្ធជាច្រើនផ្សេងទៀត។

ការវាយតម្លៃពីក្រុមហ៊ុនប្រឹក្សាយោបល់ឯកទេសក្នុងដំណោះស្រាយខ្សែសង្វាក់ផ្គត់ផ្គង់ (CEL) បង្ហាញថា ក្រុមហ៊ុន ១៥,៤ ភាគរយកំពុងជួបប្រទះនឹងការរំខានយ៉ាងធ្ងន់ធ្ងរដោយសារខ្យល់ព្យុះ Yagi ខណៈដែល ៥៣,៦ ភាគរយទៀតប្រឈមនឹងការពន្យារពេល​ ប៉ុន្តែ ៦,២ ភាគរយប៉ុណ្ណោះដែលមិនមានផលប៉ះពាល់។ CEL បានស្ទង់មតិក្រុមហ៊ុនចំនួន ២១៦ ដែលជាផលិតកម្មនៅទូទាំងប្រទេសបានឲ្យដឹងថា ប្រមាណជាង ៦០ ភាគរយនៃអ្នកឆ្លើយតបមានប្រតិបត្តិការនៅភាគខាងជើងនៃប្រទេសវៀតណាម។ មិនត្រឹមតែប៉ុណ្ណោះ ខ្សែសង្វាក់ផ្គត់ផ្គង់ និងវិស័យភ័ស្តុភារទទួលរងផលប៉ះពាល់ខ្លាំងបំផុត ដោយ ៨២,៤ ភាគរយនៃអាជីវកម្មបានរាយការណ៍ពីផលប៉ះពាល់ធ្ងន់ធ្ងរ ឬមធ្យម។ ការដឹកជញ្ជូនត្រូវបានរងផលប៉ះពាល់ខ្លាំងជាងគេលើសពី ៥០ ភាគរយអាជីវកម្មទាំងមូល ខណៈដែលឃ្លាំងស្តុក និងសារពើភ័ណ្ឌរងផលប៉ះពាល់ខ្លាំងជាងគេទីពីរ ពោលគឺប្រមាណ ២៤,២​ ភាគរយនៃអាជីវកម្មទាំងមូល។ លើសពីនេះ អាជីវកម្ម ឬក្រុមហ៊ុនទាំងនោះកំពុងជួបប្រទះនឹងគ្រោះទឹកជំនន់, ការខូចខាតដំបូល, ការរដួលរលំនៃរចនាសម្ព័ន្ធ, ការដាច់ចរន្តអគ្គិសនី, ការខូចខាតស្តុក ឬសារពើភ័ណ្ឌ និងសំណឹក​ផ្លូវ។ ជាក់ស្តែង ក្រុមហ៊ុនធំៗដែលទទួលរងប៉ះពាល់រួមមាន៖ Samsung, LG Electronics, Wayne, Daito Rubber, Vina Bingo, Iwahashi Brushes, Gia Nghia, Vinh An, និង​ Vang Danh Mine។

