សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ នៅក្នុងបទសន្ទនា និងវិភាគដ៏ស៊ីជម្រៅមួយអំពីបញ្ហាវិបត្តិសកលរវាងប្រធានធនាគារពិភពលោក World Bank ជាមួយនឹងអ្នកជំនាញអន្តរជាតិកំពូលផ្សេងៗទៀតដូចជា World Economy Forum និង IMF ផង បានទទួលស្គាល់ដូចគ្នាថា ពិភពលោកកំពុងជួបប្រឈមទៅនឹងវិបត្តិយ៉ាងច្រើន ប៉ុន្តែក្នុងនោះប្រធានធនាគារពិភពលោក លោក Ajay Banga បានបែងចែកវិបត្តិសកលរយៈពេលវែង និងវិបត្តិសកលរយៈពេលខ្លី ដើម្បីឲ្យគ្រប់គ្នាមើលឃើញអំពីបញ្ហា និងអំពីអ្វីដែលត្រូវដោះស្រាយចំពោះមុខជាមុន។
នៅក្នុងកិច្ចប្រជុំពិភាក្សា The Spring Meeting ដែលប្រព្រឹត្តទៅកាលពីថ្ងៃទី១៧ ដល់ថ្ងៃទី១៩ ខែមេសា លោក Banga បានលើកឡើងថា វិបត្តិសកលទាំងអស់គឺមានការជាប់ទាក់ទងគ្នាយ៉ាងខ្លាំង រាប់ចាប់តាំងពីបញ្ហាបម្រែបម្រួលអាកាសធាតុ, បញ្ហាបំណុល, បញ្ហាវិបត្តិស្បៀងអាហារ ទៅដល់ការពន្លឿននៃការរៀបចំប្រព័ន្ធខ្យល់អាកាស, ប្រព័ន្ធទឹក និងថាមពលស្អាតផងដែរ។
លោកបន្តថា ៖
«ទោះបីជាយ៉ាងណាក្តី យើងនៅតែមិនអាចធ្វើការដោះស្រាយបញ្ហាភាពក្រីក្របាននោះឡើយ លុះត្រាណាតែវិបត្តិទាំងអស់ខាងលើនេះត្រូវបានដោះស្រាយម្តងមួយៗរហូតទាល់តែអស់ និងត្រូវអនុវត្តវាឲ្យសមស្របទៅនឹងទស្សនវិស័យ និងបេសកកម្មដ៏ត្រឹមត្រូវរបស់យើង»។
ប្រធានធនាគារពិភពលោកដែលទើបតែបានឡើងកាន់តំណែងកាលពីខែមិថុនា ឆ្នាំ២០២៣កន្លងទៅរូបនេះបានធ្វើការបែងចែកវិបត្តិសកលបច្ចុប្បន្នទៅជា២ប្រភេទផ្សេងគ្នាដែលក្នុងនោះមានមួយជាវិបត្តិសកលរយៈពេលខ្លី និងមួយទៀតជាវិបត្តសកលរយៈពេលវែង។
លោក Banga ថ្លែងថា ៖
«ភាពផុយស្រួលនៃនយោបាយពិភពលោក និងជម្លោះបូករួមទាំងវិបត្តិបំណុលផង គឺជាវិបត្តិធ្ងន់ធ្ងរសម្រាប់ពិភពលោក ប៉ុន្តែស្ថិតនៅក្នុងរយៈពេលខ្លី ឬ shorter term ប៉ុណ្ណោះដែលជាក់ស្តែងវិបត្តិសកលរយៈពេលវែង Longer tearm ដែលពិភពលោកត្រូវគិតគូរឲ្យបានវែងឆ្ងាយនោះគឺជាវិបត្តិនៃភាពក្រីក្របញ្ហាវិសមភាព និងជាពិសេសបញ្ហារបស់មនុស្សយើងជាមួយនឹងធម្មជាតិ ឬយើងស្គាល់ថាជាបញ្ហានៃបម្រែបម្រួលអាកាសធាតុឯណោះទេ»។
ដូចទៅនឹងការលើកឡើងរបស់អ្នកជំនាញ និងស្ថានភាពបច្ចុប្បន្នដែលយើងអាចមើលឃើញទាំងអស់គ្នាពីបញ្ហានៃភាពក្រីក្រកំពុងកើតឡើងនៅតាមបណ្តាប្រទេសទាំងឡាយលើពិភពលោកសូម្បីតែប្រទេសកំពុងអភិវឌ្ឍ និងអភិវឌ្ឍក្តី ចំណែកឯគ្រោះថ្នាក់ធម្មជាតិក៏កំពុងបន្តវាយប្រហារទៅកាន់តំបន់ជាច្រើន ទោះថ្មី ឬចាស់ ចាប់រាប់តាំងពីគ្រោះរាំងស្ងួត, ការកើនឡើងកំដៅខ្លាំងហួសហេតុ, បញ្ហាទឹកជំនន់ និងគ្រោះរញ្ជួយដី ឬសូម្បីបន្ទុះភ្នំភ្លើងក្តី។
រំលឹកឡើងវិញដែរថា ធនាគារពិភពលោក World Bank ត្រូវបានចាប់កំណើតដំបូងតាំងតែពីឆ្នាំ១៩៤៤ ឬប្រមាណជា៨០ឆ្នាំមុនមកម្ល៉េះក្នុងគោលបំណងសំខាន់ក្នុងការរៀបចំកសាងអឺរ៉ុប និងជប៉ុនឡើងវិញបន្ទាប់ពីសង្គ្រាមលោកទី២ ហើយវាត្រូវបានដាក់ឈ្មោះជាផ្លូវការដំបូងថា The International Bank for Reconstruction and Development៕
Account
Security
Favourite Content