បរទេស ៖​ យោងតាមប្រភពពី​ Weforum បានរាយការណ៍អំពីព័ត៌មានសេដ្ឋកិច្ចសកលមួយចំនួនដែលបានកើតឡើងថ្មីៗនៅក្នុងខែកក្កដា ឆ្នាំ២០២៤នេះ រួមមាន ធនាគារកណ្តាលចិនកាត់បន្ថយអត្រាការប្រាក់, កំណើន GDP នៅត្រីមាសទី២របស់សហរដ្ឋអាមេរិកឈានដល់ ២,៨ ភាគរយ និងការព្យាករណ៍ចុងក្រោយសម្រាប់ GDP របស់ឥណ្ឌាជាដើម។ កាលពីសប្តាហ៍មុន ធនាគារកណ្តាលចិនបានកាត់បន្ថយអត្រាការប្រាក់រយៈពេលខ្លី និងរយៈពេលវែងដ៏សំខាន់ ដែលធ្វើឱ្យទីផ្សារមានភាពភ្ញាក់ផ្អើល ។

យោងតាមប្រភពពីរ៉យទ័រ​ បានឲ្យដឹងថា ការកាត់បន្ថយនេះត្រូវបានអនុវត្តចំពោះអត្រាគោលនយោបាយរយៈពេលខ្លីរបស់ធនាគារ អត្រាប្រតិបត្តិការទីផ្សារ និងអត្រាប្រាក់កម្ចីរបស់ធនាគារស្តង់ដារ។ វាជាការផ្លាស់ប្តូរលើកដំបូងចាប់តាំងពីខែសីហាឆ្នាំមុន បន្ទាប់ពីកិច្ចប្រជុំចុងក្រោយរបស់គណៈកម្មាធិការមជ្ឈិមបក្សកុម្មុយនិស្ត ឬ កិច្ចប្រជុំពេញអង្គដែលធ្វើឡើងរៀងរាល់ប្រាំឆ្នាំម្តង។ ធនាគារកណ្តាលរបស់ប្រទេសចិនបានធ្វើឱ្យទីផ្សារភ្ញាក់ផ្អើលម្តងទៀតនៅសប្តាហ៍នេះជាមួយនឹងប្រតិបត្តិការផ្តល់ប្រាក់កម្ចីដែលមិនបានគ្រោងទុកក្នុងអត្រាទាបជាងយ៉ាងខ្លាំង។ ធនាគារកណ្តាលចិនបានលើកឡើងនៅក្នុងសេចក្តីថ្លែងការណ៍មួយថា ខ្លួននឹងបញ្ជេញប្រាក់កម្ចីចំនួន ២០០ ពាន់លានយ័ន (២៧,៥ពាន់លានដុល្លារ) សម្រាប់ការផ្តល់ប្រាក់កម្ចីដល់ស្ថាប័នហិរញ្ញវត្ថុរយៈពេលមធ្យមមួយឆ្នាំ (MLF) ។

ទន្ទឹមនឹងនេះ ផលិតផលក្នុរស្រុកសរុប (GDP) របស់អាមេរិកបានកើនឡើង ២,៨ ភាគរយនៅក្នុងត្រីមាសទីពីរ ដោយសារការកើនឡើងប្រាក់ចំណូលពីស្តុក ការកើនឡើងការចំណាយរបស់រដ្ឋាភិបាលបានជួយជំរុញកំណើន និងការកើនឡើងនៃការចំណាយរបស់អ្នកប្រើប្រាស់ចំពេលអតិផរណាធ្លាក់ចុះ។ទោះបីជាមានការធ្លាក់ចុះនៅក្នុងទីផ្សារលំនៅឋានដែលបណ្តាលឱ្យមានការអូសទាញតិចតួចលើសេដ្ឋកិច្ចអាមេរិកក៏ដោយ ប៉ុន្តែសេដ្ឋកិច្ចនៅតែបន្តដំណើរការប្រសើរជាងដៃគូរបស់ខ្លួន។ មិនត្រឹមតែប៉ុណ្ណោះ អត្រាកំណើនប្រចាំឆ្នាំ ២,៨ ភាគរយ ក៏លើសពីការរំពឹងទុករបស់អ្នកសេដ្ឋកិច្ច។ លើសពីនេះ ការចំណាយរបស់អ្នកប្រើប្រាស់មានចំនួនច្រើនជាង ២/៣ នៃសេដ្ឋកិច្ចរបស់ប្រទេស ហើយបានកើនឡើងក្នុងអត្រា ២,៣ ភាគរយនៅក្នុងត្រីមាសទីពីរ ដែលកើនឡើងពី ១,៥ ភាគរយនៅក្នុងត្រីមាសទីមួយ។

ក្រៅពីនេះ Weform ក៏បានសង្ខេបពីពត៌មានសេដ្ឋកិច្ចមួយចំនួននមកពីជុំវិញពិភពលោកផងដែរ។ ធនាគារកាណាដាបានកាត់បន្ថយអត្រាការប្រាក់សម្រាប់ខែទីពីរជាប់ៗគ្នាពី ៤,៧៥ ភាគរយមកត្រឹម ៤,៥០ ភាគរយ។ ទន្ទឹមនឹងនេះ កំណើននៃសកម្មភាពអាជីវកម្មនៅតំបន់ចាយប្រាក់អឺរ៉ូបានធ្លាក់ចុះក្នុងខែកក្កដា ខណៈដែលការពង្រីកនៅក្នុងវិស័យសេវាកម្មមិនអាចទប់ទល់នឹងការធ្លាក់ចុះក្នុងចំណោមក្រុមហ៊ុនផលិតនោះទេ។ មិនត្រឹមតែប៉ុណ្ណោះ ការស្ទង់មតិនៅប្រទេសអាឡឺម៉ង់ និងបារាំងបង្ហាញថាអាជីវកម្មនៅក្នុងប្រទេសដែលមានសេដ្ឋកិច្ចធំជាងគេពីររបស់អឺរ៉ុបកំពុងក្លាយជាសញ្ញាអវិជ្ជមានកាន់តែខ្លាំងឡើងអំពីការងើបឡើងវិញ។ នៅខាងអាស៊ីវិញ រដ្ឋាភិបាលថៃរំពឹងថា សេដ្ឋកិច្ចនឹងកើនឡើងលឿនជាងការរំពឹងទុកដំបូង ដែលភាគច្រើនជាលទ្ធផលនៃកំណើនចំនួនអ្នកទេសចរបរទេស។ លើសពីនេះ ការប៉ាន់ប្រមាណដោយធនាគារកណ្តាលរបស់កូរ៉េខាងត្បូងបង្ហាញថា សេដ្ឋកិច្ចរបស់ប្រទេសកូរ៉េខាងជើងបានកើនឡើងយ៉ាងឆាប់រហ័សកាលពីឆ្នាំមុន បន្ទាប់ពីការធ្លាក់ចុះរយៈពេលបីឆ្នាំ។ បន្ថែមពីនេះ រដ្ឋាភិបាលឥណ្ឌាកំពុងព្យាករណ៍កំណើនពី ៦,៥ ភាគរយកើនឡើងទៅ ៧ ភាគរយ ក្នុងឆ្នាំនេះ ខណៈដែលអ្នកសេដ្ឋកិច្ច និងធនាគារកណ្តាលរបស់ប្រទេសបានបញ្ជេញការព្យាករណ៍វិជ្ជមានបន្ថែមទៀត៕