ទន្ទឹមនឹងនេះ ក្រុមហ៊ុនផ្លូវដែកវៀតណាម (VNR) បានរាយការណ៍ថា ខ្លួនទទួលរងការខាតបង់ចំនួន ១,៩៣ លានដុល្លារអាមេរិក ហើយរថភ្លើងចំនួន ១៧​ ខ្សែ ត្រូវបានលិចទឹក។ ជារួម វិស័យនេះបានរងការខូចខាតយ៉ាងខ្លាំងពីខ្យល់ព្យុះទី Yagi ជាមួយនឹងការខូចខាតសរុបរហូតដល់ ៧,៣ លានដុល្លារអាមេរិក ដោយក្នុងនោះហេដ្ឋារចនាសម្ព័ន្ធផ្លូវដែកជាង ៣០ ទីតាំងដែលវិនិយោគដោយរដ្ឋត្រូវបានគេប៉ាន់ប្រមាណថា ខូចខាតប្រហែល ៥,៤ លានដុល្លារអាមេរិក។ ទីតាំងទាំងនោះខូចខាតដោយសារទឺកជំនន់ ការបាក់ដី និងការបាក់រលំដើមឈើ។ មួយវិញទៀត សម្រាប់វិស័យ​កសិកម្ម ក៏បាន​រងគ្រោះ​ខ្លាំង​​ពី​គ្រោះ​ធម្មជាតិរួមមាន ៖ ដំណាំចំនួន ២៦២ ០០០ ហិកតា ត្រូវបានខូចខាត ឬបំផ្លាញ ហើយកន្លែងចិញ្ចឹមត្រី ឬ វារីប្បកម្មចំនួន ២ ២៥៥០ កន្លែងត្រូវបានបំផ្លាញ។ បន្ថែមពីនេះ សត្វពាហនៈ និងបសុបក្សីជិត ២,៣ លានក្បាលបានស្លាប់។ ជាលទ្ធផល ការចំណាយលើគ្រឿងទេសបានកើនឡើងយ៉ាងខ្លាំង ដោយសារការបាត់បង់ដំណាំ និងសត្វពាហនៈយ៉ាងច្រើន។ ក្នុងពេលឥឡូវនេះ តម្លៃអាចកើនឡើងពី ១០ ទៅ ១០០ ភាគរយ ដោយសារតែការផ្គត់ផ្គង់ខ្សោយ និងបញ្ហាការដឹកជញ្ជូន។ នៅខាងវិស័យទេសចរណ៍វិញ ទូកទេសចរណ៍ជាង ២០ នៅហាឡុងត្រូវបានលិច ក្នុងអំឡុងការវាយប្រហាររបស់ខ្យល់ព្យុះ Yagi។ លើសពីនេះ វាបណ្តាលឱ្យមានការខាតបង់ដល់អាជីវកម្មសណ្ឋាគារ និងបដិសណ្ឋារកិច្ច។ កំពង់ផែ Tuan Chau អាចដាក់នាវាជាង ២ ពាន់គ្រឿង និង​ជា​កំពង់ផែ​មួយ​ក្នុង​ចំណោម​កំពង់ផែ ៣ ​ដែល​ទទួល​ភ្ញៀវ​ទេសចរ​មក​ទស្សនា​ហាឡុង ប៉ុន្តែបានក្លាយជាតំបន់មួយក្នុងចំណោមតំបន់ដែលរងគ្រោះខ្លាំងបំផុតដោយខ្យល់ព្យុះ Yagi។ ទន្ទឹមនឹងនេះ ក្រុមហ៊ុនទេសចរណ៍ជាច្រើនកំពុងប្រឈមនឹងការខាតបង់ផងដែរ។

គួរកត់សម្គាល់ថា គិតត្រឹមថ្ងៃទី១៦ ខែកញ្ញា ប្រទេសចំនួន ២០ និងអង្គការអន្តរជាតិនានាបានសន្យាផ្តល់ជំនួយជាង ២២ លានដុល្លារអាមេរិកសម្រាប់ជួយដល់វៀតណាមក្នុងការស្តារឡើងវិញ រួមមាន ថវិកា សម្រាប់ការផ្តល់ជម្រក ទឹកស្អាត ធនធានអនាម័យ និងសម្ភារៈផ្សេងទៀតដើម្បីជួយដោះស្រាយផលប៉ះពាល់នៃព្យុះទីហ្វុង។ ជាងនេះទៅទៀត ជនជាតិវៀតណាមនៅឯបរទេសបានបង្ហាញពីសាមគ្គីភាពដោយបរិច្ចាគមកកាន់មាតុភូមិរបស់ពួកគេផងដែរ។ ជាមួយនឹងការខូចខាតសរុបដែលបង្កឡើងដោយខ្យល់ព្យុះទីហ្វុង Yagi ត្រូវបានប៉ាន់ប្រមាណថា នឹងលើសពី ៥០ ទ្រីលានដុង (២ ពាន់លានដុល្លារអាមេរិក) នៅទូទាំងប្រទេស រដ្ឋាភិបាលវៀតណាមបានចេញសេចក្តីសម្រេចមួយដែលលើកឡើងនូវវិធានការមួយចំនួនដើម្បីពន្លឿនការស្តារឡើងវិញ៕